Naoko, tiku lichuwinawa xapulana artículo, kinkawaniyan la tlawalh xlakata namakgxtakga uma nitlan talismanin: «Klakgapasli xtayat Dios chu tuku lakpuwanit natlawa kimatliwakglhli xlakata nialh naxkuli». Putum tuku katsinilh tatekgsa kBiblia. Maski uma libro ni lichuwinan lixkuli, kinkawaniyan tuku lakpuwan kiMalakatsukinakan xlakata xkulikan.  * Lhuwa latamanin kamakgtayanit uma namakgxtakgkgo nitlan talismanin, chu amakgapitsin ni para naxkulikgo (2 Timoteo 3:16, 17). Kaʼakxilhwi pulaktutu tuku xlakata lu nitlan xkulikan chu tuku wan Biblia xlakata uma.

Lixkuli limin nema tlawa pi nila namakgxtakga: nicotina, uma tlawa pi tlan namakgkatsiya o namakgalipuwanan. Akxni wi tiku xkuli, nicotina lakapala chan kxʼakskitit chu makglhuwa. Akxni makgatunu xkulikan xatakgatsin makglhtinan dosis, wa xlakata akxni wi tiku xkuli akgtum cajetilla chali chali, akgtiy ciento dosis makglhtinan, tlakg lhuwa nixawa atanu droga. Uma tlawa pi nicotina lu nila namakgxtakga. Akxni wi tiku nialhla makgxtakga, tsuku makgkatsi pi lu xkuliputun xlakata xmakni lakaskin nicotina.

Biblia kinkamakgtayayan xlakata nakatsiyaw tuku natlawayaw: «¿Tu katsiyatit mpi wa nti wixin natastaniyatit nalakgachixkuwiyatit, pus luwa tastaninitantit lantla nkamapakgsiyan wa nti lakgachixkuwiyatit?» (Romanos 6:16). Akxni wi tiku putum kilhtamaku wili kxtalakapastakni pi lu xkuliputun kitaxtu la tiku tastaninit. Dios tiku wanikan Jehová lakaskin pi ni chuna kakitaxtulh, ni kaj watiya uma talismanin tuku laktlawa kilatamatkan, nachuna laktlawa kintayatkan chu tuku tlawaputunaw (Salmo 83:18; 2 Corintios 7:1). Lataman tiku paxki chu maxki kakni Dios, liwana katsi pi Dios lakgchan tuku tlakg tlan chu nila katimaxkilh komo kgalhi uma nitlan talismanin; uma namakgtaya xlakata nialh natlawa uma nitlan talismanin.

Olaf, tiku wi kʼAlemania, tsukulh xkuli akxni 12 kata xkgalhi titaxtulh akgkuchaxan kata xlakata tlan xmakgxtakgli uma nitlan talismanin. Pulana lakpuwa xlakata nitu nitlan xʼama kitaxtu komo kxkulilh. Pero titaxtulh kata, lismanilh xkuli chu nila xmakgxtakga. Olaf wan: «Akxni ni xakkgalhi ni akgtum lixkuli lu nitlan xakmakgkatsi chu lixkuli nema xkiʼakgataxtuninit chu kmaxtunilh tuku xawatiya xkgalhi chu klikgasnatli periódico chu ktsukulh xkuli. Akxni klakapastaka uma lu kmaxanan». ¿Tuku tlawalh xlakata namakgxtakga uma talismanin? Nachuna wa: «Tuku kimakgtayalh wa xlakata nakmakgapaxuwa  Dios. Tapaxkit nema kinkakgalhiniyan chu takgalhkgalhin kimaxkikgolh litliwakga xlakata nialh nipara makgtum nakxkulipara.»

«Científicos wankgo pi xkulikan laktlawa putum kimaknikan chu malhuwi tajatat, linin», chuna wan The Tobacco Atlas (Atlas del tabaco). Putum latamanin katsikgo pi xkulikan lichipanan cáncer nachuna laktlawa pulmón chu naku (uma tajatat nipasanan). Pero la wan OMS, tuku tlawa pi kanikgolh lhuwa latamanin wa lixkuli xtachuna la tuberculosis.

Jehová kinkalitachuwinanan xTachuwin, wa Biblia kinkamasiyaniyan la naʼakxilhaw kilatamatkan, kimaknikan chu kintalakapastaknikan. Jesús wa uma tuku xkilhchanima akxni wa: «Xlipaks minaku nalipaxkiya Dios [...], chu xlipaks [milatamat] chu xlipaks mintalakapastakna» (Mateo 22:37). Xlikana, Dios lakaskin pi liwana kamaklakaskiw kilatamatkan chu kimaknikan chu kamaxkiw kakni. Lakgapaskan Dios chu tuku natlawa, kinkamakgtayayan xlakata napaxkiyaw chu xtapalh naʼakxilha tuku tlawanit kimpalakatakan, uma tlawa pi natamakgatliniyaw tuku laktlawa kilatamatkan.

Jayavanth, makuchina xalak India, xkulilh puxamakutsayan kata. Xla lakapastaka: «Xaklikgalhtawakga revistas xla makuchinanin xlakata lu nitlan tuku tlawananinan lixkuli. Xakkatsi pi xkulikan lu nitlan. Xakkawani kintatatlanin xlakata nialh xkulikgolh, pero akit nila chuna xaktlawa, maski makgkitsis o makgchaxan klitsakgsalh». ¿Tuku makgtayalh? Xla wan: «Tsukulh klikgalhtawakga Biblia chu tunkun kmakgxtakgli. Xlakata xakmakgapaxuwaputun Dios tlawalh pi xaklimakgxtakgli la xakxkuli.»

Xa jini nema lijaxanan tiku xkuli chu jini nema taxtuni lixkuli makgninan. Lataman tiku ni xkulikgo pero lijaxanankgo xajini tlan nakalichipa cáncer chu atanu tajatat. Kata kata 600.000 latamanin nikgo tiku ni xkulikgo, tiku tlakg nikgo lakpuskatin chu laktsukamanan. Akgtum tamakatsin xalak OMS wan: «Ni wi niku ni anan xa jini lixkuli».

 Jesús wa pi limapakgsin nema tlakg xlakaskinka pulana napaxkiya Dios xliʼakgtiy nakapaxkiya latamanin, uma wamputun, latamanin tiku lamakgolh la kifamiliajlakan chu kiʼamigoskan. Jesús wa: «Napaxkiya wa nti lakatsunin litawilakgo» (Mateo 22:39). Nitu kgalhakgaxmatmaw uma tamapakgsin komo kgalhiyaw nitlan talismanin nema laktlawa xlatamatkan amakgapitsin. Tapaxkit nakinkamatlawiyan uma tastakyaw: «Ti ni chatum kaputsalh wa lantla nkaj xakstu [tlan nakitaxtu], wampi na kaputsalh lantla ntlan [nakitaxtu] achatum» (1 Corintios 10:24).

Armen, chatum chixku tiku wi kʼArmenia, lakapastaka: «Kifamilia xkintasaskini xlakata nialh xakxkulilh xlakata nitlan tuku xakkatlawanima. Pero akit ni kuenta xakkatlawani». Alistalh wan tuku tlawalh pi xtalakgpalhilh: «Tuku katsinilh kBiblia chu xlakata xakpaxki Dios kimakgtayalh xlakata nakmakgxtakga chu nialh nakxkuli chu katsilh pi ni kiʼakstu xkintlawanimaka tuku ni tlan nachuna amakgapitsin».

Biblia makgtayalh Olaf, Jayavanth chu Armen xlakata nialh xkulikgolh, talismanin nema xkatlawanima tuku nitlan xlakan chu amakgapitsin. Makgxtakgkgolh, ni kaj xlakata katsikgolh pi xkulikan katlawanima tiku nitlan, wata xlakata xpaxkikgo Jehová chu xmakgapaxuwaputunkgo. Tapaxkit nema lichuwinankan 1 Juan 5:3 lu xlakaskinka: «Xampi wa yuma liwi lantla napaxkiyaw Dios, mpi natlawayaw ntuwan xlimapakgsin, na wa xlimapakgsin, ni tuwa». Xlikana, tlawakan uma tastakyaw min kilhtamaku tuwa makgkatsiyaw, pero komo paxkiyaw Jehová ni tuwa nakgalhakgaxmataw.

Xlakata xlikalanka katiyatni kamasiyanimaka latamanin, Jehová kalakgmaxtuma millones latamanin xlakata nialh naxkulikgo (1 Timoteo 2:3, 4). Nialh makgas, xTamapakgsin Dios xalak akgapun tiku napulalin wa xKgawasa, Jesucristo namalakgsputu uma kakilhtamaku tiku kaʼakgchipanit latamanin xlakata lixkuli chu namasputu uma tajatat chu natlawakgo pi latamanin tiku kgalhakgaxmatkgo nakgalhikgo xmaknikan chu xtalakapastaknikan nema ni kgalhikgo talakgalhin (Isaías 33:24; Apocalipsis [Revelación] 19:11, 15).

¿Tuwa makgkatsiya nialh naxkuliya? Ni kataxlajwani. Paxkikan Dios chu akxilhkan la akxilha Dios talismanin xkulikan namakgtayayan xlakata namakgxtakga. Xtatayananin Jehová namakgtayakgoyan chu namasiyanikgoyan la nalilatapaya tastakyaw xalak Biblia kmilatamat. Komo lakaskina pi Jehová kamaxkin litliwakga, Jehová namaxkiyan (Filipenses 4:13).