Kimputumkan lakpuwanaw xlakata kilhtamaku nema aku mima. Kinkakgalhskinkanan kilatamatkan la nalatamayaw chu la nalatamakgo tiku kapaxkiyaw: «¿Tlakg xatlan kilhtamaku niku nalatamakgo kinkamanan? ¿Namasputukan Katiyatni? ¿Wi tuku tlan naktlawa xlakata tlakg tlan naklatama kilhtamaku nema aku mima?». Xlikana katsiputunaw xtakgalhtin, xlakata tlan makgkatsiputunaw, ni pekuamputunaw chu tlan latamaputunaw. Komo xkatsiw tuku nala kilhtamaku nema aku mima, tlan skgalalh xtawilaw xlakata tlan xtayaniw.

Wa xlakata, ¿tuku kinkakgalhkgalhiman kkilhtamaku nema aku mima? ¿Wi tiku katsi? Tiku wankgo tuku aku nala, minit kilhtamaku kgantaxtukgonit tuku lichuwinankgolh, pero nachuna lhuwa ni kgantaxtunit. Pero wankan pi Dios, nakgantaxtu putum tuku lichuwinan. Biblia, wan pi «lichuwinan tuku nala akxni wi tuku kgalhsputa, chu makgasata lichuwinanit tuku nina tatlawa» (Isaías 46:10). ¿Lhuwa kgantaxtunit tuku lichuwinanit?

¿Kilikatsitkan la xlilhuwa kgantaxtunit tuku xlichuwinanit Dios makgasata? Komo makglhuwata kgantaxtunit tuku lichuwinanit chatum meteorólogo, ¿xkanajla tuku xwanin? ¿Xkgaxpatni tuku xlichuwinalh pi nala lichali? Max xkgaxpatni. Nachuna, komo xkatsiw pi kgantaxtulh tuku lichuwinalh Dios, xlikana pi xkatsiputuw tuku lichuwinanit pi nala kilhtamaku nema aku mima.

MASPUTUKA AKGTUM KACHIKIN: Komo wi tiku xlichuwinalh pi namasputukan akgtum kachikin nema akglhuwata kata kgalhinit litliwakga, xlikana pi uma pi lu kaks xkinkamalakawanin.

Dios maklakaskilh chatum xpalakachuwina xlakata xlichuwinalh  pi xʼamaka masputukan Nínive (Sofonías 2:13-15). ¿Kgantaxtulh tuku lichuwinalh? ¿Tuku wankgo tiku lichuwinankgo tuku lanit? Ksiglo VII akxni nina xmin Jesús, max akgkukitsis kata titaxtulh akxni kgantaxtulh tuku xwankanit, babilonios chu medos masputukgolh Nínive. Dios xwanit pi uma kachikin «kaskakni nawan chuna la desierto». Maski kachikin chu tiyat nema xlistili xkgalhi 518 kilómetros, tiku akgchipakgolh, wata putum masputukgolh chuna la xlichuwinankanit. ¿Tiku lichuwinan política tlan xkgantaxtulh putum tuku xlichuwinalh?

«KMINKGALHNI NAKALHKUYU XLUKUTKAN LAKCHIXKUWIN»: ¿Tiku tlan nalichuwinan tuku nala akgtutu ciento kata, xlakata chatum chixku nalhkuyu xlukut latamanin pumakamastan, chuna la xtukuwani chu familia niku xʼama minacha chu kachikin niku xʼama tawila ama pumakamastan?

Komo xlichuwinanka nema nitu xtachuna la uma chu xkgantaxtulh, lu lhuwa xlichuwinanka tiku chuna wa. Xpalakachuwina Dios wa pi kxfamilia mapakgsina David xʼama min, tiku xʼamaka wanikan Josías, xʼama lhkuyu xlukutkan lakchixkuwin pumakamastan kkachikin wanikan Betel (1 Reyes 13:1, 2). Titaxtulh akgtutu ciento kata mapakgsina tlawaka chatum xalak xfamilia David wanikan Josías, uma tukuwani ni lu xtalakgapasa ama kilhtamaku. Chuna la xtalichuwinanit «limapakgsinalh pi xkamakutuka lukut chu kalhkuyulh kpumakamastan» nema xwi Betel (2 Reyes 23:14-16). ¿Wi tuku tlan xwa chatum lataman chu liwana xkgantaxtulh komo ni xmakgtayalh tiku tlakg katsi?

MASPUTUKAN AKGTUM LANKA KACHIKIN: Komo wi tiku xlichuwinalh pi chatum tiku nina lakachin naakgchipa akgtum lu xlakaskinka kachikin nema anan, chu la xʼama tlawa, ¿ni xlikana pi lu kaks xlilakawaw?

Wa uma tuku tlawalh Dios: lichuwinalh pi chatum chixku wanikan Ciro xʼama akgchipa ama kachikin. Nachuna wa pi xʼama kalakgmaxtu judíos tiku skujnin xkatlawakanit chu xkamakgtayalh natlawakan xasanto xtemplo Dios. Nachuna,  xlakata tlan xʼakgchipalh kachikin chu la xʼama tlawa, Ciro xmaskakalh chuchut chu xmalakcha xʼama talakkitaya (Isaías 44:27–45:2). ¿Putum kgantaxtulh tuku xlichuwinankanit? Tiku lichuwinankgo tuku lanita wankgo pi Ciro akgchipalh Babilonia, chu malakgsputuka lanka kachikin. Xlakata chuna xkitaxtulh tlawalh pi chuchut alakatanu niku alh nema xpulaktsala kachikin. Chu xlakkiya xmalakcha kachikin, chu soldados anta laktanukgolh. Alistalh Ciro kamakgxtakgli judíos chu limapakgsinalh pi xkaxtlawaparaka templo kJerusalén. Lu nila tamakanajla uma xlakata Ciro nipara skujni xDioskan judíos (Esdras 1:1-3). ¿Tiku xtachuna la Dios tuku xlichuwinalh chu liwana kgantaxtulh?

Uma kaj akgtutu liʼakxilhtit nema xlikana kgantaxtulh tuku lichuwinalh Dios. Lhuwa lakgapaskgokan uma tuku kitaxtunit. Josué tiku xkapulalin israelitas kawanilh tuku xlakan xkatsikgoya: «Wixin liwana katsiyatit xliputum minakujkan chu xliputum milatamatkan pi ni anan tachuwin xliputum xalakwan tachuwin wantuku kawaninitan Jehová miDioskan nema ni kgantaxtunit. Putum kgantaxtukgonit mimpalakatakan. Ni anan tachuwin nema ni kgantaxtunit» (Josué 23:1, 2, 14). Chuna, israelitas xkatsikgo pi xtamalaknun Dios chu tuku wan pi nala kgantaxtukgo. ¿Tuku xlakata putum kgantaxtu tuku lichuwinan? Xlakata Jehová ni chuna likatsi la likatsikgo latamanin. Lu xlakaskinka nakatsiyaw uma, xlakata makgapitsin nema lichuwinanit Dios nema nina kgantaxtunit nalakgpali kilatamatkan putum kilhtamaku.

Tuku lichuwinankgo latamanin pi nala anta kilhtikgo kciencia, la talakgpali tuku anan chu litliwakga nema akxilhkgo. Chu alistalh kgalhkgalhikgo xlakata naʼakxilhkgo tuku nala (Proverbios 27:1).

Dios putum katsi ni xtachuna la latamanin. Xla liwana kinkalakgapasan chu tuku tlawaputunaw. Wa xlakata akxni nalakaskin, tlan nakatsi la nalikatsikgo latamanin o kachikinin. Pero Dios wi atanu tuku na tlan tlawa: tlan nalakgpali tuku talakaskin xlakata namakgantaxti tuku lakaskin. «Chuna nakitaxtu kintachuwin nema taxtu kkinkilhni. Ni katitaspitli komo ni nakgantaxtu, [...;] chuna nakitaxtu» (Isaías 55:11). Lakgachunin Dios kaj masta tamakatsinin xlakata tuku natlawa kilhtamaku nema aku mima. Chu tlawa pi putum nakgantaxtu.

¿Wi tuku tlan nalipawanaw xlakata nakatsiyaw la nakinkakitaxtuniyan kilatamatkan chu xla kifamiliajkan kilhtamaku nema aku mima? Komo xkatsiw pi talakatsuwima tuku masputunan, max xlakkaxwiliw tuku tlan natlawayaw, nachuna tlan natlawayaw xlakata tuku lichuwinan Biblia. Dios lichuwinanit pi lhuwa tuku natalakgpali kilhtamaku nema aku mima, chu ni tatalakxtumi tuku wankgo latamanin tiku lichuwinankgo tuku nala. (Kaʼakxilhti niku wan « Tuku wan Dios xlakata kilhtamaku nema aku mima».)

Anta kBiblia klakalhuwa niku lichuwinan xlakata tuku nakaʼakgspula latamanin chu tlan nakatsiyaw. Dios wan pi wa tiku «lichuwinan tuku nala akxni wi tuku kgalhsputa, [...] Tiku wan: “Kintastakyaw ni nasputa, chu putum tuku klakgati nakgantaxtu”» (Isaías 46:10). Kimputumkan tlan nalipaxuwayaw kilhtamaku nema aku mima. ¿Katsiputuna tuku uma? Kakakgalhskinti xtatayananin Jehová. Xlakan ni katiwanikgon tuku nala; ni katachuwinankgo espíritus chu na ni kgalhikgo litliwakga. Likgalhtawakgakgo Biblia chu tlan nawanikgoyan tuku natlawa Dios kilhtamaku nema aku mima.