NINA lhuwa kilhtamaku xtatsokgnit kmaktum periódico xalak Corea wanikan The Chosun Ilbo: «Shim Cheong, chatum puskat tiku lu tlan xlikatsi chu nitu xkatsi xlakata Jesús. ¿Anta alh kpupatin?».

Tuku tsokgwilika, lhuwa ni lakgatikgolh, xlakata tiku xtsokgkgo talismanin nema lu talakgapasa xpaxkikgo uma tsumat, Shim Cheong, maklakaskilh xlatamat xlakata kuenta natlawa xtlat tiku nila xlakawanan. Lata titaxtunit kilhtamaku likgapaskanit tuku tlawalh, uma lu tlan liʼakxilhtit litaxtulh xlakata laktsuman coreanas.

Lhuwa latamanin nitlan akxilhkgolh, asta nitlan kamamakgkatsini, xlakata nalakpuwankan pi Shim Cheong max xmapatinika kpupatin kaj xlakata ni tamunulh la chatum cristiano. Uma takanajla chuna xkgalhikan akxni nina xchan cristianismo kxkachikin ama tsumat.

Artículo nema xtsokgkanit na xtlawanikanit takgalhskinin chatum sacerdote. Akxni kgalhskinka komo putum tiku nikgonit chu ni lakgapaskgolh Jesús ¿kpupatin kamalakgachakanit? Kgalhtinalh: «Ni katsiyaw. Kaj klakpuwanaw pi Dios wi tuku kgalhi [xlakata uma latamanin]».

Catecismo de la Iglesia wan: «Kimalanakan wan pi tamunut xlakaskinka xlakata nalakgtaxtukan.(cf Jn 3,5)». Versículo nema unu tatsokgnit anta kBiblia de Jerusalén: «Wanti ni lakgapasa chuchut chu Espíritu, nila katitanulh kxTamapakgsin Dios». Xlakata tuku wan uma texto, makgapitsi lakpuwankgo pi tiku nikgo chu ni tamunukgonit, kpupatin ankgo o max atanu la kamapatinikan.

Pero, na lhuwa wilakgolh tiku ni kanajlakgo uma tuku masiyakan. Lhuwa millones latamanin nikgonit chu ni lakgapaskgolh Biblia. ¿Xlikana talakaskin napatinankgo putum kilhtamaku xlakata tuku tlawakgolh? ¿Tuku wan Biblia xlakata uma?

Biblia liwana masiya pi Dios ni kalakgmakgan latamanin tiku nila lakgapaskgonit xlimapakgsin. Hechos 17:30, Hua Xasasti Talaccaxlan, 1999 kinkawaniyan: «Wa Dios, kaj paxuwanalelh xlipaks xtalakgalhinkan tachixkuwitat wantu titlawakgolh». Wa xlakata, ¿tuku takgalhkgalhin kgalhikgo tiku nikgonita chu ni lakgapaskgolh?

Tekgsaw xtakgalhtin kxtachuwin Jesús nema wanilh chatum tiku nitlan xlikatsi tiku nilh kxpaxtun. Uma chixku xtasaskininit: «Nakilakapastaka akxni wilapi nawan kmintapakgsin». ¿La kgalhtilh Jesús? «Xlikana kwaniyan uku: “Nakintatawilayapi kParaíso”.» (Lucas 23:39-43.)

¿Xwanima Jesús pi naʼan kʼakgapun? Ni, xlakata ama chixku ni xlakachimpalanit, ni xlilakachinit chuchut, chu espíritu, uma xtalakaskin xlakata tlan natanu kʼakgapun (Juan 3:3-6). Jesús xwanima pi tlan nalatamapara «kParaíso». Uma chixku, tiku judío xwanit, max xkgaxmatnit xlakata akgtum Paraíso, kjardín xaʼEdén nema lichuwinankan xapulana libro xalak Biblia (Génesis 2:8). Xlikana, Jesús xlichuwinama takgalhkgalhin xlakata tlan nalakastakwanan kKatiyatni nema akgtum paraíso nawan.

Biblia wan pi «nalakastakwanankgoy ninin wanti xalakwan chu nti ni xalakwan» (Hechos 24:15). Tiku ni xalakwan, kilhchanima latamanin tiku ni tlawakgolh xaʼakgstitum xlimapakgsin Dios, xlakata nikxni lakgapaskgolh. Jesús namalakastakwani ama tiku nitlan xlikatsi kParaíso kkatiyatni, chu lhuwa millones latamanin tiku nikgolh chu nila lakgapaskgolh Dios. Anta putum latamanin nakatsikgo xtalakaskin Dios chu nakamaxkikan talakaskin nakgalhakgaxmatnankgo chu nalimasiyakgo pi paxkikgo Dios.

Akxni nakamalakastakwanikan nti ni xalakwan, ¿nakaputsananikan xlakata tuku tlawakgolh kxapulana  xlatamatkan? Ni. Romanos 6:7 wan: «Sampi wa nti xanina, lakgtaxtulha ktalakgalhin». Chuna la akxilhwi wanti ni xalakwan, lixokgokgolh xlatamatkan talakgalhin nema tlawakgolh, wa xlakata nakaputsananikan tuku natlawakgo alistalh akxni kamalakastakwanikanita nawan, ni wa tuku tlawakgolh akxni nina xnikgo. ¿Tuku xlakata tlan uma?

Xlakata nakamaxkikan talakaskin nakatsinikgo xlimapakgsin Dios, nema natamalakgaki la akgtum rollo. Asta akxniku nakalakputsananikan «xpalakata xtatlawkan», uma wamputun, komo nakgalhakgaxmatkgo uma tamapakgsin o ni (Apocalipsis [Revelación] 20:12, 13). Lhuwa latamanin xlimakgtumku nakamaxkikan talakaskin xlakata nakatsinikgo chu natlawakgo xtalakaskin Dios xlakata tlan nakgalhikgo latamat putum kilhtamaku kKatiyatni.

Uma tuku masiya Biblia, lhuwa latamanin kamakgtayanit xlakata nakanajlaniparakgo Dios. Yeong Sug wa uma tuku makgtayalh. Xla stakli ktakanajla católicos chu lu xkanajlani. Makgapitsi xparientes sacerdotes xlitaxtukgonit. Komo monja xlitaxtuputun, alh kconvento; pero ni lhuwa kilhtamaku tawi, taxtulh akxni akxilhli pi nitlan tuku xtlawakan. Nachuna, nila xkanajla pi xkamapatinikan latamanin kpupatin; lu nitlan xakxilha.

Titaxtulh kilhtamaku, chatum xtatayana Jehová masiyanilh uma tachuwin xalak Biblia: «Wantiku staknankgo liwana katsikgo pi nanikgo; pero wantiku nikgonit, xlakan nialh tuku katsikgo» (Eclesiastés 9:5). Makgatekgsnilh pi xfamilia tiku xnikgonita ni xpatinamakgolh kpupatin, wata kaj klhtatamakgolh klinin, chu kgalhkgalhimakgolh pi nakamalakastakwanikan.

Chuna la Yeong Sug xkatsi pi lhuwa latamanin ni katsikgo tuku xaxlikana wan Biblia, wa xlakata makgantaxtilh tuku wa Jesús kMateo 24:14: «Na xapulh taliʼakgchuwinanit nawan xlikatlanka nkatuxawat yuma xatlan tamakatsin xla tapakgsin; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni». La uku kalinikgo xalakwan xalaksasti latamanin chu kalitachuwinan lu tlan takgalhkgalhin nema tekgsnit kBiblia.

«Dios, ni laksakpaxkinan wan Biblia, [...] wampi kaxani kawa xala, wanti mpikwaniy Dios, chu na wa ntu xlilat ntu ntlaway» (Hech. 10:34, 35 TXS, 1999). Wa uma tuku xaʼakgstitum tlan nakgalhkgalhiyaw xlakata Dios. ¿Tuku xlakata? Xlakata «xla lakgati tatanksni y tlan talakapastakni» (Salmo 33:5).