«LHUWA tuku ktayani pero nila ktayani akxni ktlawaputun tuku nitlan.» Uma tachuwin limasiya tuku wi kxnakujkan latamanin: tlawaputunkgo tuku nitlan. Pero, amakgapitsi makgatlajaputunkgo uma talatlawana tiku ni kinkamakgxtakgan. ¿Tuku lakpuwana wix? ¿Natayaniyaw o ni katitayaniw?

Xlikana, ni putum tuku tlawaputunaw limin laklanka taʼakglhuwit. Akgtum liʼakxilhtit, komo tlakg nawaya galletas, ni katikatlawanikgolh tuku nitlan amakgapitsin. Pero akxni namastaya talakaskin pi wi tuku natlawaya, la talakgxtumit xalimaxana, limin laklanka taʼakglhuwit. Biblia kinkawaniyan kProverbios 6:32, 33 wan pi xatonto tiku tlawa talakgxtumit xalimaxana chu laktlawama xlatamat.

¿Tuku militlawat komo kaj xalan xlitsakgsaka talakgxtumit xalimaxana? Biblia kgalhtinan: «Wa xtalakaskin Dios mpi xasantujlanin nawanatit kmilatamatkan, mpi natamakgatliniyatit ntamakgwan, [o talakgxtumit xalimaxana]. Chatunu wixin wantu lakatitum kaputsalh xpuskat, ni anan takgaman» (1 Tesalonicenses 4:3, 4). ¿La natlawaya xlakata natayaniya? Kaʼakxilhwi pulaktutu tuku nakinkamakgtayayan.

Akxni akxilhaw tiku ni lhakganankgonit tlakg tlawaputunaw tuku nitlan. Jesús lichuwinalh la tatalakxtumi xlakata tuku akxilhaw chu tuku tlawaputunaw, xla wa: «Kit kkawaniyan mpi kaxati kawa nti lakaniy nchatum mpuskat nitlan ntu nalakapastakniy,  akxnitiya tunkan nkgalhilh ntalakgalhin». Chu wa uma tuku limaklakaskilh akxni mastalh tastakyaw: «Lapi wa milakgastapu kmimpakgstakat mpala xmalakatijinin, kamaxtu, kamakganti» (Mateo 5:28, 29). ¿Tuku xwamputun Jesús? Xlakata natayaniyaw tuku nitlan, talakaskin liwana nalakpuwanaw pi namakgxtakgaw chu nialh naʼakxilhaw.

Kawiliw liʼakxilhtit. Kalakpuwanti pi akxilhpat la slamamaka likan. ¿Chuntiya xʼakxilhti? Xlikana pi ni; tunkun natalakapanuya o wi tuku nalikuentajtlawaya milakgastapu. Nachuna, komo wi niku natasiya tiku ni lhakganankgonit, kmaktum likgalhtawakga, kmincomputadora o wi tiku chuna naʼakxilha, tunkun katalakapanu. Kuenta katlawa mintalakapastakni. Juan tiku xʼakxilha tiku ni lhakganankgonit wan: «Akxni kakxilha chatum puskat tiku stlan tasiya, makglhuwa klakglakamputumpara; pero fuerza ktlawa xlakata alakatanu naklakan chu kiʼakstu kiwanikan: “¡Katlawani oración Jehová! ¡Tunkun katlawa oración!”. Akxni ktlawakgo oración, nialh chuna kmakgkatsi» (Mateo 6:9, 13; 1 Corintios 10:13).

Kalichuwinaw Job tiku ni xmakgatsankganani Dios, tiku wa: «Kkatalakkaxlanit kilakgastapu. Wa xlakata, ¿tuku xlakata naklakpuwani tuku nitlan tiku kajku tsumat?» (Job 31:1). Nachuna katlawa la Job.

Kalitsakgsa uma: Komo kaj xamakgtum natasiya tiku ni lhakganankgonit, tunkun katalakapanu. Katlawa chuna la wa kxʼoración tiku tsokgli Biblia: «Kakimakgtaya xlakata kilakgastapu ni nalakani [o naʼakxilha] tu nitu limakwan» (Salmo 119:37).

Xlakata kimputumkan kgalhiyaw talakgalhin, namin kilhtamaku natlawaputunaw tuku nitlan. Biblia kinkawaniyan: «Wampi chatunu litatokglhnit watu watiya xtaxkgonalakankan liʼakgskgawiliyankgo nkalawaj tayat. Wa ntaxkgonalakan; akxni wintu likilhtsukunit, talakgalhin nkitaxtuniy» (Santiago 1:14, 15). ¿La natlawayaw xlakata ni naʼakxilhaw uma tuku nitlan?

Akxni namin kmintalakapastakni tuku nitlan, kalakapastakti pi wix katsiya tuku militlawat. Ni kamakgatlajan. Kamaxtu kmintalakapastakni. Ni kamasta talakaskin pi namin kmintalakapastakni  talakgxtumit xalimaxana. Tomás, tiku lu xlakgati xakxilha tiku ni lhakganankgonit kʼInternet, wan: «Xakliskuja xlakata xakmaxtulh kkintalakapastakni tuku nitlan chu wa xaklakapastaka tuku tlan. Lu tuwa kmakgkatsilh. Asta makglhuwa kakxilhpa. Pero tsinu tsinu ktsukulh machokgo kintalakapastakni». Elsa, akxni kajku tsumat xwanit ni mastalh talakaskin pi xtlawalh tuku nitlan, xla lakapastaka: «Kimakgtayalh ni xaklakpuwa tuku nitlan xlakata putum kilhtamaku wi tuku xakliskuja chu xaktlawani oración Jehová».

Kalitsakgsa uma: Akxni namin kmintalakapastakni talakgxtumit xalimaxana, tunkun katlawa oración. Kalakpuwanti «xlipaks wa lantlata talulokgtat [o xaxlikana], chu xlipaks wantu nkgalhi nkakni, chu xlipaks wa lantlata xlilat, chu xlipaks wantu xakgstitum, chu xlipaks wa lantlata tapaxkin, chu xlipaks wa lantlata kgalhi xlakgasi, lapi anan akgtum mpala tu lipaxkatsinit, su mpala akgtum ntu xlilat» (Filipenses 4:8).

Akxni tlawaputuna tuku nitlan, wi tuku litsakgsakana chu tlan natlawaya, matlawinan talakgalhin (Proverbios 7:6-23). ¿La natlawaya xlakata ni chuna naʼakgspulayan?

Biblia kinkamaxkiyan lu tlan tastakyaw: «Skgalala tiku tatsekga akxni akxilha tuku nitlan, pero tiku xalak tonto ni tachokgokgo chu alistalh lipatinankgo» (Proverbios 22:3). Wa xlakata, kuenta katlawa tuku tlawaya. Nachuna, pulana kalakpuwanti tuku max naliminiyan taʼakglhuwit chu ni katlawa (Proverbios 7:25). Felipe nialh akxilhli tiku ni lhakganankgonit. Xla wan: «Kwililh computadora niku putum xʼakxilhkgoka chu kwilinilh Internet akgtum programa nema xmalakgachokgolh tuku nitlan. Kmaklakaskin Internet akxni ni kiʼakstu kwi». Tomás tiku lichuwinaw xapulana, wan: «Ni kakxilha películas nema nakimalakpuwani tuku nitlan chu ni kkatalalin tiku lu lixkajni lichuwinankgo xlakata talakgxtumit. Kuenta ktlawa xlakata nialh chuna nakiʼakgspulapara».

Kalitsakgsa uma: Liwana kaʼakxilhti tuku max namaxlajwaniyan chu liwana kalakpuwanti la nalakgmakgana tuku namatlawiputunan nema nitlan (Mateo 6:13).

¿Chu komo xtlawa tuku nitlan maski liskujpat? Ni kataxlajwani chu ni chuntiya katamakgxtakgti. Biblia wan: «Tiku xaʼakgstitum max asta makgtujun nalhtuja, o natapukta, pero xlikana natakipara» (Proverbios 24:16). Xlikana, kinTlatkan xalak akgapun kinkawaniyan pi katakiparaw. ¿Namakgamakglhtinana xtamakgtay? Wa xlakata chuntiya katlawa oración chu kalikgalhtawakga xTachuwin Dios xlakata nalimatliwakglha mintakanajla. Tamakxtumit namakgtayayan xlakata namakgantaxtiya tuku natlawaputuna. Kalakapastakti tuku wanit Dios: «Xlikana akit nakmatliwakglhan. Lu xlikana akit nakmakgtayayan» (Isaías 41:10).

Carlos tiku lichuwinaw xapulana, wan: «Tuwa kmakgkatsilh xlakata nialh xakakxilhli tiku ni lhakganankgonit. Makglhuwa xakakxilhputumpara pero xlakata kimakgtayalh Jehová, kmakgxtakgli». Dylan, tiku na lichuwinaw xapulana, wan: «Tlan xaktatalakgxtumilh tiku xaktaskuja, pero kwanilh pi ni. Lu tlan kmakgkatsi xlakata tlan wi kintalakapastakni. Chu tuku tlakg xlakaskinka, kkatsi pi kmakgapaxuwalh Jehová».

Komo wix natayaniya chu ni natlawaya tuku nitlan, na namakgapaxuwaya Jehová (Proverbios 27:11).