La kastakyawakan kamanan
«Akxni makgatunu xtitaxtu putlaw lu nitlan xakmakgkatsi. Xlimakgtutu chuna xkinkatlawaman Jordan, ni wa hora xtaspitma nema xakwaninitaw. Xaklakpuwan: “¿Niku wi? ¿Wi tuku lanilh? ¿Ni katsi pi klilakgaputsamaw?” Lu xaksitsinit akxni chilh.» (GEORGE)
«Kkgaxmatli la kilhtasalh kintsumat chu xtinit kmakgkatsilh. Akxni kakxilhli, xtasama chu xchipanit xakgxakga. Xtala tiku kgalhi akgtati kata wa wilinilh.» (NICOLE)
«Natalie, kintsumatkan tiku akgchaxan kata kgalhi, kinkawanin: “¡Nitu kkgalhama anillo, kaj ktekgsli!”. Laklanka xlakgastapu chu lakspupukun xlitasiya pi nitu xtlawanit. Lu nitlan klimakgkatsiw xlakata wa pi nitu xkgalhanit, ktsukuw tasayaw xlakata xakkatsiyaw pi kaj xkinkaʼakgskgawiman.» (STEPHEN)
¿NACHUNA titaxtunita la umakgolh liʼakxilhtit? Akxni nachuna titaxtuya la uma, ¿akstu kgalhskinkana la tlan kstakyawa minkgawasa o nitu nawaniya? ¿Nitlan nakitaxtu komo nakastakyawaya minkamanan?
¿TUKU TASTAKYAW?
Anta kBiblia, tachuwin tastakyaw ni watiya wamputun namalakgaxokgenankan. Uma wamputun, masiyakan, stakyawanankan chu lakkaxtlawakan, ni watiya wamputun natlawanikana tuku nitlan o nitlan nalikatsinikana (Proverbios 4:1, 2).
Kastakyawakan kamanan, xtachuna la kuenta tlawakan jardín. Chatum jardinero lakkaxtlawa tiyat, munuwili tachanan, wilini abono, makuchi xlakata nitu nalani chu pulhuni palhma nema sakgali, chu lakgachunin akgakay xlakata chuna nastaka la lakaskin. Xla liwana katsi tuku talakaskin xlakata stlan nastakkgo xtachanan. Nachuna natlatni lhuwa tuku maklakaskinkgo xlakata tlan namakgastakkgo xkamanankan. Pulaktu tuku maklakaskinkgo wa tastakyaw, namin kilhtamaku nalimaklakaskinkgo xlakata nakamakgtayakgo xkamanankan akxni natlawakgo tuku nitlan, chu «akgstitum» nalatamakgo. Chuna la jardinero, lu liwana naʼakgasita tachanan xlakata ni natlawani tuku nitlan, natlatni nalimasiyakgo tapaxkit akxni nakastakyawakgo xkamanankan.
Jehová tiku matlawinalh Biblia, kawilininit liʼakxilhtit natlatni. Tastakyaw nema masta lu makgtayanan, wa xlakata kskujnin lu paxkikgo (Proverbios 12:1). Chuna tlawakgo chu ni makgxtakgkgo (Proverbios 4:13). Akxni Dios stakyawanan 1) paxkinan, 2) ni malakatsali chu 3) makgantaxti tuku wan. Komo lakaskina pi minkgawasa kuenta natlawa tastakyaw, chuna katlawa la Jehová, chu katlawa uma pulaktutu tastakyaw.
PAXKINAN
Akxni stakyawanan Dios limasiya tapaxkit xlakata paxkinan. Biblia wan pi «Jehová stakyawa tiku paxki, chuna la tlawa chatum tlat xlakata paxki xkgawasa» (Proverbios 3:12). Nachuna, Jehová tlan likatsi, wata «xalakgalhamana chu tlan likatsi, ni lakapala sitsi» (Éxodo 34:6). Ni limaklakaskin tachuwin nema nitlan nalimakgkatsikgo amakgapitsin, xlakata xtachuna la «nalilhtukukana espada» nema lu nitlan mamakgkatsininan (Proverbios 12:18).
KAKGAXPATTI
Xlikana pi niti chatum tlat matlani la kgalhkgalhinan Dios. Namin kilhtamaku akxni namakgkatsiya pi lu nasitsiputuna, pero akxni chuna nala, kalakapastakti pi akxni akgastakyawanankan chu lu sitsikanit nitlan kitaxtu. Nichuna stakyawanankan.
Pero komo liwana nalakpuwana chu nalimasiyaniya tapaxkit minkgawasa akxni nastakyawaya, max lu tlan la nakitaxtu. Kaʼakxilhwi la tlawakgolh George chu Nicole, tiku kalichuwinawa.
KATLAWA ORACIÓN
«Akxni Jordan chalh kkinchikkan, kimpuskat chu akit lu xaksitsinitaw, pero liwana kkgaxmatniw tuku kinkawanin. Komo lu xtsiswanita, klakpuwaw pi lichaliku nakchuwinanaw. Ktlawaw oración chu klhtatawa. Lichali, nialh lu xaksitsinitaw chu tlakg tlan ktachuwinaw chu lakgchalh kxnaku kinkgawasakan tuku kwaniw. Liwana akgatekgsli pi nitlan tuku xtlawanit, chu kwaniw tuku natlawa chu tuku ni natlawa. Liwana kkatsiw pi komo tunkun stakyawanankan akxni lu sitsinita nitlan kitaxtu. Akxni pulana xakkgaxmataw, lu tlan xkinkakitaxtuniyan.» (George.)
KACHUWINANTI
«Lu ksitsilh xlakata kinkgawasa wilinilh xtala tsumat, pero uma ni tlawalh pi tunkun xakmalakgaxokgelh, kmachokgolh kintasitsi chu kmalakgachalh niku lhtata, alistalhku ktachuwinalh. Akxni nialhtu xaksitsima, kwanilh pi nitlan tuku xtlawaninit xtala tsumat chu liwana kmakgatekgsnilh, pi nitlan latlawanikan tuku nitlan. Chuna la klakkaxtlawalh uma taʼakglhuwit lu tlan kitaxtulh, kinkgawasa wanilh pi xtapatilh xtala chu akgpixtilh.» (Nicole.)
Xlakata lu tlan nakitaxtu tastakyaw, talakaskin nalimasiyayaw tapaxkit, maski talakaskin namalakgaxokgenanaw akxni natalakaskin.
NI MALAKATSALI
Jehová putum kilhtamaku kinkastakyawayan «chuna la xlilat» (Jeremías 30:11; 46:28). Putum akxilha tuku tlawayaw, maski akinin ni akxilhaw. ¿La tlan nachuna natatlawakgo natlatni? Stephen, tiku lichuwinawa, wan: «Maski lu nitlan xakmakgkatsiyaw chu ni xakʼakgatekgsaw tuku xlakata xkinkaʼakgskgawanitan Natalie, klilakapastakwi kata nema kgalhi chu xlakata nina liwana katsi».
Robert, xchixku Nicole nachuna tlawa, liwana akxilha akxni xkamanan nitlan tuku tlawakgo, xakstu kgalhskinkan: «¿Kaj makgtum chuna tlawalh o lismanima? ¿Kaj tlakgwankgonit? ¿Nitlan makgkatsikgo? ¿Max tuku tlawakgolh kaj limasiyamakgolh atanu taʼakglhuwit?».
Natlatni tiku liwana lakapastaknankgo ni kaʼakxilhkgo laktsu xkamanankan la tiku kgalhikgoya kata. Apóstol Pablo wa: «Akxni nkit aktsu kgawasa xakwanit, xtachuna xakchuwinan lantla nchatum aktsu kgawasa, chu nachuna xaklakapastaka lantla nchatum aktsu kgawasa» (1 Corintios 13:11). Robert wan: «Tuku kimakgtaya xlakata ni lakapala naksitsi wa klakapastaka tuku xaktlawa akxni aktsujku xakwanit».
Xlakaskinka nakatsiya pi minkgawasa namin kilhtamaku natlawa tuku nitlan, pero uma ni wamputun pi namaxkiya talakaskin nakgalhi nitlan tayat o ni tlan nalikatsi. Komo liwana nakatsiya pi minkgawasa nila putum tlawa, tlan nastakyawaya pero ni namalakatsaliya.
MAKGANTAXTI TUKU WAN
Malaquías 3:6 wan: «Akit Jehová; ni ktalakgpalinit». Kskujnin Dios lipawankgo uma xaxlikana tachuwin chu uma tlawa pi tlan namakgkatsikgo. Nachuna, kamanan tlan makgkatsikgo akxni liwana kastakyawa xnatlatnikan xlakata ni malakatsalikgo, uma wamputun pi ni talakgpali la kastakyawakgo. Komo natlatni nalakgpalikgo la kastakyawakgo xkamanankan kaj xlakata paxuwama o sitsima, kamanan ni katiʼakgatekgskgolh nachuna nitlan katimakgkatsikgolh.
Kalakapastakti pi Jesús wa: «Akxni nawanatit Tlan, Tlan chu akxni nawanatit Ni, Ni». Uma tachuwin tlan nalimaklakaskin xlakata la kamakgastakkan kamanan (Mateo 5:37). Ni kawanti tuku ni namakgantaxtiya. Komo nawaniya minkgawasa pi namalakgaxokgeya xlakata nitlan tuku tlawalh, kamakgantaxtini.
Lu xlakaskinka natlatni nalatachuwinankgo xlakata la nakastakyawakgo xkamanankan chu ni namalakatsalikgo. Robert wan: «Min kilhtamaku kinkamanan kiskinikgo talakaskin xlakata wi tuku natlawakgo chu kkamaxki talakaskin. Pero, ni kiwanikgo pi xskinikgonita talakaskin xtsekan, xla ni xkamaxkinit talakaskin. Akxni kkatsi, klakgpali tuku xakkawaninit chu ktataya tuku xkawaninit xtsekan». Komo natlatni ni lakxtum lakapastaknankgo xlakata tuku lakaskinkgo kamanan, tlakg tlan nawan komo nalichuwinankgo akxni ni wilakgolh xkamankan.
LU XLAKASKINKA TASTAKYAW
Komo nachuna natlawaya la Jehová akxni nastakyawaya minkgawasa nalimasiyaya tapaxkit, ni namalakatsaliya liwana kakatsi pi minkgawasa lu tlan nakakitaxtuni. Mintapaxkit chu la nastakyawaya namakgtaya xlakata tlan lataman nawan. Biblia wan: «Kamamakgatawakga kgawasa chuna la na wan xtiji; chu akxni nakgolon ni namakgxtakga» (Proverbios 22:6).
