Klakachilh kʼakgtum colonia niku ni xʼanan tumin lakatsu kRoma. Lu tuwa xwanit kilatamat. Ni klakgapasli kintse chu ni tlan xaktalalin kintlat. Klistakli tuku kkatsinilh ktiji.

Ktsukulh kgalhanan akxni xakkgalhi akgkaw kata, akgkutiy kata xakkgalhi akxni xapulana ktsalalh kkinchik. Kintlat makglhuwa kinkitamakxtulh kpulachin. Putum kilhtamaku xakkatalakilhni latamanin chu lu xaluku xakwanit. Akxni kmakgatsilh akgkutati kata ktaxtulh kkinchik chu nialh ktaspitli. Kaj ktiji klatamalh chu xakmaklakaskin drogas. Akxni xtsiswan, xakmalakki akgtum putlaw chu anta xaklhtata asta lichali; alistalh xakputsa akgtum fuente niku tsinu xakpaxa.

Lu kkatsinilh kgalhanan. Lhuwa tuku xaktlawa: xakkgalhan bolsos ktiji chu katsisni xakkgalhanan kchiki. Lu kilakgapaska, wa xlakata kiwanika nakmakgtapakgsi kʼakgtum pandilla nema lu xlakgapaskan, uma tlawalh pi «tlakg lhuwa tuku xakkgalhilh», xlakata ktsukulh kgalhanan kbancos. Xlakata lu xaluku xakwanit xkimpekuanikgo tiku na anta xmakgtapakgsikgo kpandilla. Putum kilhtamaku xaktalatama pistola; asta kkiʼakxtikat xakwili akxni xaklhtata. Tuku xaktlawa kkilatamat wa uma: Xakchipanan, xaklixkuli drogas, xakkgalhanan, xaktlawa talakgxtumit xalimaxana chu lixkajni xakchuwinan. Putum kilhtamaku xkimputsakgo policías chu makglhuwa kintamaknuka kpulachin. Akglhuwa kata klatamalh ktiji chu kpulachin.

Makgtum, akxni ktaxtulh kpulachin kkilakgapaxialhnalh chatum kinapa. Akit ni xakkatsi, pero kinapa chu chatiy kinatapuxnamatni xtatayananin Jehová xwankgonit. Kiwanikgolh pi xakkataʼalh kxtamakxtumitkan chu kkastalanilh kaj xlakata xakkatsiputun tuku xtlawakan. Akxni kchaw kxpukgalhtawakgakan  xtatayananin Jehová, akit anta ktawilaputulh lakatsu niku laktanukan xlakata nakakxilha tiku xtanukgo chu tiku xtaxtukgo. Pero, xaklin pistola.

Ama tamakxtumit lakgpalilh kilatamat. Klakpuwa: «¡Max ni kkatiyatni klama!». Putum tiku xaklakaʼakxilha xlakalitsin chu xpaxuwa. Asta la uku chuntiya klakapastaka la xatapaxuwan xlakalitsinkgo xtatayananin Jehová. ¡Xakmakgkatsi pi akglhuwa millones xlimakgat xaklama kkatiyatni!

Klakpuwa nakkatakgalhtawakga xtatayananin Jehová. Chuna la xtitaxtutilhama kilhtamaku, kkatsinilh pi putum kililakgpalit xwanit la xaklima kilatamat. Akgtum liʼakxilhtit, lu kuenta ktlawalh Proverbios 13:20, niku wan: «Wantiku katalalin xalakgskgalalan latamanin, xaskgalala nawan pero tiku katalalin tiku xalak tontos nitlan katikitaxtunilh». Kkatsilh pi xtalakaskin xakmakgxtakgli pandilla. Lu tuwa kmakgkatsilh, pero kmatlanilh xlakata kimakgtayalh Jehová.

Nachuna kmakgxtakgli tuku xlakgalhi kimakni. Lhuwa kliskujli xlakata nialh nakxkuli chu nakmaklakaskin drogas. Kchukulh laklhman kinchixit, nialh kmaklakaskilh akgastujut chu nialh kmaklakaskilh lixkajni tachuwin. Ama kilhtamaku kmakgkatsilh pi tlan xakmachokgo tuku xaktlawaputun.

Nikxni xaklakgatinit nakkgalhtawakga, wa xlakata lu tuwa xakmakgkatsi naklikgalhtawakga Biblia. Pero, tsinu tsinu ktsukulh paxki Jehová. Nachuna, wi tuku talakgpalilh kkilatamat: nitlan ktsukulh klimakgkatsi tuku xaktlawanit. Makglhuwa nitlan xakmakgkatsi chu xaklakpuwan pi Jehová nikxni xʼama kintapati tuku nitlan xaktlawanit. Akxni chuna xakmakgkatsi, xaklikgalhtawakga la Jehová xtapatinit David talakgalhin nema xtlawanit, uma tlan xkimamakgkatsini (2 Samuel 11:1–12:13).

Tuku na lu tuwa kmakgkatsilh, wa nakkalitachuwinan latamanin xtachuwin Dios kxchikkan (Mateo 28:19, 20). ¡Lu xkimakgapekuan komo xaktekgsli tiku max xaktlawaninit tuku nitlan makgasata! Pero, tsinu tsinu nialh lu kpekualh chu ktsukulh lipaxuwa xlakata tuku xakkalitachuwinan latamanin xlakata kinTlatikan xalak akgapun, tiku kinkatapatiyan putum kintalakgalhinkan.

Xlakata klakgapasli Jehová lakgmaxtulh kilatamat. Atsinu ni putum tiku kiʼamigos xwankgonit, nikgolha o tanumakgolh kpulachin. Pero akit lu kpaxuwa chu kkgalhi akgtum takgalhkgalhin. Kkatsininit naktaktuju chu nakkgalhakgaxmatnan chu nialh lakapala naksitsi, xlakata uma, tlakg tlan kkatalalin amakgapitsin. Ktatamakgaxtokgnit chatum stlan puskat tiku wanikan Carmen chu lu kpaxuwa. Akxtum kkamakgtayayaw kintalakatsukan xlakata tlakg nakatsikgo tuku wan Biblia.

La uku nialh ktlawa tuku nitlan xlakata naktlaja tumin. Lakgachunin kskuja kbanco pero la uku nialh kkgalhanan, wata kaj kkaxaka o kkapalhnan.