AKXNI José lakaʼan kʼeste lu nitlan makgkatsi. ¡Max xkatsalaniputun caravana! Xchik ni lu makgat wi, kaj kxchakgen sipi nema akxilhma, kʼHebrón. Xtlat, Jacob, max amaja lhtata, ni para tsinu lakpuwan tuku laninit xkgawasa tiku lu paxki. Pero José ni la tsala, chu max nialh xʼama akxilha xtlat tiku lu xpaxki. Tiku tamawakgolh José kuenta tlawamakgolh chu matlawanimakgolh xcamelloskan xlakata amakgolh ksur. Tamawakgolh kgawasa chu putum kilhtamaku kuenta tlawamakgolh. Xlikana lu lhuwa nalitlajakgo akxni nastakgo kʼEgipto chu akxni nastakgo resinas chu aceites xamuksun nema liminkgo.

José max 17 kata xkgalhi. Akxilha niku wi mar Grande, kʼoeste. Akxilhma la tsankgama Chichini. ¿Tuku xlakata nitlan lanima kxlatamat? ¿Tuku xlakata xnatalan atsinu ni makgnikgolh chu stakgolh la chatum skujni? Max lu xtasaputun. ¡Pero, tuku tlakg ni tlan, ni katsi tuku ama akgspula kxlatamat!

¿Tuku lalh? ¿Chu tuku kinkamasiyaniyan xlakata xtakanajla José tiku asta xfamilia mapatinikgolh?

Xfamilia José lhuwa xwankgonit chu ni xatapaxuwan xwilakgolh nipara akxtum xlakgo. Xfamilia liwana litasiya pi nitlan kgalhikan chalhuwa lakpuskatin, talismanin nema xkgalhikgo Judíos asta akxni milh xKgawasa laktlawalh uma talismanin (Mateo 19:4-6). Jacob, tiku xpulalin familia, kgalhilh kgalhtati lakpuskatin chu max 14 kamanan: chatiy xlakpuskatin Lea chu Raquel, chu tiku kskujnin xwankgonit Zilpá chu Bilhá. Puskat tiku lu xlakgati Jacob wa Raquel. Pero, Lea xtala Raquel chu xapuxku xwanit, nikxni paxkilh. Tatamakgaxtokgli Lea xlakata xputiatlat akgskgawilh. Wa xlakata, putum kilhtamaku xlasitsinikgo linatalan chu uma xtlawa pi xkamanan na xlasitsinikgolh (Génesis 29:16-35; 30:1, 8, 19, 20; 37:35).

Maski lhuwa kilhtamaku Raquel nila xkgalhi kamanan, alistalh tlan kgalhilh kamanan, chu lakachilh José. Jacob tlakg tlan xlikatsini José, xlakata lakachilh akxni xlina kata. Kalichuwinaw akgtum liʼakxilhtit. Akgtum kilhtamaku, Jacob alh tatanokglha xtala Esaú. Lu xpekuama, xlakata Esaú xwanit akglhuwata kata pi xmakgniputun.  Komo xkalinkgo putum familia, liwana lakkaxwililh xlakata nakakuentajtlawa, pero tiku tlakg lilakgaputsalh wa Raquel chu xkgawasa José: wa xlakata asta xaʼawatiya kawililh kcaravana. Uma kilhtamaku max lu lakapastakli aktsu kgawasa tuku titaxtukgolh. Jacob lhuwata kata xkgalhi, pero tliwakgaku xwanit. Pero, ama kilhtamaku akxni José takilh tsisa, akxilhli pi xtlat ni liwana xtlawan. Chu max kaks lakawa akxni katsilh tuku xlakata chuna xtlawan xtlat: putum katsisni xtalachipanit chatum ángel tiku lu litliwakga xwanit, xlakata xlakaskin xtasikulunalin Jehová. Dios sikulunatlawalh lakgpalinilh xtukuwani, wanilh pi xʼama wanikan, Israel. Anta kxfamilia xʼama taxtu akgtum lanka kachikin, nema xʼama lin xtukuwani (Génesis 32:22-31). Titaxtulh kilhtamaku, José katsilh pi xla, chu xnatalan, xnatlatnikan xlitaxtukgolh akgtum lanka kachikin.

Titaxtulh kata, José makgkatsilh lanka takatsanajwat maski aktsujku xwanit, xlakata makgatsankgalh tiku lu xpaxki: xtse nilh akxni lakachilh xtala, Benjamín. Jacob lu patinalh. Kalakpuwanti la lakpixakama aktsu xkgawasa chu litachuwinama takgalhkgalhin xla talakastakwanat, akgtum takgalhkgalhin nema Abrahán na tlan xmamakgkatsininit makgasata. ¡Lu max tlan mamakgkatsinilh José xlakata katsilh pi Jehová namalakastakwani xtse tiku lu xpaxki! Xlikana, max uma takgalhkgalhin tlawalh pi tlakg xpaxkilh «xDioskan nti staknankgoy» (Lucas 20:38; Hebreos 11:17-19). Jacob putum kilhtamaku kapaxkilh chatiy xkamanan Raquel (Génesis 35:18-20; 37:3; 44:27-29).

Lhuwa kamanan nitlan likatsikgo xlakata putum kamaxkikan tuku lakaskinkgo, pero José na stlan likatsilh la xnatlatni chu tliwakga takanajla kgalhilh, liwana katsilh tuku xatlan chu tuku ni xatlan. Akxni xkgalhi akgkutujun kata, chu xkatakuentajtlawama borregos xnatalan, katsilh pi xtlawakgonit tuku nitlan. ¿Nitu xwa xlakata xnatalan xpaxkikgolh? Biblia ni lichuwinan tuku lakpuwa, pero wan pi tlawalh tuku tlan: wanilh xtlat (Génesis 37:2). Max uma tuku tlawalh José, Jacob malakpuwanilh pi tlan xlikatsi xkgawasa. José lu tlan liʼakxilhtit kawilini lakgkgawasan tiku stalanikgo Cristo. Komo katsiyatit pi chatum tala o amigo tlawanit akgtum talakgalhin, talakaskin nachuwinana, kakaputsa tiku tlan namakgtayakgo tiku tlawanit talakgalhin (Levítico 5:1).

Pero na wi atanu tuku kinkamasiyaniyan xfamilia José. Maski la uku, kskujnanin Dios ni kgalhikgo chalhuwa lakpuskatin, pero wilakgolh familias tiku kgalhikgo tunatlatni, tukamanan chu tunatalan. Tiku chuna wilakgolh talakaskin nalakapastakkgo pi ni nalaksakpaxkinankgo, xlakata ni natapitsi familia. Natlatni tiku lakgskgalalan  liskujkgo xlakata nakatsikgo xkamanankan chu xtukamanankan pi kapaxkikgo, xlakata chatunu chatunu kgalhikgo lakwan tayat chu putum namakgtayanankgo xlakata natawila tapaxuwan kfamilia (Romanos 2:11).

Jacob maxkilh lanka talakgalhaman José, max xlakata xtlawanit tuku xaʼakgstitum: matlawinanilh maktum lhakgat nema maxkilh José (Génesis 37:3). Max lhakgat nema tlawanika makalhman xwanit, xtachuna la xlhakgat chatum príncipe.

Xlikana Jacob xkgalhi tlan talakapastakni, chu José max lu paxtikatsinilh xlakata la xlikatsini xtlat chu tapaxkit nema xkgalhini. Uma lhakgat nema maxkilh xtlat, likgalhilh lhuwa taʼakglhuwit. José mapuchwayanina xwanit, uma taskujut lu tuwa xwanit. Kalakpuwanti la xtasiya José akxni klhakga tuku xmaxkinit xtlat akxni xʼan kkatuwan, xtawaka kkachiwixni o max akxni xmakgtaya tantum xborrego niku kkalhtukunin. Pero uma ni wa liminilh taʼakglhuwit. ¿Tuku xʼama lakpuwankgo xnatalan akxni xkatsikgolh pi xtlat xmaxkinit akgtum lu stlan tamaskiwin?

Biblia wan pi akxni xnatalan akxilhkgolh pi xtlatkan tlakg xpaxki ni xtachuna la xlakan, «tsukukgolh sitsinikgo, chu ni la kaj akgstitum xtachuwinankgo» (Génesis 37:4). * Maski xlikana taʼakgatekgsa xlakata ksitsinikgo, pero ni xmastakgolh talakaskin xkamatlawikgolh tuku nitlan (Proverbios 14:30; 27:4). ¿Minit kilhtamaku nachuna makgkatsi? ¿Minit kilhtamaku sitsinita xlakata ni wix limasiyanika tapaxkit nema xlakaskina? Kalakapastakti xnatalan José. Xlakata sitsinikgolh José kamatlawikgolh tuku nitlan chu alistalh nitlan limakgkatsikgolh. Xliʼakxilhtit kinkamalakapastakayan akinin tiku kstalaninanin Cristo tuku wan Biblia «katapaxuwakgotit wa nti mpaxuwakgoy» (Romanos 12:15).

Xlikana max, José xkatsi pi xnatalan ni xpaxkikgo. ¿Ni xwili klhakgat nema xmaskiwinit xtlat akxni akxtum xkatatawila xnatalan? Max milh kilhtamaku chuna xtlawaputun. Kalakapastakwi pi Jacob maxkilh uma tamaskiwin xlakata xpaxki chu limasiyanilh pi tlan tuku xtlawanit, chu José xlakaskin pi chuntiya xlipawa xtlat, wa xlakata putum kilhtamaku klhakga. Xliʼakxilhtit lhuwa tuku kinkamasiyaniyan. Maski Dios ni laksakpaxkinan, min kilhtamaku tlakg tlan kalikatsini makgapitsi kskujnin. Nachuna, lakaskin pi xkachikin ni kakgalhilh tayat la latamanin xalak kakilhtamaku. Xtayatkan kstalaninanin Cristo xtachuna lhakgat nema maxkika José: ni tatalakxtumikgo tiku anta wilakgolh. Xlikana, min  kilhtamaku xlakata la likatsi lakgkatsalakanikan chu lakgmakgankan (1 Pedro 4:4). ¿Namatsekgkgo la likatsikgo kaj xlakata ni nakgalhikgo taʼakglhuwit? Ni, chuna la José ni matsekgli xlhakgat (Lucas 11:33).

Ni lhuwa kilhtamaku titaxtulh, José kgalhilh akgtiy tamanaxnat nema nila takanajla. Xapulana akstu akxilhka chu xnatalan, chatunu chatunu paxtum xchima xcereal. Alistalh cereal nema xpachinit José taktsajli chu cereales nema xpachikgonit xnatalan makgstilikgolh chu lakgtakilhputakgolh. Xliʼakgtiy tamanaxnat akxilhli Chichini, Papaʼ chu akgkawitu staku takilhputanikgolh kxlakatin (Génesis 37:6, 7, 9). Xtamanaxnat lu xlikana xtasiya pero nila takanajla. ¿Tuku xtlawalh José?

Akgtiy tamanaxnat nema kgalhilh wa mamanaxnilh Jehová chu xʼama kgantaxtu. Dios xlakaskin pi José xmakatsininalh tuku xlimanaxnanit. Uma kgawasa xʼama litaxtu la palakachuwinanin nema alistalh latamakgolh, tiku xmakatsininankgolh tuku xʼama tlawa Dios akxni ni xkgalhakgaxmatkgo.

José liwana katsilh maklakaskin tachuwin akxni kawanilh xnatalan: «Kakgaxpattit, katlawatit litlan, uma tamanaxnat». Xlakan tunkun akgatekgskgolh tuku xkawanima chu ni lakgatikgolh, wa xlakata wanikgolh: «¿Max mapakgsina nawana kkilakgstipankan?, ¿o wix nakinkamapakgsiya kkilakgstipankan?». Biblia lichuwinan pi «tlakg sitsiniparakgolh wa xlakata xtamanaxnat chu xtachuwin». Akxni kawanilh xliʼakgtiy xtamanaxnat xnatalan chu xtlat, nitlan la kgalhtikgolh: «Xtlat tsukulh kilhni chu wanilh: “¿Tuku wamputun uma tamanaxnat nema manixnanita? ¿Nachuna akit chu mintse chu minatalan nakkatakilhputaniyan kmilakatin?”». Putum uma Jacob liwana tsukulh lilakpuwan. ¿Kaj xtachuwinama Jehová xkgawasa? (Génesis 37:6, 8, 10, 11.)

Ni kaj xakstu José lakgmakganka chu putsastalanika xlakata tamakatsinin nema wanika pi nalichuwinan. Tiku xapuxku xmakatsinina Jehová wa Jesús, kawanilh kstalaninanin: «Lapi kintalatlawakanit nkit, na nakatalatlawakanatit» (Juan 15:20). Putum kstalaninanin Cristo lhuwa tuku tlan nakatsinikgo xlakata xtakanajla chu xlakata ni xpekuan José.

Ni lhuwa kilhtamaku titaxtulh, Jacob wi tuku limapakgsilh José. Xanapuxkun xkamanan xkuenta tlawamakgolh borregos knorte, lakatsu kSiquem, niku nina makgas lhuwa talatlawananin xkgalhinit. Wa xlakata Jacob xkalilakgaputsama xkamanan, chu malakgachalh José xlakata xakxilhkgolh pi nitu xlanikgonit. ¿La lakpuwana pi makgkatsilh José? Xnatalan xanin xakxilhputunkgo chu xla xkatsi. ¿Tuku xtlawakgolh akxni xkawanilh pi wa xtlat tiku xmalakgachanit? Maski ni xkatsi tuku xtlawakgolh xnatalan xla xʼama kgalhakgaxmata xtlat (Génesis 34:25-30; 37:12-14).

Lu makgat tlawalh, max akgtati o akgkitsis kilhtamaku. Siquem max 80 kilómetros xlimakgat xwi kxnorte Hebrón. Pero akxni José chalh, katsilh pi xnatalan xʼankgonit kDotán, max 22 kilómetros xlimakgat knorte. Akxni xtalakatsuwima, xnatalan akxilhkgolh chu lu sitsikgolh. Chu tsukukgolh lawanikgo: «¡Kaʼakxilhtit! Aminacha manaxna. Katantit chu kamakgniw chu kamujuw kʼakgtum pozo; chu nawanaw pi tantum xaluku lapanit walh. Chu naʼakxilhaw komo xlikana nakgantaxtu xtamanaxni». Rubén kawanilh pi ni xmakgnikgolh; wata kawanilh pi kaj xmujukgolh kʼakgtum pozo. Xlakpuwama nalakgmaxtu (Génesis 37:19-22).

Nipara tsinu xkatsi tuku xʼama akgspula, José kalakgchalh xnatalan, max xlakpuwan pi nitu xʼamakgolh tlawanikgo. Pero, akxni kalakgchalh xnatalan chipakgolh. Xtitpuxtakgolh xastlan klhakgat, xwatalinkgolh kʼakgtum pozo niku nitu xtujuma chuchut, chu anta mujukgolh. ¡Max katsanilh akxni tajucha! Tayalh, pero nila xtakutli xakstu. Akxni xtajuma kaj watiya xakxilha xkilhni pozo. Max pixlanka xkawani xnatalan pi xmakutukgolh, pero ni kuenta xtlawanikgo. Ankgolh  wayankgo chu nipara tsinu lakapastakkgolh xtalakan. Ni takatsi tuku xlakata Rubén lakatanu alh, chu amakgapitsin xnatalan tsukuparakgolh lakpuwankgo namakgnikgo. Judá kawanilh pi ni xmakgnikgolh, wata kawanikgolh pi kaj kstamaxkikgolh chatum stana tiku xtitaxtulh. Xlakata Dotán lakatsu xwi niku xtitaxtukgo stananin tiku xʼankgo kʼEgipto, ni lhuwa kilhtamaku titaxtulh xmimakgolh ismaelitas chu madianitas. Stakgolh akxni nina xtaspita Rubén: 20 siclos listaka José (Génesis 37:23-28; 42:21). *

Wa uma tuku xlichuwinamaw akxni tsukulh uma artículo. José xlimaka ksur, anta kʼEgipto. Tasiya pi nialhtu kgalhi. ¡Xakstu tamakgxtakgnit! Akglhuwa kata natitaxtu xlakata nakatsipara xlakata xfamilia, chu nakatsi la makgkatsilh Rubén akxni ni tekgsli chu takatsanajwat nema makgkatsilh xtlat akxni xlakpuwan pi xkgawasa tiku lu xpaxki xninit. Na ni nakatsi xlakata xtata, Isaac, tiku lamajku, nipara wa xtala xaktsujku, Benjamín, tiku lu lhuwa nalakapastaka. Pero, ¿xlikana putum makglhtikanit? (Génesis 37:29-35.)

José, xkgalhijku tuku xnatalan nila makglhtikgolh: xtakanajla. Xla liwana lakgapasa xDios, Jehová, chu ni anan tuku natlawa pi nalakgpali uma, maski nialh kxchik natawila, nipara wa tapatin nema nakgalhi akxni nalinkan kʼEgipto; nipara wa katimamakgxtakgnilh maski la skujni nastamaxkikan chatum chixku xalak Egipto tiku kgalhi lhuwa tumin wanikan Potifar (Génesis 37:36). Tuku tuwa natitaxtu namatliwakglha xtakanajla chu nikxni katitatamakgatlinilh Jehová. Kʼatanu artículos nalichuwinanaw pi xtakanajla makgtayalh xlakata tlakg tlan kskujnanilh Dios chu xmakgtayalh xfamilia. Xlikana, José lu tlan liʼakxilhtit.