Dios lakaskin pi putum kilhtamaku katachuwinaw chu kawaniw tuku lilakgaputsayaw (Lucas 18:1-7). Dios kinkakgaxmatniyan xlakata lu xlakaskinka kinkaʼakxilhan. KinTlatkan xala kʼakgapun lu tlan likatsi xlakata kinkawaniyan pi katachuwinaw. ¿Xatapaxuwan xmakglhtinanti uma invitación? (Kalikgalhtawakga Filipenses 4:6.)

Oración ni tlawakan xlakata kaj skinkan tamakgtay, wata wamputun pi natalakatsuwiniyaw Dios (Salmo 8:3, 4). Makgatunu akxni tachuwinanaw chu waniyaw tuku makgkatsiyaw, uma tlawa pi lu tlan natalalinaw. (Kalikgalhtawakga Santiago 4:8.)

Dios ni lakaskin pi kamaklaskiw laktuwa tachuwin, nachuna ni lakaskin watiya watiya nawaniyaw oraciones o nema kaj tatsokgnit. Na ni kinkawaniyan pi natatsokgostayaw akxni natlawayaw oración. Xla lakaskin kawaniw tuku wi kkinakujkan (Mateo 6:7). Akgtum liʼakxilhtit, kxkilhtamakujkan israelitas, Ana tlawalh akgtum oración xlakata xkgalhi taʼakglhuwit kxfamilia. Alistalh, akxni kgalhilh tapaxuwan, tlawanipa oración Dios chu paxtikatsinilh. (Kalikgalhtawakga 1 Samuel 1:10, 12, 13, 26, 27 chu 2:1.)

¡Lu lanka talakgalhaman xlakata tlan waniyaw kiMalakatsukinakan kintaʼakglhuwitkan! Nachuna tlan malankiyaw chu paxtikatsiniyaw xlakata putum tuku tlawa. Putum kilhtamaku kuenta katlawaw uma lanka talakgalhaman. (Kalikgalhtawakga Salmo 145:14-16.)