Jesús wa pi Dios katsi tuku lakaskinaw asta akxni nina skiniyaw (Mateo 6:8). Nachuna, David, xmapakgsina Israel xala makgasa tsokgli: «Pues maski ya para kchiwinan wa wakg katsiyata tu nakwan» (Salmo 139:4). Max wa xlakata wi tiku nakgalhskinkan: «¿Tuku xlakata naktlawa oración komo Dios putum katsi, asta tuku klakpuwan chu tuku kmaklakaskin?». Xlakata tlan nakatsiyaw xtakgalhtin, kaʼakxilhwi tuku wan Biblia xlakata oración. *

Maski Biblia wan pi Jehová * putum katsi, na wan pi ni kajwatiya kalakgapasa kskujnin (Salmo 139:6; Romanos 11:33). Xtalakapastakni Dios ni xtachuna la akgtum computadora nema kaj maki tuku tamaknunikan. Xla, lu lilakgaputsa asta tuku lakpuwanaw, xlakata lakaskin pi tlan katalaliw (Salmo 139:23, 24; Santiago 4:8). Wa xlakata Jesús kinkawaniyan pi katlawaw oración maski Jehová liwana katsi tuku maklakaskinaw (Mateo 6:6-8). Akxni tlakg litachuwinanaw kiMalakatsukinakan tuku lakapastakaw, tlakg lakgtalakatsuwiyaw.

Max namin kilhtamaku, ni liwana katikatsiw tuku naskiniyaw Dios. O max nila nawanaw tuku makgkatsiyaw. Pero maski chuna, xla katsi tuku makgkatsiyaw chu wa xlakata kinkamaxkiyan tuku maklakaskinaw (Romanos 8:26, 27; Efesios 3:20). Akxni makgkatsiyaw pi Dios kinkamakgtayanitan kkilatamatkan, maski ni akxilhaw, tlakg lakatsu wi makgkatsiyaw.

Biblia kinkawaniyan pi Dios tiku kgalhi putum litliwakga kakgalhti xʼoracioneskan kskujnin tiku ni makgxtakgkgo pero na kinkawaniyan tuku xlakata ni kgaxmata putum oraciones. Akgtum liʼakxilhtit, akxni xlama tuku lu nitlan kxamakgan kachikin Israel, Dios wanilh xpalakachuwina Isaías pi xkawanilh israelitas: «Maski lhuwa oraciones tlawayatit ni kkgaxmata; mi makankan litatsamanit kgalhni» (Isaías 1:15). Chuna la akxilhwi, tiku lakgmakgankgo xlimapakgsin Dios o tiku skinkgo tuku ni xlilat nila kakgaxmatni (Proverbios 28:9; Santiago 4:3).

Nachuna, Biblia wan: «Lapi wi mpala tu kskiniw, wa lantlata xtalakaskin, wa nakinkakgaxmatniyan» (1 Juan 5:14). ¿Wamputun uma pi Dios tunkun kamaxki putum tuku skinikgo kskujnin? Nichuna. Kalichuwinaw xlakata apóstol Pablo, tiku makgtutu tasaskinilh pi xmapanunilh tuku “ksakgali kxtiyatliwa” (2 Corintios 12:7, 8). Max xkgalhi lu nitlan tajatat kxlakgastapu. ¡Max lu nitlan xlimakgkatsi, maski Pablo xkamapaksanit amakgapitsi chu asta wi tiku xmalakastakwaninit, nila xakstu xmapaksakan! (Hechos 19:11, 12; 20:9, 10.) Maski ni kgalhtika xʼoración chuna la xlakaskin, Pablo xatapaxuwan makgamakglhtinalh xtakgalhtin Dios (2 Corintios 12:9, 10).

Xlikana, makgapitsi tiku kalichuwinan Biblia xʼakxilhkgo la xkakgalhtikan xʼoracioneskan (2 Reyes 20:1-7). Pero ama kilhtamaku, kaj lakgachunin chuna xla. Makgapitsi kskujnin na xlilakgaputsakgo akxni xʼakxilhkgo pi Dios ni xkakgalhti xʼoracioneskan. Mapakgsina David na nitlan xlimakgkatsi chu wa: «Kintikukan Dios, ¿asta xniku nakimakgtayaya? ¿Pimpat kiʼakgtsonkgswaya wakg kilhtamaku?» (Salmo 13:1). Pero, akxni akxilhli pi Jehová makglhuwata xmakgtayanit, tlakg lipawa. Antiya kʼuma oración, David wa: «Pero akit klipawanan, y kkatsi xlakata kanikxniwa kilakgalhamana» (Salmo 13:5). Chuna la David, xkakninanin Dios xala uku max natalakaskin chuntiya natlawanikgo oración Dios xlakata nakakgalhti (Romanos 12:12).

Kinkamaxkiyan tuku xlikana maklakaskinaw.

Maski chatum tlat lu kapaxki xkamanan ni wamputun pi putum kilhtamaku nakamaxki akxni wi tuku kaskinikgo. Nachuna, Dios ni kinkakgalhtiyan chuna la lakpuwanaw o akxni lakaskinaw. Pero akinin liwana katsiyaw pi xla la chatum Tlat xapaxkina, tiku kinkamaxkiyan tuku xlikana maklakaskinaw akxni akxilha pi lakgchanita kilhtamaku chu chuna xlilat (Lucas 11:11-13).

Tanu tanu la kinkakgalhtiyan Dios kioracionkan.

¿Pero komo lakaskinaw pi kasputli akgtum taʼakglhuwit nema kgalhiyaw? ¿Nalakpuwanaw pi xlakata nitu akxilhmaw xtakgalhtin, wamputun pi nitu kinkakgalhtiman? Wata kuenta kilitlawatkan komo tanu la kinkakgalhtin Dios. Akgtum liʼakxilhtit, max kinkamakgtayan chatum amigo akxni maklakaskiw (Proverbios 17:17). ¿Wa Jehová tiku maklakaskilh uma amigo xlakata xkinkamakgtayan? Nachuna, Dios kinkalikgalhtiyan Biblia tuku skiniyaw kkioracionkan. Max kinkamasiyanin tuku natlawayaw xlakata natayaniyaw tuku titaxtumaw (2 Timoteo 3:16, 17).

Dios ni kamakglhti xtaʼakglhuwitkan kskujnin, pero kamaxki litliwakga xlakata tlan natayanikgo (2 Corintios 4:7). Akgtum liʼakxilhtit, akxni Jesús tasaskinilh pi xmapanunilh tuku nitlan xʼama titaxtu, lakpuwa pi nitlan xʼamaka lichuwinankan xtukuwani Dios. Wa xlakata Jehová malakgachanilh chatum ángel xlakata xmatliwakglhli (Lucas 22:42, 43). Nachuna, Dios tlan namaklakaskin chatum amigo xlakata nakinkawaniyan tuku nakinkalimatliwakglhan akxni tlakg namaklakaskinaw (Proverbios 12:25). Xlakata ni akxilhaw la kinkakgalhtiyan, kuenta kilitlawatkan la nakinkakgalhtiyan.

Namin kilhtamaku nakgalhkgalhiyaw akxni nakinkakgalhtiyan.

Biblia wan pi Dios tiku kgalhi putum litliwakga lakgalhaman tiku tataktuju «akxni xkilhtamaku nawan» (1 Pedro 5:6). Komo akxilhaw pi ni lakapala kinkakgalhtiyan tuku skiniw, ni nalakpuwanaw pi Jehová ni kinkamakgtayaputunan. Xlakata Jehová lu lanka chu tlakg katsi tuku nakinkamakgtayayan, wa tiku tlakg tlan naʼakxilha komo tlan o nitlan tuku skimaw.

Kalakpuwanti pi kgalhiya chatum minkgawasa tiku naskiniyan akgtum bicicleta. ¿Tunkun xtamawani? Komo akxilha pi nina kuenta la matlawani, max nalakpuwana pi tlakg tlan alistalh natamawaniya. Max natamawaniya akxni naʼakxilha pi nitu katililanilh. Nachuna, Dios tlan nakinkamaxkiyan tuku lakaskin kinakujkan akxni nalakgchan kilhtamaku komo chuntiya natlawayaw oración (Salmo 37:4).

Biblia kawani kstalaninanin Cristo pi chuntiya kalipawankgolh oración xlakata nakamakgtaya. Max wi tiku nawan: «Tlakg ni tuwa wankan nixawa tlawakan». Xlikana, komo ni sputa taʼakglhuwit nema kgalhiyaw o titaxtuyaw tuku nitlan, max wa xlakata nalakpuwanaw pi Dios ni kintikakgalhtin. Pero maski chuna, kililakapastakatkan pi Jesús masiyalh pi chuntiya natlawayaw oración.

 Jesús lichuwinalh chatum puskat tiku xninita xchixku chu nitu xkgalhi, tiku makglhuwa lakgalh chatum juez xlakata xmakgtayalh (Lucas 18:1-3). Maski juez xapulana ni makgtayalh, pero alistalh lakpuwa: «Wata xatlan nakmakgtayay lakimpi chuna nialh namin kimakglhuwiy, chu taji nakimakchichijuwiy» (Lucas 18:4, 5). Tachuwin «kimakglhuwiy» na watiya wamputun «tampikgaxikan lakgastapu», chu kilhchanima «tlawakan pi nitlan nalichuwinankan achatum». * Komo asta chatum juez tiku nitlan likatsi makgtayalh puskat tiku nitu xkgalhi chu xninita xchixku kaj xlakata ni xlakaskin nitlan xlichuwinanka, kiDioskan tiku xapaxkina tlakg nakamakgtaya tiku «xakgatlilakankgoy ntantaku tantaskaka». Chuna la wa Jesús, Dios «lakapala namakgtayakgoy» (Lucas 18:6-8).

Maski namin kilhtamaku nialh naskiniputunaw tamakgtay Dios, ni kataxlajwaniw. Komo chuntiya natlawayaw oración nalimasiyayaw pi xlikana lakaskinaw pi kakinkakgalhtin. Nakatsiniyaw akxilhaw la kinkakgalhtiyan chu namakgkatsiyaw pi tlakg lakgtalakatsuwinitaw. Chuna, tlan nalipawanaw pi Jehová nakinkakgalhtiyan kioracioneskan komo nalimasiyayaw takanajla chu chuna natlawayaw la lakaskin (Lucas 11:9).