Biblia kalichuwinankan latamanin tiku xkgalhikgo limapakgsin chu katlawanikgolh tuku nitlan amakgapitsin. Akgtum liʼakxilhtit, wa mapakgsina Acab, tiku mapakgsinalh kʼIsrael ksiglo X akxni nina xmin Jesús, xkgalhiputun xviña Nabot chu xla xkamanan. * Mapakgsina Jezabel, lakkaxwililh pi xkamakgnika Nabot chu xfamilia xlakata xkamakglhtika xpukuxtukan chu mapakgsina nitu tlawalh xlakata ni xkamakgnika (1 Reyes 21:1-16; 2 Reyes 9:26). ¿Tuku xlakata Dios masta talakaskin chuna natlawakan?

Pulaktum wa pi Dios nila akgsaninan (Tito 1:2). Pero ¿watiya wamputun nitlan limaklakaskinkan limapakgsin? Xapulana, Dios kawanilh latamanin pi komo ni xkgalhakgaxmatkgolh xnikgolh, chu chuna lalh. Akxni Adán chu Eva ni kgalhakgaxmatnankgolh kʼEdén, asta la uku latamanin nila lakgtaxtunikgo linin. Akxni xapulana tiku nilh, kaj nitlan limaklakaskinka limapakgsin: Caín makgnilh xtala, Abel (Génesis 2:16, 17; 4:8).

Biblia wan pi ama kilhtamaku asta la uku «chixku akgchipanit chixku xlakata natlawani tuku nitlan» (Eclesiastés 8:9). Akgtum liʼakxilhtit, Jehová kamakatsinilh israelitas, xkachikin, pi xʼamakgo kgalhikgo mapakgsinanin tiku lixkajni xkalikatsinikgolh, chu xtlawalh pi kskinikgolh xtamakgtay (1 Samuel 8:11-18). Asta xaskgalala mapakgsina Salomón lhuwa xkamaxokge impuestos kachikin (1 Reyes 11:43; 12:3, 4). Chu amakgapitsi mapakgsinanin tlakg nitlan likatsikgolh nixawa Acab. La uku kalakpuwanti uma: komo Dios ni xmastalh talakaskin pi xtlawaka tuku nitlan, ¿ni xaʼakgsanina xlitaxtulh?

Nachuna, Satanás wan pi latamanin skujnikgo Dios xlakata wi tuku lakaskinkgo (Job 1:9, 10; 2:4). Komo Dios xkamakgtayalh kskujnin xlakata nitu xkatlawanikgolh tiku kgalhikgo limapakgsin, ¿ni xlitasiyalh pi xlikana tuku wan Satanás? Chu komo xkamakgtayalh putum latamanin, xkamakanajlilh tuku tlakg ni xlikana: pi latamanin tlan xakstukan kamapakgsikan chu ni maklakaskinkgo xtamakgtay. Pero Biblia ni chuna wan: pi latamanin nila xakstukan kamapakgsikan (Jeremías 10:23). Maklakaskinaw pi kamilh xTamapakgsin Dios; chuna nasputa tuku nitlan.

¿Wamputun uma pi Dios nitu tlawama? Ni; pulaktiy tuku tlawama. Pulana, kamakatsini tuku nakaʼakgspula tiku nitlan maklakaskinkgo limapakgsin. Akgtum liʼakxilhtit, Biblia lichuwinan putum tuku tlawalh Jezabel xlakata xmakgnika Nabot. Na wan pi wi tiku kamatlawi tuku nitlan chu ni lakaskin nakatsikan pi wa chuna tlawama (Juan 14:30; 2 Corintios 11:14). ¿Tiku uma? Wa Akgskgawini. Akxni wanaw pi tuku nitlan nasputa chu tiku nitlan limaklakaskinkgo limapakgsin namalakgaxokgekan chu tiku makilhtsukilh, Dios kinkamakgtayayan xlakata na nichuna natlawayaw. Chuna tlan nalatamayaw putum kilhtamaku.

Xlipulaktiy, Dios wan pi nakamasputu tiku nitlan limaklakaskinkgo limapakgsin. Chuna la malakgaxokgelh Acab chu Jezabel, chu lhuwa latamanin tiku nachuna xlikatsikgo, kinkamakgtayayan nalipawanaw pi nakgantaxtu tuku lichuwinanit: nakatalakkaxla putum tiku nitlan likatsikgo (Salmo 52:1-5). Nachuna, kawani tiku paxkikgo pi nalakkaxtlawa putum tuku liminit tuku nitlan. * Xlikana, Nabot chu xkamanan nalatamaparakgo xlakata naʼakxilhkgo akxni katiyatni akgtum Paraíso nawan niku naʼanan tuku xaʼakgstitum (Salmo 37:34).