TIKU paxialhnamakgolh xtsinksmakgolha. Xlakgapaxialhnamakgolh kachikin xala makgasa Belén chu xwaputunkgo tuku anta xtlawakan. Chatum akxilhi akgtum restaurante niku xtlawakan felafel, tuku xlimin xatalakgswakga garbanzos, pakglhcha, cebolla chu atanu tuku la katiyanit chu xtamaknunikan xpulaknin tuku xtachuna la chaw xaʼharina nema wanikan pan pita. Uma tuku wakgolh kamaxkiparakgolh litliwakga xlakata chuntiya nalatapulikgo.

Xlakan ni xkatsikgo, pero uma tuku wakgolh lu kamakgtayalh nalilakapastakkgo tuku xtatlawa makgasa. Xtukuwani Belén wamputun «Chiki niku tlawakan Kaxtalanchu», chu akglhuwa milh kata tlawakan kaxtalanchu (Rut 1:22; 2:14). Uma kaxtalanchu nema wanikan pan pita wata anta Belén tlakg xtlawakan.

Titaxtunita max akgtati mil kata, ksur Belén, Sara xpuskat Abrahán, katlawanilh «lakgstilili kaxtalanchu» xkgalhtutukan tiku lakgapaxialhnankgolh (Génesis 18:6). Harina tuku litlawalh xa tlakg tlan xwanit max trigo almidonero o xla cebada. Sara lakalapa tlawalh chu max makchalh kchiwix uma kaxtalanchu (1 Reyes 19:6).

La wan Biblia, xfamilia Abraham xlakkaxtlawa xkaxtalanchu. Xlakata ni kaj lakatum niku xlamakgo, Sara chu skujnin ni xkgalhikgo horno la nema xwilakgolh Ur, niku xkachikinkan xwanit. Nachuna, xmaklakaskinkgo trigo nema xtekgskgo niku xlamakgolh. Lakkaxtlawakan harina lu lhuwa taskujt xlin, xlakata xtalakaskin nalakgswakgakan kmolino.

Titaxtulh akgtati siglo, xLimapakgsin Moisés, xwan pi niti namasta molino komo namasakuanikan tumin, xlakata uma lu kamakgtaya (Deuteronomio 24:6). Chuna, Dios lu xlakaskinka akxilha uma tuku xlilakgswakganankan, komo familia ni xkgalhikgolh ni la xkaxtlawalh xkaxtalanchu. (Kaʼakxilhti recuadro « La xtlawakan kaxtalanchu xalamakgasa».)

Tachuwin kaxtalanchu wilikanit max 350 makglit kBiblia, chu tiku tsokgnankgo xmaklakasnkinkgo xlakata xtamalakxtumi tawa. Lu xlakaskinka xwanit kaxtalanchu. Jesús masiyanilh pi skujnin Dios tlan skinikgo: «Kakinkamaxki nkinchujkan ntu xala chali chali» (Mateo 6:11). Uma wamputun, pi kaxtalanchu kilhchanima tawa. Tuku Jesús wamputulh xlakata tlan skiniyaw Jehová liwat nema maklakaskinaw chali chali chu nalipawanaw pi nakinkamaxkiyan (Salmo 37:25).

Pero, wi atanu tuku tlakg xlakaskinka ni la kaxtalanchu. Jesús wa: «Ni xman wa nkaxtalanchu nkatililatamalh nchixku, wampi wa nalilatamay xlipaks ntachuwin wa ntu wan Dios» (Mateo 4:4). Jesús xlichuwinama kilhtamaku akxni xlamakgolh israelitas, xtinikgolh komo Dios nitu xtitlawalh. Uma tsukukgolh akxni ni lhuwa kilhtamaku xtaxtukgonit kʼEgipto. Xlinkgo akgtum papaʼ kdesierto Sinaí, chu tuku xlinkgo xmakgasputmakgolha. Xlakkpuwamakgolh pi xʼama tsinksnikgo, tsukukgolh nitlan chuwinankgo chu wankgolh: «Kachikin kʼEgipto, xwayaw kaxtalanchu chu asta nakkgalhkgasaw» (Éxodo 16:1-3).

 Xlikana max kʼEgipto kaxtalanchu lu kgama xtlawakan. Kʼuma kilhtamaku, xwilakgolh tiku lu xkatsinikgo tlawakgo kaxtalanchu chu tipakgatsi xtlawakgo. Pero akxni maxtulh xkachikin anta kʼEgipto, Jehová ni xlakpuwanit pi nialh xʼama kamaxki kaxtalanchu. Kawanilh: «Naktlawa pi la sen kataktalh kaxtalanchu kʼakgapun». Chu makgantaxtilh xtachuwin, kaj tsisa chu chali chali xtasiya ktiyat pi wi tuku “xma stakaka”, xtachuna la monkganat. “¿Tuku ama?”, israelitas xkgalhskininankgo akxni xapulana akxilhkgolh. Moisés kawanilh, «wa kaxtalanchu nema kamaxkiman Jehová xlakata nawayatit» (Éxodo 16:4, 13-15). Wa xlakata wanikgolh maná, chu wa uma wakgolh tipuxum kata nema titaxtulh. *

Xapulana, maná max lu kaks kamalakawanikgolh isrealitas. Éxodo 16:18, 31 wan xlakata “chu xtakgalhwanan xtachuna la tortas nema xkgalhi lisakgsin”, chu lhuwa xʼanan. Pero titaxtulh kilhtamaku, tsukukgolh lakapastakkgo pi kʼEgipto tipakgatsi xʼanan liwat. Xwankgo: «Kilakgastapukan nitu tanu tuku akxilha kaj watiya maná» (Números 11:6). Alistalh xatasitsin wankgolh: «Kilatamatkan lakgmakganit uma nitlan kaxtalanchu» (Números 21:5). Chu “kaxtalanchu xalak akgapun” litaxtulh tuku nitlan chu lixkajnit akxilhkgolh (Salmo 105:40).

Latamanin lhuwa tuku nialh lu xlakaskinka akxilha, la kaxtalanchu. Biblia lichuwinan akgtum kaxtalanchu nema putum kilhtamaku lu xlakaskinka kiliʼakxilhatkan. Uma kaxtalanchu, nema Jesús tamalakxtumilh maná nema israelitas xkajnikgolh, tlan kinkamakgtayayan putum kilhtamaku.

Jesús wa: «Kit nkaxtalanchuj xla latamat. Waʼ minatlatnakan, tiwakgolh maná ntani ntsilis kawan, wa mpi maski chuna, nikgonita. Awa mpi wa yuma wa nkaxtalanchu ntu ntaktanitanchi nkaʼakgapun, lakimpi wa nti xla walh, ni katinilh. Kit nkaxtalanchu xastakna ntu ntaktanit nkaʼkgapun. Lapi wi nti xwalh yuma nkaxtalnchuj, xlipan nalatamay; na wa nkaxtalanchu ntu nkit nakmaxkiy, wa nkintiyatliwa, wa ntu nkit nakpalakamastay, nalikalhiy latamat ntachixkuwitat.» (Juan 6:48-51.)

Lhuwa latamanin tiku xkgaxmatmakgolh Jesús, ni akgatekgskgolh tuku xlakata tamalakxtumimaka  tachuwin kaxtalanchu chu liway. Pero uma ni tlawalh pi nitlan tu xtamalakxtumimaka. Kaxtalanchu wa tuku xmaklakaskinkgo chali chali judíos, xtachuna la maná tiku xlapulakgo kdesierto tipuxum kata. Jesús xtachuna la maná, xlakata mincha anta kʼakgapun. Xla makamastalh xlatamat nema ni xkgalhi talakgalhin «lakimpi xlipaks wa nti nkanajlaniy, ni katitsankgalh, [...] wata nakgalhiy xlatamat wa ntu xaliʼankgaIhin» (Juan 3:16). Maná akgtum xtamaskiwin xla Dios litaxtulh, pero ni putum kilhtamaku xʼama lilatamakgo. Ni xtachuna, xtamakamastan Jesús putum tiku kanajlani tlan nalatamakgo putum kilhtamaku. Xlikana, Jesús wa «kaxtalanchu nema kgalhi latamat».

Akxni tsinksaw max naputsayaw aktsu kaxtalanchu. Chu xlikana paxtikatsiniyaw Dios xlakata «kinkaxtilachukan xala chali chali» (Mateo 6:11, La Biblia de Nuestro Pueblo). Kalipaxuwa talakgalhaman nema kgalhiyaw, nikxni kapatsankga xtapalh «kaxtalanchu nema kgalhi latamat», Jesucristo.

¿La tlan nalimasiyayaw pi lu xlakaskinka akxilhaw uma kaxtalanchu, ni xtachuna la Israelitas xkilhtamaku Moisés? Jesús wa: «Lapi wixin xlikana kimpaxkiyatit, kamakgantaxtitit kmilatamatkan wantu chu kalimapakgsinitan» (Juan 14:15). Wa xlakata, natlawayaw tu wan xlimapakgsin chu nalipaxuwayaw kaxtalanchu putum kilhtamaku (Deuteronomio 12:7).