Kxtamapakgsin Roma, lhuwa skujnin kaliminkancha kkachikinin niku xkaʼakgchipakgonit o kaj xafuerza xkachipakanit. Tiku xkachipakanit xkastakan chu nialh xkaʼakxilhparakgo xfamiliajkan.

Tiku xkamaskujukan kkapukuxtun chu kchiki tlakg tlan xkakitaxtuni; amakgapitsi skujnin xkamaskujukan niku xmaxtukan minas asta akxni xnikgo. Xmalana chatum skujni xpixmawaka likan niku xwan pi komo kaj tsalanit wi tuku xʼamaka maxkikan tiku xmaspitli. Tiku makglhuwata xtsalakgonit xkamuwilikan akgtum F xla fugitivus (kaj tsalanit).

Kxlibro Filemón apóstol Pablo lichuwinalh chatum skujni tiku xtsalanit xwanikan Onésimo, chu wan pi malakgachapa niku xwi xmalana, Filemón. Maski tlan xmalakgaxokgelh kskujni xlakata xtsalanit, Pablo wanilh Filemón pi lu tlan xmakgamakglhtinalh chu xpaxkilh (Filemón 10, 11, 15-18).

Fenicia anta xwi niku la uku wi Líbano, xlilakgapaskan xlakata xʼanan xaspinini tiria, tiku alistalh limapakuwika Tiro. Mapakgsina Salomón xala makgan kachikin Israel likaxtlawalh templo «xaspinini lana» nema xtlawakgonit xalak Tiro (2 Crónicas 2:13, 14).

Xaspinini tiria lu tapalaxla xwanit, xlakata lhuwa kilhtamaku xlitlawakan. Pulana, xmastokgkan conchas xla Murex; * nema lhuwa xkamakutukan kpupunu, xlimaklakaskinkan akgkutiy mil xlakata xlitlawaka kaj maktum lhakgat. Alistalh, umakgolh caracoles xkamakglhtikan xconchas xlakata tlan xmaklakaskinka tuku xpulaktanumakgolh. Xtatlawakan matsat chu akgtutu kilhtamaku xwilikan kkachichini. Alistalh xmujukan ktanque niku takgalhtalanit chu akglhuwa kilhtamaku xlimapupikan chuchut xalak pupunu.

Akglhuwata ciento kata, fenicios kstakgo chu xlakata xkaʼakgchipakgo amakgapitsi kachikinin xkamakgtaya xlakata chuntiya kstakgolh xaspinini tiria chu xlakata na xtlawakgolh. Tuku xtlawakgonit katekgskanit lakatsu kmar Mediterraneo chu kʼoeste niku wi Cádiz (España).