Smita, * chatum puskat tiku xkgalhi 35 kata chu xlama kDaca (Bangladés), xlilakgapaskan pi lu xapaxkina xwanit. Putum latamanin xlilakgapaskgo pi chatum puskat tiku xpaxuwa, chu xkapaxki xfamilia, nachuna xkamakgtaya amakgapitsin nakatsinikgo xtalakaskin Dios. Pero, xfamilia lu nitlan limakgkatsilh akxni Smita chipalh tajatat nema nipara akgtum semana makgapalalh chu nilh.

James chu xpuskat, max xkgalhikgo 35 kata, xkalilakgapaskan pi nachuna xlikatsikgo la Smita. Nina lhuwa kata kilakgapaxiʼalhnankgolh xʼamigoskan kxkilhtun pupunu niku tsankga chichini kʼEstados Unidos, pero nikxni taspitparakgolh kxchikkan kNueva York. Nikgolh ktiji akxni xʼamakgolh, lu nitlan limakgkatsikgolh xʼamigoskan chu xfamiliajkan.

Kimputumkan akxilhaw pi tapatin chu tuku nitlan kaniwa niku tasiya: guerras kamakgni lhuwa soldados chu na kamakgni latamanin; tiku tlawakgo chu latlawanikgo tuku nitlan kamakgnikgo lhuwa latamanin maski ni linkgo kuenta; akxni la tuku nitlan chu nikgo latamanin, tajatat ni laksaka kata chu komo kgalhikan tumin o ni; tuku masputunan malakgsputu laktsu kachikinin laksakpaxkinankan chu tlawakan tuku ni xaʼakgstitum chali chali akxilhaw. Max wix nachuna titaxtunita.

Wa xlakata max kiakstukan kinkatlawanikanan uma takgalhskinin:

• ¿Tuku xlakata kaʼakgspula tuku nitlan tiku tlan likatsikgo?

• ¿Xkuenta Dios?

• ¿Kaj xalan la tuku nitlan o wa latamanin tiku chuna tlawakgo?

• ¿Wa xlakata karma? ¿Lakgaxokgomaw tuku nitlan tlawaw kʼatanu latamat?

• Komo wi chatum Dios tiku kgalhi putum litliwakga, ¿tuku xlakata ni kakuentajtlawa latamanin tiku tlan likatsikgo?

• ¿Namin kilhtamaku akxni nasputa tapatin chu tuku nitlan?

Xlakata natekgsaw umakgolh xatakgalhtin talakaskin nakgalhtiyaw akgtiy takgalhskinin nema xlakaskinka: ¿Tuku xlakata la tuku nitlan? ¿Chu tuku natlawa Dios?