Akxni klakachilh, kinatlatni xkgalhikgo niku xkuentajtlawakgo animales anta kGalicia, kxnoreste España. Kinkgalhtsayankan xakwanitaw chu akit xlikgalhtati. Lu xʼanan tapaxuwan kkinchik. Ama kilhtamaku, xtalismani pi chatum xalak familia xtanulh kʼakgtum seminario o kconvento. Kkifamiliajkan, kinkgalhtutukan chuna ktlawaw.

Akxni kiʼakgkututu xakwanit, na kalh kconvento xalak Madrid niku xwi kintala tsumat. Kʼuma convento lu nitlan xlikatsikan. Niti xlatalalin, kaj limapakgsin xʼanan, oración chu nitu nakgalhiya. Lu tsisa, xaktamakxtumiyaw kʼakgtum capilla xlakata wi tuku xaklilakapastakwi, lu lakapala ni kuenta xaktlawa. Alistalh xakkilhtliyaw tatlin xla takanajla chu xakanaw kmisa nema klatin xtatlawa. Ni xakʼakgatekgsa chu xakmakgkatsi pi Dios lu makgat xwi. Nitu xla kkilatamat chuna la xtitaxtutilha kilhtamaku. Akxni xakakxilha kintala tsumat kajwatiya xaklawaniyaw: «Ave María purisama». Kaj itat hora xkinkamaxkikanan naklatachuwinanaw akxni xakwayankgonitawa. ¡Kkinchik tlakg xʼanan tapaxuwan! Xakmakgkatsi pi kiʼakstu xakwi chu xaktasa putum kilhtamaku.

Maski nikxni kmakgkatsilh pi lakatsu xwi Dios, akxni xakkgalhi akgkutujun kata monja klitaxtulh. Xlikana wa ktlawalh tuku xlakaskinkan naktlawa pero ktsukulh lakpuwan komo xlikana monja nakwamputun. ¡Monjas xkinkawanikgoyan pi tiku chuna xlakpuwankgolh kpupatin xʼamaka kamalakgachakan! Pero uma nila xakmaxtu kkintalakapastakni. Akit xakkatsi pi Jesucristo ni xkatamakgatlini amakgapitsin, wata putum kilhtamaku xkamasiyani chu xkamakgtaya latamanin (Mateo 4:23-25). Akxni xakkgalhi akgpuxam kata nialh monja xaklitaxtuputun. Nila xakkanajla akxni madre superiora kiwanilh pi komo nialh monja xakwamputun, kiwanilh pi tunkun xaktaxtulh kconvento, wa xlakata tunkun ktaxtulh. Max xpekuan pi amakgapitsi monjas nachuna xlakpuwankgolh.

Akxni ktaspitli kkinchik, tlan kimakgamakglhtinankgolh kinatlatni, pero xlakata ni xʼanan taskujut anta kkinkachikinkan kalh kʼAlemania niku xwi kintala kgawasa. Xla xkamakgtaya  comunistas españoles tiku xtaxtukgonitancha kxkachikinkan. Lu tlan xakmakgkatsi xlakata akxtum xakkatala tiku xkamakgtayakgo skujnin chu ni xkalakgmakgankgo lakpuskatin. Comunista klitaxtulh chu alistalh ktatamakgaxtokgli tiku na anta xmakgtanuma. Xaklakpuwan pi tlan tuku xaktlawama, xakmakgmasta likgalhtawakga xla comunistas chu xakmakgtlawa marchas.

Titaxtulh kilhtamaku nitlan kmakgkatsipa. Kakxilhli pi comunistas ni xtlawakgo tuku xwankgo. Tuku xaklakpuwan tlakg tatliwakglhli kata 1971 akxni makgapitsi lakgkgawasan lhkuyukgolh consulado xalak España anta Fráncfort, xlakan ni xlakgatikgo la xmapakgsinamaka kʼEspaña. Akit klakpuwa pi nitlan la limasiyakgolh xtasitsikan.

Akxni lakachilh xapulana kinkgawasa, kwanilh kinchixku pi nialh xakama katatamakxtumi comunistas. Lu nitlan klimakgkatsilh xlakata nipara chatum xapulana kiʼamigos kinkalakgapaxialhnankgon, akit chu kiskgata. Akstu xkinkgalhskinkan tuku xlakata lamaw. ¿Xlikana tlan nakamakgtayaputunkan latamanin xlakata tlakg tlan natawilakgo?

Kata 1976, chatiy xtatayananin Jehová xalak España kilakgapaxiʼalhnankgolh kimalakcha chu kimakgxtakgnikgolh makgapitsi likgalhtawakga xalak Biblia. Akxni kilakgapaxialhnamparakgolh, akit ktsukulh katlawani takgalhskinin xlakata tapatin chu akxni tlawakan tuku ni xaʼakgstitum. Lu nila xakkanajla xlakata kilikgalhtikgolh Biblia putum kintakgalhskinin. Tunkun kmakgamakglhtinalh takgalhtawakga xalak Biblia.

Xapulana, akit kaj tlakg xakkatsiputun, pero talakgpalilh kintapuwan akxni akit chu kinchixku ktsukuw kʼanaw kxtamakxtumitkan xtatayananin Jehová. Uma kilhtamaku, chatiy kamanan xakkgalhiyaw. Xtatayananin Jehová xkinkalinkgoyan chu xkinkatakuentajtlawakgoyan kinkamanankan kxtamakxtumitkan. Ktsukulh kapaxki xtatayananin Jehová.

Maski chuna, xwijku tuku ni lu liwana xakkanajla. Akxni kkalakgapaxiʼalhnalh kifamilia tiku xwilakgo kʼEspaña, kinkuku, tiku sacerdote xwanit, kiwanilh pi nialh xakkatakgalhtawakgalh xtatayananin Jehová, pero xtatayananin Jehová xalak España lu kimakgtayakgolh. Kilikgalhtikgolh Biblia putum takgalhskinin nema xakkgalhi, chuna la tlawakgolh xtatayananin Jehová xalak Alemania. Klakpuwa pi xakamapa kgalhtawakga akxni xaktaspitli kkinchik. Maski kinchixku nialh kgalhtawakgaputulh akit ni kmakgxtakgli. Ktamunulh kata 1978, xlakata na xtatayana Jehová xakwa.

Xlakata kkatsi tuku xlikana masiya Biblia kimakgtayanit xlakata nakkatsi tuku xlakata klama chu tuku naktlawa kkilatamat. Akgtum liʼakxilhtit, 1 Pedro 3:1-4 kawani lakpuskatin pi “kalakgachixkuwilikgolh xchixkukan” chu “kamaxkikgolh kakni” chu “xasmalhwa, o natataktuju, xliwanatkan; wa yuma wa ntu lhuwa xtapalh kxlakatin Dios”. Uma chu amakgapitsi textos kimakgtayanit xlakata lu tlan nakkalikatsini kinkamanan chu kinchixku.

Titaxtunit puxamakukitsis kata akxni xtatayana Jehová kwa. Lu kpaxuwa xlakata kskujnanima Dios chu kmakgtapakgsi kʼakgtum familia tiku skujnanikgo Dios chu na kpaxuwa pi kgalhtati kinkamanan na skujnimakgo Jehová chuna la akit.