Xlakata wa Jehová * tiku tlawanit putum tuku anan chu kgalhi putum litliwakga, lhuwa latamanin wa limawakakgo putum tuku la kkakilhtamaku, asta akxni la tuku nitlan. Pero Biblia wan xlakata Dios:

•  «Kintikukan tankswa akxni tu laklhkaj.» (Salmo 145:17.)

•  «Putum tuku tlawa [Dios] xaʼakgstitum. Dios tiku ni makgxtakgnan, wantiku ni tlawa tuku ni xaʼakgstitum; xla xaʼakgstitum chu ni tlawa tuku ni xalakatitum.» (Deuteronomio 32:4.)

•  Jehová «kgayaj katsani, na lakgalhamanan.» (Santiago 5:11.)

Liwana akxilhaw pi Dios ni tlawa tuku nitlan. Pero wi tiku lakpuwankgo pi Dios kamatlawi latamanin tuku nitlan. ¿Xlikana tuku wankgo? Ni xlikana. Biblia wan: «Akxni nakaliʼakxilhkan, niti kawa: “Wa Dios tiku kiliʼakxilhma”. Xlakata Dios nila tiku namatlawi tuku nitlan, chu xla na niti liʼakxilha» (Santiago 1:13). Xla ni kaliʼakxilha latamanin natlawakgo tuku nitlan. Ni tlawa tuku nitlan chu ni kamatlawi amakgapitsin chuna katlawakgolh. Wa xlakata, ¿tuku o tiku nalimawakayaw?

Biblia lichuwinan tuku xlakata latamanin patinankgo, wan: «Kilhtamaku chu tuku xalan lay putum kinkalakgchinan» (Eclesiastés 9:11). Akxni la tuku nitlan o tuku ni xlakpuwanaw pi nala, max wi tiku nalani tuku nitlan. Max chuna la akxni tawilakan niku ni anta kilitawilatkan xwanit. Akgtiy milh kata, Jesucristo lichuwinalh xlakata akgtum torre nema talakxpulalh chu kamakgnilh kgalhakutsayan latamanin (Lucas 13:1-5). Latamanin ni nikgolh xlakata la xlimakgolh xlatamatkan: kaj xlakata lakatsu xwilakgolh niku xya torre akxni talakxpulalh. Akxni tachikilh tiyat kʼHaiti enero kata 2010 kamakgnilh 300.000 latamanin, chuna wa mapakgsina, ni kalaksakli latamanin chu lhuwa kamakgnilh. Nachuna, kaj lakapala kachipa tajatat latamanin chu ni katsikgo tuku kilhtamaku.

Max wi tiku nakgalhskinkan: «¿Nila xtlawalh Dios pi ni xlalh tuku nitlan? ¿Nila xkakuentajtlawalh latamanin tiku tlan likatsikgo?». Xlakata tlan xkamakgtayalh Dios, xlikatsit tuku kilhtamaku nala tuku nitlan. Maski xlikana pi xla katsi tuku nala kilhtamaku nema aku mima, wi akgtum takgalhskinin nema kiakstukan nakinkakgalhskinkanan: ¿maklakaskin xlitliwakga xlakata nakatsi putum tuku nala? (Isaías 42:9.)

Biblia wan: «Pues kiDioskan xastaknan wi nak akgapun; wa tlawanit wakg lata tu lakaskilh» (Salmo 115:3). Chuna, tlawa putum tuku lakpuwan pi talakaskin, pero ni putum tlawa maski matlani.  Jehová ni maklakaskin xlitliwakga nawan tuku aku nala. Akgtum liʼakxilhtit, akxni xamakgan kachikinin Sodoma chu Gomorra lu litatsamalh tuku nitlan, Dios wanilh pulalina Abrahán: «Xlikana naktakta xlakata nakakxilha komo xlikana chuna tlawamakgolh tuku kiwanikanit, chu komo nichuna, tlan nakkatsi» (Génesis 18:20, 21). Milh kilhtamaku, Jehová ni xkatsiputun la xlilhuwa xtalakgalhinkan xwanit kachikinin; uma limasiya pi ni putum wan tuku aku nala (Génesis 22:12). Pero, uma ni wamputun pi kgalhi talakgalhin o ni kgalhi litliwakga. Biblia wan: «Lu tlan putum tuku tlawanit», xla liwana maklakaskin tuku katsi xlakata nakgantaxtu xtalakaskin. Ni kamafuerzajni latamanin natlawakgo xtalakaskin (Deuteronomio 32:4). * Tlan nawanaw, Dios laksaka tuku nawan nema aku nala chu tuku ni.

Lhuwa tuku nitlan anan na xkuentajkan latamanin. Biblia lichuwinan xlakata la kilhtsukulh tuku nitlan: «Wampi chatunu litatokglhnit wantu watiya xtaxkgonalakankan liʼakgskgawiliyankgo nkalawaj tayat. Wa ntaxkgonalakan; akxni wintu likilhtsukunit, talakgalhin nkitaxtuniy, chanchu ntalakgalhin, mpi kgantaxtunitta, linin nkitaxtuniy» (Santiago 1:14, 15). Xlikana, akxni chatum lataman tlawa tuku nitlan, xlikana max nalipatinan tuku tlawa (Romanos 7:21-23). Chixku tlawanit lhuwa tuku nitlan, wa xlakata kamakgapatinanit amakgapitsin, chuna litasiya tuku lanit. Chu ni kaj watiya uma, tiku lixkajni likatsikgo tlawakgo pi amakgapitsin nachuna kalikatsikgolh, uma tlawa pi nikxni nasputa tuku nitlan (Proverbios 1:10-16).

¿Wi tuku xtlawalh Dios? ¿Xkinkamakgtayan Dios xlakata ni natlawayaw tuku nitlan? Kalakpuwaw la kinkatlawakanitan. Biblia kinkawaniyan pi Dios kinkatlawan chuna la kgalhi xtayat. Wa xlakata na tlan chuna nalikatsiyaw la likatsi (Génesis 1:26). Nachuna, kinkamaxkin lu stlan tamaskiwin: nalaksakaw tuku akinin natlawaputunaw. Akinin nalaksakaw komo napaxkiyaw chu nakgalhakgaxmataw xlimapakgsin (Deuteronomio 30:19, 20). Komo xkinkamafuerzajnin natlawayaw xtalakaskin, xtachuna la xkinkamakglhtin tamaskiwin nema kinkamaxkinitan. Xlitaxtuw la robots xlakata putum xtlawaw xtalakaskin. Nachuna xkitaxtulh komo chuna xlitalhkatawilalh kkilatamatkan o wa kismet, xwa tuku xtlawaw o tuku xlaniw. Paxtikatsiniyaw xlakata Dios kinkamaxkiyan kakni chu kinkamaxkiyan talakaskin nalaksakaw kkilatamatkan tuku natlawaputunaw. Pero, uma ni wamputun pi putum kilhtamaku napatinanaw kaj xlakata nitlan tuku tlawakgonit o tuku laksakkgonit amakgapitsin.

Komo xtlawaniw takgalhskinin nema min kʼuma revista chatum hindú o budista, max xkinkakgalhtikgon: «Latamanin tiku tlan likatsikgo, kaʼakgspula tuku nitlan xlakata karma: lakgaxokgomakgolh tuku nitlan tlawakgolh kxapulana xlatamatkan». *

Xlakata tlakg nakatsiyaw uma, kaʼakxilhwi tuku wan Biblia xlakata nikan. Anta kjardín xla Edén, niku kilhtsukulh latamanin, Malakatsukina wanilh Adán, xapulana chixku: «Tlan nawaya xtawakat putum kiwi nema yakgo kJardín asta nakgalhkgasa. Pero kiwi nema lilakgapaskan tuku xatlan chu nixatlan, ni nawaya, xlakata kilhtamaku akxni nawaya, xlikana pi naniya» (Génesis 2:16, 17). Komo Adán xtikgalhakgaxmatli Dios chu ni xmakglakgalhinalh, xlatamalh putum kilhtamaku. Wa limalakgaxokgeka linin xlakata ni kgalhakgaxmatnalh. Akxni tsukulh kgalhikgo xkamanan, «linin, chuna nkgalhikgolh xlipaks nchixkuwin» (Romanos 5:12). Wa xlakata tlan nawanaw pi linin wa lixokgokan talakgalhin (Romanos 6:23). Nachuna, Biblia wan pi «wa nti xanina lakgtaxtulha ktalakgalhin» (Romanos 6:7). Uma wamputun, pi latamanin ni kamapatinikan akxni nikgonita.

La uku lhuwa millones wankgo pi tapatin nema kgalhikgo latamanin wa xlakata karma. Tiku kgalhi uma takanajla tlan akxilha tapatin (xtapatin chu xtapatin amakgapitsin) chu ni lilakgaputsa. Pero takanajla xlakata karma ni masta takgalhkgalhin xlakata nialh naʼanan tuku nitlan. Lakpuwankan pi xlakata nialh napatinan chatum lataman, talakaskin akgstitum nalin xlatamat chu nakatsi tuku natlawa xlakata ni nalakachin kʼatanu lataman, animal o atanu. Uma talakapastakni, ni wa tuku masiya Biblia. *

Tiku xlikana lin kuenta ni wa chixku, wa Satanás. Xapulana, chatum xʼángel Dios xwanit, «pero ni tamakgxtakgli ktalulokgtat» chu tlawalh pi xkilhtsukulh talakgalhin kkakilhtamaku (Juan 8:44). ¿La tlawalh? Kamatlawilh tiku xwilakgolh kjardín xla Edén ni xkgalhakgaxmatkgolh Dios (Génesis 3:1-5). Jesucristo wanilh «ntu nitlan» chu «puxku xala yunu nkatuxawat» (Mateo 6:13; Juan 14:30). Atsinu ni putum latamanin tlawakgo tuku lakaskinkgo chu ni tlawakgo xtalakaskin Jehová, limasiyakgo pi stalanikgo Satanás (1 Juan 2:15, 16). «Kxlitliwakga Akgskgawini wilakgo, xlipaks ntachixkuwitat» wan 1 Juan 5:19. Pero na wilakgolh amakgapitsi ángeles tiku nitlan likatsikgonit chu tatayakgolh Satanás. Biblia wan pi «akgskgawi xlipaks ntachixkuwitat» chu makgtayamakgolh xdemonios, uma tlawa pi lu napatinanaw kimputumkan (Apocalipsis [Revelación] 12:9, 12). Tiku xlikana lin kuenta wa Akgskgawini.

Liwana katsiyaw pi Dios ni wa lin kuenta tuku nitlan lanikgo latamanin. Nachuna ni kamapatini. Lichuwinanit pi namasputu tuku nitlan, chuna la naʼakxilhaw artículo nema mima.