¿TIKU xwanit Thomas Emlyn? ¿Tuku xlakata lu tatayalh xaxlikana? ¿Tuku kinkamasiyaniyan xlatamat?

Xlakata tlan nakakgalhtiyaw umakgolh takgalhskinin, talakaskin nalichuwinanaw akxni ksputmaja siglo XVII chu akxni xtsukuma siglo XVIII anta kʼInglaterra chu kʼIrlanda. Takanajla xalak Inglaterra, tiku lu xkgalhi limapakgsin, chu lhuwa latamanin chu protestantes ni xlaʼakxilhputunkgo.

Thomas Emlyn lakachilh 27 xla mayo kata 1663, kStamford (Lincolnshire, Inglaterra). Akxni xkgalhi akgkunajatsa kata, mastalh xapulana xtaʼakgchuwin xalak Biblia. Alistalh, xcapellán condesa litaxtulh tiku xwi kLondres; chu alistalh alh kBelfast (Irlanda).

Kʼuma kachikin tsukulh masta xtaʼakgchuwin kʼakgtum parroquia chu na mastalh taʼakgchuwin kʼalakatanu kachikin, la kDublín.

Ama kata Emlyn liwana likgalhtawakgalh Biblia, uma tlawalh pi nialh lu xkanajlalh Trinidad. Xlakata liwana likgalhtawakgalh Evangelio uma tlawalh pi xtalakgpalilh tuku xkanajla.

Maski Emlyn ni tunkun wa tuku xkatsininit, makgapitsi tiku xʼankgo kparroquia niku xʼakgchuwinan, kDublín, akxilhkgolh pi ni xlichuwinan Trinidad. Xlakata xkatsi pi nitlan xʼakxilhka tuku xkatsininit, tsokgli: «Nialh la ktitlawalh uma taskujut, komo nakwan tuku kkanajla». Junio kata 1702, chatiy xcompañeros kgalhskinkgolh tuku xlakata nialh xlichuwinan Trinidad. Kakgalhtilh pi nialh xkanajla chu makgxtakgli taskujut tuku xlakgaya.

Ni lhuwa kilhtamaku titaxtulh alh kʼInglaterra, pero, titaxtulh akgkaw semanas taspitpa kDublín xlakata wi tuku xʼama lakkaxtlawa chu xlakata antiya xlatamalh kLondres. Akxni anta xlama tlawalh maktum tatsokgni niku xlichuwinan xtakanajla chu xlimasiya Biblia pi Jesús ni xtachuna Dios tiku tlakg Lanka. Uma tlawalh pi lu ksitsikgolh tiku na anta xmakgtapakgsikgo kcongregación xalak Dublín, tiku wankgolh pi nitlan tuku xtlawama Emlyn.

Kata 1703, 14 xla junio, Emlyn tamaknuka kpulachin chu linka kxlakatin mapakgsinanin xalak Dublín. Kxtatsokgni True Narrative of the Proceedings (La historia verdadera del juicio) wa pi nitlan tuku limawakaka «xlakata makgapitsi wankgolh pi nitlan tuku xtlawama akxni tsokgli maktum libro, niku xwan pi Jesús ni xtachuna xwanit Dios tiku xaTlat». Nitlan tuku tlawaka akxni talakkaxlaka: anta niku xwi juez tawilakgolh kgalhtujun obispos xalak Irlanda chu Emlyn ni maxkika talakaskin nachuwinan.  Richard Levins, tiku xlakaskinka abogado xwanit, wanilh Emlyn pi xʼama «putsastalani la tantum lobo chu ni xʼama majaxa». Akxni sputli juicio, Richard Pyne, tiku xpulalin tribunal, kawanilh jurados pi xlakapastakkgolh pi «anta xwilakgolh obispos», max xkamalakpuwaniputun pi xkamalakgaxokgeka komo ni xtlawakgolh tuku xlakaskinkgo obispos.

Emlyn wanika pi xʼamaka tamaknukan kpulachin, wa xlakata chatum puxku wanilh pi xlakgpalilh xtapuwan. Emlyn ni lakaskilh, wa xlakata tamaknuka akgtum kata kpulachin. Xlakata ni xkgalhi tumin, akgtiy kata tanulh kpulachin, tamakxtuka akxni chatum xʼamigo kawanilh mapakgsinanin pi ni lu tapalaxla xmatajika. Emlyn taxtulh kpulachin 21 xla julio kata 1705. Xlakata nitlan tuku tlawanika tsokgli tachuwin nema wi xapulana: «Klipatinama tuku akit klakpuwan pi xaxlikana chu xlilanka Dios».

Emlyn alh kLondres. Anta lu tlan talalilh William Whiston, atanu tiku na xlakputsanani Biblia chu na ni xakxilhputunkan, xlakata xlichuwinan tuku xlakpuwan pi xaxlikana xlakata Biblia. Whiston xmaxki kakni Emlyn chu «limapakuwilh xapulana chu tiku tlakg xlichuwinan tuku masiyalh Cristo».

Chuna la William Whiston chu atanu tiku na lu lakgapaskan wa Isaac Newton, Emlyn tekgsli pi Biblia ni tataya Trinidad nema masiya Credo Atanasiano. Tsokgli: «Akxni lhuwa klakpuwa chu liwana klikgalhtawakgalh Biblia, [...] ktekgsnit tuku lu kimakgtaya [...] nema lakgpalilh kintapuwan xlakata Trinidad». Wa pi «Dios, tiku xTlat Jesucristo wa tiku Tlakg Lanka».

¿Tuku xlakata Emlyn chuna lakpuwa? Xlakata tekgsli lhuwa textos niku lichuwinan pi Jesús ni xtachuna xTlat. Umakgolh kaj makgapitsi liʼakxilhtit (tuku lichuwinalh Emlyn xlakata versículos kxacursivas wilakgolh):

•  Juan 17:3. «Nikxni talichuwinan pi Cristo Dios o wa tiku kaj xakstu Dios.» Kajwatiya xaTlat wankan pi «Dios, talulokgtat», o xaxlikana.

•  Juan 5:30. «Xakgawasa ni tlawa xtalakaskin, wata wa tlawa xtalakaskin xaTlat.»

•  Juan 5:26. «Xtlat maxkilh latamat xKgawasa.»

•  Efesios 1:3. «Maski lakgachunin wankan pi Jesucristo wa xKgawasa Dios, ni niku tekgsaw pi xaTlat wa xTlat Dios; wata wakan pi xTlat kimalanakan Jesús.»

Akxni Emlyn liwana akxilhli tuku wan Biblia, liwana wa: «Ni anan akgtum texto xalak Biblia nema nakinkamalakpuwaniyan pi xaTlat, xaKgawasa chu Espíritu Santo kaj chatum».

La uku, lhuwa latamanin pekuankgo natatayakgo tuku masiya Biblia. Pero Emlyn tatayalh tuku xlikana masiya Biblia. Xla tlawalh takgalhskinin: «Komo chatum chixku ni masiya tuku xaxlikana nema tlakg xlakaskinka nema tekgsnit kBiblia, ¿tuku litaxtu maski nalikgalhtawakga chu liwana nalakputsanani?». Ni xmatsekgputun tuku xaxlikana.

Tuku tlawalh Emlyn chu amakgapitsi, kinkamakgtayayan xlakata nalakpuwanaw komo na natatayayaw tuku xaxlikana maski amakgapitsi ni kintikaʼakxilhputunkgon. Kakinkakgalhskinkan: «¿Tuku tlakg xlakaskinka? ¿Lakaskinaw pi tlan kakinkaʼakxilhkgon amakgapitsin, o tatayaputunaw tuku xaxlikana nema masiya xTachuwin Dios?».