Akit xalak Rmeich, akgtum kachikin nema tapakgsini Líbano lakatsu kʼIsrael. Kstakli akxni xʼanan guerra kkinkachikin. Chuntiya klakapastaka la xlakgpankga minas, uma xtlawa pi latamanin xkamalakgsputunika xmakxpankan o xchaxpankan tiku nitu xlaklinkgo. Latamat lu tuwa xwanit; lhuwa xʼanan lachipat chu tuku nitlan.

Kifamilia xmakgtapakgsikgo ktakanajla nema wanikan Iglesia Maronita, católicos xalak Oriente. Kinkgalhakutiykan xakwanitaw, wa xlakata kintlat putum kilhtamaku kskuja xlakata nakinkamaxkiyan tuku xakmaklakaskinaw, kintse xkinkalinan kpusikulan. Titaxtulh kilhtamaku, kakxilhli pi Takanajla chu tiku pulalinkgo kachikin ni xkamakgtayakgo tiku xlakaskinkgo tamakgtay.

Akxni aku xakstakma, lu klakgatilh kung fu. Lu lhuwa xakmakgatawakga. Titaxtulh kilhtamaku liwana kkatsinilh kung fu chu kkatsinilh maklakaskin likan nema xlalichipakan kʼartes marciales. Maski nila xakmachokgo guerra, xaklakpuwan pi tlan xakkamachokgolh latamanin tiku nitlan xlikatsikgo. Wa xlakata akxni xakakxilha chatiy latamanin tiku xlachipamakgolh, tunkun xakkamamakgxtakga. Lu lakapala xaksitsi. Putum kxsur Líbano xkimpekuanikan, xlakata xakkamakgtayaputun tiku xkatlawanikan tuku nitlan.

Kata 1980 ktatsokgtanulh kʼakgtum club wanikan kung fu xalak Beirut. Maski lhuwa bombas chu balas xtaktiyachi chali chali akit xakan makgatawakga. Kaj watiya xakwayan, xaklhtata chu xaklatama la komo Bruce Lee, chatum actor xalak Estados Unidos, tiku xnatlatni xalak China, chu campeón xwanit xla kung fu. Nachuna xaktakxkita la xtakxkita, xaktlawan la xtlawan, putum chuna xaktlawa la xtlawa akxni xchipanan. Nikxni xaklakalitsin.

Akit xakamputun kChina xlakata xakmakgatawakgaputun la tiku liwana xkatsikgo kung fu. Akgtum kilhtamaku akxni xakmakgatawakgama xlakata xakama an kChina, wi tiku tlakgli kimalakcha. Xaklhakganit xatsitsakga kilhakgat xla kung fu chu lu xakxununit. Akxni  kmalakkilh, kakxilhli kiʼamigo chu chatiy xtatayananin Jehová. Xkilitachuwinamputunkgo tuku wan Biblia, akit kkawanilh pi nitu xakkatsi xlakata Biblia. Nipara tsinu klakpuwa pi ama kilhtamaku xʼama talakgpali kilatamat.

Xtatayananin Jehová kilimasiyanikgolh Biblia pi nipara chatum chixku tlan namasputu tuku nitlan, chu tiku latlawanikgo tuku ni xaʼakgstitum. Kiwanikgolh pi wa xkuenta akgskgawini xlakata anan taʼakglhuwit (Apocalipsis [Revelación] 12:12). Lu kaks klakawa xlakata xlitasiyakgo takaksni chu lu xlikana xkanajlakgo tuku xkilitachuwinamakgolh. Na lu tlan klimakgkatsilh xlakata kkatsilh pi Dios kgalhi xtukuwani (Salmo 83:18). Na kilikgalhtawakganikgolh 1 Timoteo 4:8, niku wan: «Sampi wa naliakganiy nchatum nalitatliwakglha mputuminika xmakni, kgalhiy xlakgasi; wampi wa yuma lantla naliakganiy, akgstitum kaknina nawan, tlakg xaliwaka nkgalhiy xlakgasi, ni xman wa lantla nalikgalhiy ntlan latamat yunu nkatuxawat, wampi xa wa wantu xla xlipan latamat» nema aku mima. Uma tachuwin lu lakgpalilh kilatamat.

Pero nialhla kkatachuwinalh xtatayananin Jehová, xlakata kifamilia kawanikgolh pi nialh xtaspitkgolh. Pero klakpuwa nakmakgxtakga kung fu chu naktsuku kgalhtawakga Biblia. Kinatalan ni lakgatikgolh tuku xaklakpuwama, pero akit xaklakpuwanit nakkaputsa xtatayananin Jehová xlakata tlakg xkimasiyanikgolh.

Kaniwa niku kkaputsalh, pero nila xakkatekgsa. Ama kilhtamaku, kaj lakapala nilh kintlat chu na kkgalhilh atanu taʼakglhuwit kkifamilia. Putum uma nitlan kimamakgkatsinilh. Xakskuja kʼempresa niku tlawakan chiki, milh kilhtamaku chatum tiku na anta kskuja wanikan Adel, kinkgalhskilh tuku xlakata xaklipuwama o xaklakgaputsama. Tsukulh kilitachuwinan xlakata talakastakwanat nema lichuwinan Biblia. Adel xtatayana Jehová xwanit. Akgnajatsa papaʼ kilimakgalhtawakgelh Biblia. Tlan kilikatsinilh chu nikxni kisitsinilh.

Xlakata tlakg xakkatsinima tuku masiya Biblia, kkatsilh pi kililakgpalit xwanit kintayat, pero lu tuwa xakmakgkatsi. Lakapala xaksitsi, pero kkatsinilh kBiblia pi xtalakaskin nakmachokgo kintasitsi. Akgtum liʼakxilhtit, kMateo 5:44 Jesús masta uma tastakyaw: «Kapaxkitit [mintalamakgasitsinkan], [...] chu na kapalakatlawakgotit oración wa nti xalikgaman katlawakgoyan». Chu kRomanos 12:19 wan: «Ni titamakgapuspitnikgoyatit “Kila ntamakgapuspitni, kit nakxokgoy, wan nkinTlatikan [Jehová]”». Xlakata umakgolh versículos chu atanu, lakatsuku klakgpalitilhalh kintayat.

Maski xapulana kifamilia ni xlakaskinkgo xakkatakgalhtawakgalh xtatayananin Jehová, la uku tlan kalikatsinikgo. Asta chatum kintala kgawasa xtatayana Jehová wa, chu kintse lu tlan lichuwinalh kintakanajlakan asta akxni nilh.

Jehová kisikulunatlawanit xlakata kimaxkilh chatum puskat tiku lu stlan likatsi, Anita. Klichuwinanaw Dios putum kilhtamaku. Kata 2000 ktsukuw latamayaw kkachikin wanikan Eskilstuna (Suecia), niku kkalimakgalhtawakgeyaw Biblia tiku chuwinankgo árabe.

Chuntiya nitlan kmakgkatsi akxni kakxilha pi latamanin patinamakgolh. Pero, tlan kmakgkatsi chu kpaxuwa pi kkatsininit tuku xlakata anan lhuwa tapatin, chu xlakata Dios nialh makgas namasputu (Salmo 37:29).