«DIOS chatum Espíritu», chatum lataman nila akxilha (Juan 4:24). Maski chuna, Biblia wan pi makgapitsin latamanin akxilhkgonit (Hebreos 11:27). ¿Xlikana tlan naʼakxilhaw «Dios wa nti ni la ntaukxilha»? (Colosenses 1:15.)

Katamalakxtumiw kilatamatkan chatum tiku ni lakawanan, xlakata chuna lakachinit. ¿Tlawa uma pi nila nakatsi la wi kakilhtamaku? Ni talakaskin. Xla pulaklhuwa la tlan likatsi komo lakatsu wilakgolh latamanin o nakatsi atanu. «Talakawan ni wa kilakgastapukan, wa chatum chixku tiku ni lakawanan, kaj wa talakapastakni.»

Nachuna, maski nila liʼakxilhaw Dios kilakgastapukan, pero tlan naliʼakxilhaw «kintalakapastaknikan» (Efesios 1:18). Kalichuwinaw pulaktutu la natlawayaw.

Tiku ni lakawanankgo tlakg katsinikgo maklakaskinkgo la kgaxmatkgo chu xmakankan xlakata nakatsikgo tuku nila akxilhkgo. Nachuna, akinin tlan nalimaklakaskinaw tuku kgalhiyaw xlakata naʼakxilhaw putum tuku tlawanit Dios. «Xampi asta lantla nkilhtsukunit nkatuxawat, wa nkatuwa ntu ni tasiyuy xla xpalakata, mpi ni anan xtamaktat xlitliwakga, chu lantla xla [...] Dios, lu wa lakatanks litakatsi wa xpalakata ntu ntlawanit.» (Romanos 1:20.)

Akgtum liʼakxilhtit kalilakapastakwi xlakata Tiyat. Ni tlawaka kaj xlakata nalatamakan, tlawaka xlakata nalipaxuwayaw latamat. ¿Ni xlikana pi lu lipaxuwayaw akxni makgkatsiyaw un o akxni makgkatsiyaw Chichini, kgalhwananaw xtawakat kiwi o akxni kgaxmataw xtatlinkan laktsu tsiksi? ¿Ni xlikana pi uma kinkalimasiyaniyan xtapaxkit chu xtalakgalhaman kiMalakatsukinakan?

¿Tuku katsiniyaw akxni akxilhaw akgapun? Limasiya pi Dios kgalhi litliwakga. Tiku lakputsanankgo wankgo pi akgapun ni kajwatiya talankima, wata lakapala talankima. Kalakapi kʼakgapun katsisni chu kalakpuwanti: «¿Niku minacha uma litliwakga xlakata tlawa pi katalankilh akgapun?». Biblia wan pi Malakatsukina «lhuwa litliwakga kgalhi» (Isaías 40:26). Chu putum tuku anan limasiya pi wa tiku kgalhi Putum litliwakga; nachuna xlakata lhuwa kinkapaxkiyan (Job 37:23).

Xtsekan chatiy laktsukaman tiku ni lakawankgo wan: «Katachuwinankan lu xlakaskinka xlakata nakamasiyanikan. Talakaskin nakawaniyaw putum tuku akxilhaw chu kgaxmataw tuku lama niku lamaw. Akinin xlakgastapukan». Nachuna, maski «Dios, [niti] aʼukxilhnit», xKgawasa, «nti wi kxpaxtun xaTlat», wa malakgapasninalh tiku xTlat (Juan 1:18). Jesús wa tiku xapulana tlawaka, wa Jehová tiku tlawalh. Xtachuna la kilakgastapukan litaxtulh; xlakata wa tiku tlan liwana kinkawaniyan la likatsi Dios.

Jesús akglhuwa mil millones kata talatamanit Dios. Kaʼakxilhwi makgapitsi tuku lichuwinalh:

• Dios putum kilhtamaku skujma. «Wa nkinTlat, asta [uku] skujma.» (Juan 5:17.)

• Dios katsi tuku maklakaskinaw. «Kintlatikan Dios, xla aya katsiy wantu wixin katsankganiyan.» (Mateo 6:8.)

• Dios lakgati kinkamaxkiyan tuku maklakaskinaw. «Tlat [...] nti wi nkakgapun: wa nti machichiniy kxokgspunkan wa nti ni lakwan chixkuwin, chu wa nti ntlan chixkuwin, chu na makaminikgoy sin wanti xatlan, chu wa nti ni tlan xtayat.» (Mateo. 5:45.)

• Chatunu akinin Dios lhuwa xtapalh kinkaʼakxilhan. «Kaj luwa kaukxilhkgotit lantla luwa aktuju xtapalh  mastakgokan tantuy laktsu spun chu nipala tsinu tapalaxla listakan wampi maski chuna, nipala tantum xanin katitamacha ktiyat [...] [putum katsi] kintlatikan Dios. Wa chuna kkaliwaniman sampi xla paks katsiy, chu xawachi asta maski miakchixitkan wantu yakgo kmiakgxekgakan paks taputlakgatayanit lantla kganatunu. Chuna pi ni kapekwantit; Dios nakamakgtayayan sampi tlakg xaliwaka wixin lhuwa kgalhiyatit milakgasikan ni xawa paks yama laktsu spun.» (Mateo 10:29-31.)

Tiku ni lakawanankgo tanu la makgkatsikgo ni xtachuna la tiku lakawanankgo. Akgtum liʼakxilhtit, xlakan ni akxilhkgo kaskgekgni niku ni tanu Chichini chu kapukswa, wata kaj kaskgawiwi makgkatsikgo. Xtachuna la tiku ni lakawanan ni la akxilha xkgakganat chu kaskgekgni, nachuna akinin nila kiʼakstukan tlan nalakgapasaw Jehová. Wa xlakata, Dios malakgachalh chatum chixku tiku liwana limasiyalh xtayat o la likatsi.

Uma chixku wa Jesús (Filipenses 2:7). Xla kinkalitachuwinan xTlat, nachuna limasiyalh la likatsi. Akxni Felipe skinilh: «Nkakinkamasiyuni xaTlat», Jesús kgalhtilh: «Wanti nkiʼukxilhnitta, ukxilhnitta xaTlat» (Juan 14:8, 9). ¿Tuku «akxilhaw» xlakata Dios akxni likgalhtawakgayaw xlatamat Jesús?

Jesús lu tlan xlikatsi chu xtaktuju chu xmasta talakaskin pi xtachuwinanka (Mateo 11:28-30). Xlakata lu tlan xlikatsi xtlawa pi latamanin xlakgtalakatsuwikgolh. Lu nitlan xlimakgkatsi xtapatinkan latamanin chu nachuna xkatapaxuwakgo (Lucas 10:17, 21; Juan 11:32-35). Akxni nalikgalhtawakgaya o nakgaxpata xlatamat Jesús, kalimaklakaskinti mintalakapastakni xlakata liwana naʼakxilha. Komo nalilakapastaka la xkalikatsini Jesús latamanin, tlakg liwana naʼakxilha pi lu tlan likatsi Dios chu namakgkatsiya pi lakatsu wi.

Chatum tiku kalakputsanani tiku ni lakawanankgo wan tuku tlawakgo xlakata nakatsikgo la wi kakilhtamaku: «Lhuwa tuku maklakaskinkgo (maklakaskinkgo xmakankan, kgankgawanankgo, kgaxmatkgo, chu atanu), uma tlawa pi kakatsikgolh la wilakgolh niku lamakgolh». Xtachuna, komo liwana naʼakxilhaw putum tuku anan, likgalhtawakgayaw tuku wa Jesús xlakata xTlat chu akxni akxilhaw la limasiyalh xlakata la likatsi, chu tuku katsiyawa xla Dios chu tlakg tlan nalakgapasaw. Uma natlawa pi tlakg nakanajlaya pi lama.

Wa uma tuku titaxtulh Job, tiku lichuwinan Biblia. Xapulana lichuwinalh tuku ni xʼakgatekgsa (Job 42:3). Akxni, akxilhli tuku lakstlan xtlawanit Dios, liwana katsilh: «Kaj kkgaxmatnit tuku wankan mimpalakata, pero la uku kilakgastapu tlan akxilhan» (Job 42:5).

Max nachuna nakitaxtuniyan. Komo naputsaya Dios, «namasta talakaskin natekgsa» (1 Crónicas 28:9). Xtatayananin Jehová xatapaxuwan namakgtayakgoyan xlakata nalakgapasa Dios tiku nila akxilhaw.