Chatum tlat wanima xkgawasa tiku kgalhi akgtujun kata: «Makgasata Dios tlawalh Katiyatni chu putum tuku anan anta. Na tlawalh Chichini, Papaʼ chu staku». Aktsu kgawasa lakapastaka tsinu chu kgalhskin xtlat: «Tlati... ¿chu tiku tlawalh Dios?».

«Niti tlawalh, kgalhtinan xatlat. Dios putum kilhtamaku latamanit.» Uma takgalhtin nema maxkika aktsu kgawasa tlan limakgkatsilh. Pero, chuna la staktilhama, uma takgalhskinin chuntiya akstu tlawanikan. Nila kanajla pi wi chatum tiku nitu kgalhinit xkilhtsukut. «¿Tuku xlakata chuna?, lakpuwan. Asta putum tuku anan kʼakgapun kgalhinit xkilhtsukut.» Takgalhskinin nina takgalhti: ¿niku kilhtsukucha Dios?

¿Tuku masiya Biblia? Nachuna kgalhtinan la wanilh xtlat aktsu kgawasa. Moisés wanilh Jehová: «Akxni ninaj ixanan kalaksipijni, akxni ya ixmatsukiya tiyat y lata tu lilakgatsamaj, wix ixlapata lata makgan, y kanikxniwa lapat nawan» (Salmo 90:1, 2). Palakachuwina Isaías nachuna wa: «¿Ni katsinita o ni kgaxmatnita pi Dios tiku wi putum kilhtamaku wa Jehová, Tiku malakatsukilh putum tuku anan kkatiyani?» (Isaías 40:28, Reina-Valera, 1960). Chu xcarta Judas wan pi Dios latamanit «kaxani liwayaj xtiwaj» (Judas 25).

Umakgolh versículos limasiyakgo pi Dios wa «Puxku nti xaliankgalhin wij», chuna wanilh apóstol Pablo (1 Timoteo 1:17). Uma wamputun pi putum kilhtamaku latamanit, maski lhuwa kilhtamaku nataspitputunaw chu nalakputsananiyaw. Xla putum kilhtamaku natawila (Apocalipsis [Revelación] 1:8). Dios ni kgalhi xkilhtsukut chu ni kgalhi xlisputni, wa uma tuku na lu lilakgapaskan.

¿Tuku xlakata tuwa makgkatsiyaw akgatekgsaw uma? Xlakata ni lhuwa kilhtamaku latamayaw, chu tanu la akxilhaw kilhtamaku ni xtachuna la akxilha Jehová. Akgtum liʼakxilhtit, xla akxilha akgtum milh kata la akgtum kilhtamaku, xlakata putum kilhtamaku latamanit (2 Pedro 3:8). Kaʼakxilhwi akgtum liʼakxilhtit. Tantum xtuki max latama 50 kilhtamaku. Wa xlakata, nila katiʼakgatekgsli pi wi tiku latama 70 o 80 kata, kilhtamaku nema akinin latamayaw. Akinin xtachuna la xtuki akxni tatalakxtumiyaw kimalakatsukinakan. Kintalakapastakni nipara tsinu tatalakxtumi xtalakapastakni (Isaías 40:22; 55:8, 9). Wa xlakata lhuwa tuku ni akgatekgsaw xlakata xlatamat.

Maski tuwa naʼakgatekgsaw pi Dios putum kilhtamaku latama, tuku lichuwinaw xlikana. Komo wi tiku xtlawalh Dios, ama tiku xtlawalh malakatsukina xlitaxtulh. Pero, Biblia wan pi wa Jehová tlawalh putum tuku anan (Revelación 4:11). Nachuna, akinin katsiyaw pi xwi kilhtamaku akxni nitu xʼanan kʼakgapun (Génesis 1:1, 2). ¿La tatlawalh? Xlikana pi tiku tlawalh xlamaja. Chu xlamaja akxni niti xʼanan tiku skgalala, la xapulana xkgawasa chu ángeles (Job 38:4, 7; Colosenses 1:15). Liwana tasiya pi Dios xakstu xwi xapulana chu alistalh tsukulh tlawa tuku anan. Nila nawanaw pi wi tiku tlawalh, xlakata nitu xʼanan chu niti xlama, kaj xakstu xwi.

Xlakata akinin lamaw chu putum tuku anan kʼakgapun limasiya pi wi chatum Dios tiku putum kilhtamaku lama. Tiku tlawalh putum tuku anan kʼakgapun chu lakkaxwililh la natatsuwikgo, ni kgalhi xkilhtsukut. Wa xlakata tlan kamaxkilh latamat putum tuku anan (Job 33:4).