Biblia liwana lichuwinan tuku natlawa Jehová chu Jesucristo xlakata tapatin nema wilinit Satanás. «Wa cha yuma ntilitasiyulh xKam Dios, lakimpi namalakgsputuy xtatlaw akgskgawini.» (1 Juan 3:8.) La uku anan lhuwa latamanin tiku lhuwa tuku kgalhiputunkgo, anan tasitsi chu latlawanikan tuku nitlan, putum uma namasputukan. Nachuna, Jesús wanit pi «xapuxku yunu nkatuxawat [Satanás] natamakaxtukan», chu namakgnikan (Juan 12:31). Akxni namalakgsputukan uma ángel tiku nitlan likatsi, Dios natlawa xasasti kakilhtamaku kkatiyatni, naʼanan takaksni chu tapaxuwan (2 Pedro 3:13).

Pero ¿tuku nakaʼakgspula tiku ni lakgpali xlatamat chu chuntiya tlawa tuku nitlan? Uma tuku lichuwinan Biblia kinkamaxkiyan xtakgalhtin: «Wantiku xalakatitum wa nalatamakgo kkatiyatni, chu wantiku nitu tlawamakgolh talakgalhin anta natamakgxtakgkgo» chu na wan «wantiku lixkajni xtayatkan nakamalakgsputukan» (Proverbios 2:21, 22). Nakamasputukan tiku kinkamatlawiputunkgoyan tuku nitlan chu naʼanan takaksni. Akxni chuna nawan, latamanin tiku nakgalhakgaxmatnankgo tsinu tsinu nakamakglhtikan talakgalhin (Romanos 6:17, 18; 8:21).

Dios namasputu tuku nitlan pero, ni la robots kintikatlawan nema nila tlawa tuku lakaskin, wata nakinkamasiyaniyan xtalakaskin chu nakinkamakgtayayan namakgxtakgaw nitlan talakapastakni chu tuku nitlan xtlawayaw.

Chu, ¿tuku natlawani tuku kaj xalan la, chu lhuwa makgapatinan? Xla wanit pi nialh makgas xTamapakgsin namapakgsinan kKatiyatni, chu mapakgsina tlawanit Jesucristo, tiku tlan kamapaksa tiku tatatlakgo (Mateo 14:14). Jesús na kgalhi litliwakga xlakata namakaksa unan chu sen (Marcos 4:35-41). Namasputu «kilhtamaku chu tuku xalan lay» (Eclesiastés 9:11). Akxni namapakgsinan, nialh katiʼanalh tuku nitlan chu tuku kamapatini latamanin (Proverbios 1:33).

Na kgalhikgo takgalhkgalhin lhuwa millones tiku patinankgonit maski nitu xlaklinkgo chu nikgonit. Akxni malakastakwanilh xʼamigo Lázaro, Jesús wa: «Kit wa ntalakastakwan, chu latamat» (Juan 11:25). Chuna, Jesús kgalhi litliwakga xlakata nakamalakastakwani putum ama latamanin.

Komo latapaputuna niku ni nalanikgo tuku nitlan latamanin tiku tlan likatsikgo, ¿tuku xlakata ni katsiniya tuku masiya Biblia? Tlakg nakatsiya xlakata xaxlikana Dios chu xtalakaskin. Xtatayananin Jehová xalak minkachikin xatapaxuwan namakgtayakgoyan. Xatapaxuwan kkawaniyan nakatachuwinana o kakatsokgnani tiku tlawakgo uma revista.