Titaxtunita akgtum siglo, millones lakgkgawasan makgxtakgkgolh xchikkan xlakata ankgolh kʼguerra. Lu xpaxuwakgo xʼamakgolh xlakata lu xmalankiputunkgo xkachikinkan. Chatum tiku kilalh kʼguerra kata 1914 xalak Estados Unidos wa: «Lu kpaxuwa xlakata nachin lu tlan kilhtamaku».

Pero uma tapaxuwan nema xʼanan alistalh talipuwan kitaxtulh. Niti xlakpuwan pi akglhuwa kata xʼamakgo tlawakgo guerra anta kBélgica chu kFrancia. Ama kilhtamaku, tuku lalh limapakuwika Lanka Guerra. La uku limapakuwiyaw xaPulana Guerra xLikalanka Katiyatni.

Uma, lu lanka guerra litaxtulh xlakata lhuwa latamanin nitlan tuku kaʼakgspulalh, max nikgolh akgkaw millón chu akgpuxam millón ni xatakgatsin tawi xmaknikan, chu atanu tuku nitlan kitaxtulh xlakata uma guerra. Mapakgsinanin xalak Europa nila machokgokgolh uma lanka guerra nema lalh xlikalanka katiyatni. Chu uma Lanka Guerra limilh tuku nitlan nema lakgpalilh kakilhtamaku chu asta la uku akinin na lipatinamaw.

Wa xaPulana Guerra xLikalanka Katiyatni, litsukulh xlakata ni chuna kitaxtulh la xlakpuwankgonit. Kverano kata 1914, mapakgsinanin xalak Europa xtasiyakgo la «tiku lhtatakgonit chu xtlawamakgo niku namokgoskgo» wan The Fall of the Dynasties—The Collapse of the Old Order 1905-1922.

Ni lhuwa semanas titaxtulh, akxni makgnika chatum mapakgsina xalak Austria tlawalh pi laklanka kachikinin xalak Europa xtlawakgolh guerra nema niti xlakaskin. Akxni tsukulh guerra, kgalhskinka chatum puxku xalak Alemania: «¿Pero tuku lalh?», chu lipuwan kgalhtinalh: «Tlan xwa komo xakkatsilh».

Tuku tlawakgolh napuxkun nema litsukulh guerra nipara tsinu xlakpuwankgo la xʼama kitaxtu. Pero akxni xlama guerra, soldados katsikgolh tuku xaxlikana: nitlan tuku xtlawakgonit xmapakgsinakan, xpulalinanin xtakanajlakan xkaʼakgskgawikgonit chu tiku xkapulalima na xkaʼakgskgawikgonit. ¿La kaʼakgskgawika?

Mapakgsinanin lakatanks xwankgonit pi guerra xʼama makgtayanan xlakata kakilhtamaku tlakg tlan xtawi. Chatum puxku xalak Alemania wa: «Ni kmastayaw talakaskin wi tuku naʼakgspula tuku kliskujaw, tuku kinkamakgxtakgnikanitan chu la nakinkakitaxtuniyan kilhtamaku nema aku namin». Mapakgsina Woodrow Wilson, xalak Estados Unidos wi tuku wa, nema xkamaxkilh takgalhkgalhin latamanin tuku lu lichuwinanka alistalh. Wa pi guerra xʼama makgtayanan xlakata kkakilhtamaku «latamanin tlan limakxtum xlaksaknankgolh». Chu kGran Bretaña, latamanin xlakpuwankgo pi uma guerra xʼama masputu putum guerras. ¡Lu xtaʼakgskgawikgonit!

Xpulalinanin takanajla xliputum xlatamatkan makgtayanankgolh xlakata xtatlawalh guerra. The Columbia History of the World wan: «Xkuentajtlawananin xtachuwin Dios wa tiku pulana litlikgolh guerra. Xlakata xlatalachipama nialhla machokgokgolh xtasitsikan». Ni masputukgolh xtasitsikan wata tlakg malankikgolh. Libro La historia del cristianismo wan: «Xpulalinanin takanajla limasiyakgolh pi nila xmasputukgo guerra chu lhuwa na ni pulana xwiliputunkgo xtakanajlakan nixawa xkachikinkan. Lhuwa pulalinanin laksakkgolh tuku tlakg ni tuwa chu tamalakxtumikgolh takanajla xkachikinkan. Soldados xalak atanu takanajla kawanika pi xlalimakgnilh kxtukuwani xLakgmaxtunakan».

Xpulalinanin soldados wankgolh pi lakapala xʼamakgo tlajanankgo pero ni wankgolh tuku xʼama la. Kaj xalan, soldados matsukikgolh lanka guerra, chu chuna la wa chatum tiku lichuwinan tuku lanit makgasa, lhuwa millón soldados «max lu patinankgolh kxmaknikan chu kxtalakapastaknikan nema ni chatum lataman chuna titaxtunit». Maski lhuwa kamakgnika soldados, tiku xkapulalimakgolh chuntiyaku xkamalakgachamakgo ksoldadoskan niku xkawilikanit alambres nema xkgalhikgo tuku tlan lhtukunan chu niku xmakaʼamaka balas xla metralleta. Wa xlakata lhuwa nialh kgalhakgaxmatnankgolh.

¿Tuku katlawanilh uma guerra latamanin? Maktum libro nema lichuwinan tuku lanit makgasa lichuwinan tuku wa chatum kgolotsin: «Guerra [...] laktlawalh xtalakapastaknikan chu xtayatkan latamanin». Chuna, sputkgolh laklanka tamapakgsin chu uma guerra matsukilh siglo niku lhuwa xʼamaka lamakgnikan. Ama kilhtamaku, latamanin tsukukgolh katalatlawakgo mapakgsinanin chu lakatakikgo.

¿Tuku xlakata tlakg analh taʼakglhuwit akxni sputli guerra? ¿Kaj xalan chuna lalh? ¿Tuku kinkalimasiyaniyan xlakata kilhtamaku nema aku mima?