Klakachilh kRiga, niku tapakgsi Letonia. Kintala chu akit xaktawilaw kintse. Maski kintse católica xwanit, kaj akxni xtlawakan paskua xla takanajla xakanaw ksikulan. Akit putum kilhtamaku xakkanajla pi xwi chatum tiku lanka xlakatsukut. Pero, akxni ktsukulh staka atanu tuku ktsukulh lakgati.

Kintse akxilhli pi akit tlan wi tuku xakmalakgxtu chu xakmalakgnupara. Ni kiʼakstu xkimakgxtakga xlakata xpekuan pi xakmalakgxtulh putum chiki. Xlakata xakkgalhilh tuku naktlawa, kimaskiwilh likgaman nema tlan xakmalakgnulh, chu wa tuku putum kilhtamaku xakmalakgnu chu xakmalakgxtu. Uma tuku xaktlawa lu xaklakgati chuna la akxni xakmakgmakgosni motocicleta. Kintse kimatsokgninalh kʼakgtum carrera wanikan Zelta Mopēds, chuna ktsukulh kmakgosni motocicletas nema ni lakapala xkgosnankgo. Alistalh motocicletas nema tlakg xkgosnankgo.

Lakapala kkatsinilh chu tunkun kililakgapaska pi lu xaktlajanan kʼuma takgaman nema lu lipekua xwanit. Makgtutu ktlajalh tuku xwanikan superbikes xla Letonia chu makgtiy ktlajalh xla países bálticos.

Akxni tlakg tlan xkinkitaxtunima tuku xaktlawa, kintaskin Evija, tiku ktatamakgaxtokgli alistalh, tekgsli maktum likgalhtawakga xla xtatayananin Jehová nema xlimin akgtum cupón xlakata kskilh akgtum takgalhtawakga xalak Biblia. Malakgatsamalh, malakgachalh chu ni makgas kilhtamaku titaxtulh, chatiy xtatayananin Jehová tsukukgolh limakgalhtawakgekgo Biblia. Uma kilhtamaku ni lu xaklakgati tuku xla takanajla, pero ni kwanilh pi ni xkgalhtawakgalh.

Akxni titaxtulh kilhtamaku, tiku xlimakgalhtawakgemakgolh Biblia Evija kiwanikgolh pi na xakkgaxmatli.  Tlan ktlawalh chu klakgatilh tuku kkgaxmatli. Tuku lakgchalh kkinaku wa tuku wan Salmo 37:10, 11, niku lichuwinan pi Katiyatni akgtum paraíso nawan. Uma texto wan: «Chu nialh lhuwa kilhtamaku, chu tiku lixkajni likatsi nialh katitawilalh; chu naputsaya niku xwi nialhtu wi nawan. Pero tiku tlan likatsikgo wa nakamaxkikan katiyatni, chu xlikana lu lipaxuw natawilakgo».

Tlakg ktsukulh klakgati tuku wan Biblia. Kkatsilh putum taʼakgsanin nema anankgo ktakanajla. Pero, lu klakgatilh la akxtum chu ni tuwa tuku masiya Biblia.

Akxni ktsukulh likgalhtawakga tuku wan Biblia, kkatsinilh pi Jehová lu xlakaskinka akxilha latamat (Salmo 36:9). Uma tlawalh pi liwana xaklakpuwa komo chuntiya xakmakgkgosnalh. Nialh kalipekua xakwiliputun kilatamat, wata xakmakamaxkiputun Jehová. Nialh xkimakgapaxuwa xlakata lhuwa xkilakgapaskan chu la lu tlan mamakgkatsininan akxni makgkgosnankan.

Kata 1996, kkilalh kʼakgtum tamakxtumit xaʼakgtati kilhtamaku xla xtatayananin Jehová anta kTallin (Estonia), lakatsu kʼestadio niku xakmakgkgosnan. Anta kakxilhli pi akxtum xwilakgo latamanin xalak lhuwa países. Akxni chatum makgatsankgalh xbolso, klakpuwa pi ni xʼama tekgsa. Pero alistalh, wi tiku tekgsli chu maspitnilh. ¡Nila xakkanajla! Uma kilhtamaku kkatsilh pi xtatayananin Jehová xlikana tlawakgo tuku wan Biblia. Evija chu akit staktilhalh kintakanajlakan chu ktamunuw kata 1997.

Makgapitsi amigos tiku na xmakgosnikgo motocicletas wa kamakgnilh. Pero akit klamajku xlakata kimakgtayalh Biblia, xlakata akxni klikgalhtawakgalh kkatsinilh pi akit nakmaxki kuenta Jehová, tiku kimaxkilh latamat.

Akgtati kata, kimpuskat chu akit kskujwi ksucursal xla xtatayananin Jehová xalak Riga. La uku kmakgastakmaw kintsumatkan, Alise chu kmasiyanimaw napaxki Jehová. Nachuna, akgtum kilhtamaku akgatunu semana kan kaxtlawa putlaw niku wilakgo tiku matitaxtikgo kʼatanu tachuwin likgalhtawakga xalak Letonia. Lu kpaxuwa pi kmaklakaskin tuku kkatsinilh akxni aktsujku xakwanit. Chuntiya wi tuku kkamalakgxtu chu kkamalakgnu.

Xlakata tuku kkatsininit kBiblia, tlan kkatalichuwinan kifamilia kajwatiya xaxlikana Dios. Xlikana pi lakgpalilh kilatamat akxni kkatsilh pi kKatiyatni natawila akgtum paraíso.