Lu lhuwa klimaxtulh kilhtamaku. Titaxtulh kilhtamaku kmalakkilh akgtum gimnasio kSan Leandro (California, Estados Unidos) chu kkataskujli fisicoculturistas, ktaskujli chatum tiku tlajalh título nema wanikan míster América. Pero maski lu xaklilakgaputsa kimakni uma ni tlawalh pi tlan xkimamakgkatsinilh.

Chatum kiʼamigo xalak gimnasio xkatsi pi akit xakakgatekgsniputun Biblia chu kiwanilh pi xaktachuwinalh chatum tiku xtalalakgapasa. Lichali tsisa chatum xtatayana Jehová chalh kkinchik chu akgtati horas likgalhtilh Biblia putum kintakgalhskinin. Kwanilh pi kakgotanun xtaspitpa chu asta itat katsisni chuntiya xakchuwinamaw. Xlakata tuku xakkgaxmatma lu klakgatilh, kkgalhskilh komo tlan xakstalanilh lichali xlakata xakakxilhli la xtlawa akxni xkalitachuwinan Biblia latamanin. Kaks kimalakawanilh chuna la xlimaklakaskin Biblia akxni xkgalhtinan takgalhskinin. Wa xlakata klakpuwa pi akit nachuna xaktlawaputun.

Kstalh tuku xakliskuja, chu kstalanilh precursor, chuna kalimapakuwikgo xtatayananin Jehová tiku lhuwa kilhtamaku lichuwinan Dios. Ktamunulh kata 1948 kʼEstadio Cow Palace anta kSan Francisco (California). Kata 1949, na precursor klitaxtulh.

Akxni xakliskujma la precursor, kkawanilh xTatayananin Jehová pi xlakgapaxialhnankgolh kintse. Xla xatapaxuwan kamakgamakglhtinalh chu ni lhuwa kilhtamaku titaxtulh, tamunulh. Xfamilia ni lakgatikgolh tuku tlawalh, pero kintse nikxni makgxtakgli Dios asta akxni nilh, nina lhuwa kata. Kaj kinchatiykan xTatayananin Jehová klitaxtuw.

Kata 1950 kalh kʼGrand Junction (Colorado), anta klakgapasli Billie. Xla lakachilh kata 1928 chu stakli akxni xtitaxtuma kilhtamaku nema lilakgapaska la Gran Depresión. Chali chali katsisni, xtse tiku xwanikan Minnie, xlikgalhtawakgani Biblia chu xlimaklakaskin lampara xla queroseno nema kaj tsinu xmakaxkgakge. Akxni xkgalhi akgtati kata, Billie xkatsiniya kgalhtawakga chu xkatsini lhuwa historias xalak Biblia. Akxni ksputmaja kata 1940, xtse tsukulh katakgalhtawakga xtatayananin Jehová chu katsilh pi kkalinin ni kamapatinikan latamanin, wata wa kilhchanima niku ankgo putum tiku nikgo (Eclesiastés 9:5, 10). Minnie chu xchixku xTatayananin Jehová litaxtukgolh.

Billie xʼan kʼuniversidad kBoston, pero kata 1949 taspitli kxchik chu tsukulh kgalhtawakga Biblia. Ni makgalhtawakgena litaxtulh kʼakgtum escuela, wata tsukulh skujnani Dios. Tamunulh kata 1950 kʼakgtum lanka tamakxtumit, niku xtamakxtumikgonit xalak lhuwa países nema tlawakgolh xtatayananin  Jehová kʼEstadio de los Yankees de Nueva York. Ni lhuwa kilhtamaku titaxtulh, klalakgapaswi, ktamakgaxtokgwi chu ktsukuw skujnaniyaw Dios putum kilhtamaku.

Xapulana niku kaw anta kʼOregón. Ktsukuw kʼakgtum kachikin wanikan Eugene, niku lhuwa amigos kkgalhiw. Kata 1953 kaw kkachikin wanikan Grants Pass xlakata nakmakgtayananaw kʼakgtum aktsu congregación. Watiya ama kata kinkawanikan nakanaw kʼEscuela de Galaad nema xlipuxamatutu xtatlawama, akgtum escuela niku kamasiyanikan tiku misioneros litaxtukgo chu anta xkamakgalhtawakgekan niku wanikan South Lansing, nema wi max 400 kilómetros kxnoroeste kachikin Nueva York.

Diciembre kata 1954, akxni xtitaxtunita akgkitsis papaʼ akxni sputli escuela de Galaad, Billie chu akit ktawakaw kʼakgtum avión nema xkgalhi akgtiy motores nema xʼama kBrasil. Kajku akgtum hora xaktaxtunitaw kʼEstados Unidos akxni talakgalhilh akgtum xmotor avión, wa xlakata ktaktaw kBermudas. Na talakaskilh lakapala naktaktaparayaw kCuba, lu makgat kmakgkatsiw xlakata puxamakuchaxan horas klichaw, alistalh kchaw ksucursal xla xtatayananin Jehová kRío de Janeiro (Brasil).

Anta kaj tsinu ktitawilaw, Billie, chatiy misioneras chu akit kaw kkachikin wanikan Bauru (São Paulo) xlakata xtawilalh akgtum chiki niku xtamakgxtakgkgolh misioneros. Xlamakgolh liwaka 50,000 latamanin kʼuma kachikin, chu akinin kaj kiakstukan xtatayananin Jehová xakwanitaw.

Ktsukuw kalakganaw latamanin kxchikkan, pero sacerdote xala ama kachikin lu nitlan xkinkalikatsiniyan: xkinkastalaniyan chu xkawani latamanin pi ni xkinkakgaxmatnikgon. Pero, ktsukuw kamakgalhtawakgeyaw akgtum lanka familia. Ni lhuwa kilhtamaku titaxtulh na xtatayananin Jehová wamputunkgolh chu titaxtulh kilhtamaku tamunukgolh. Nachuna, amakgapitsi latamanin tsukukgolh kgalhtawakgakgo.

Familia tiku tamunukgolh xkgalhikgo chatum xparientejkan tiku presidente xwanit xalak akgtum club social. Klakkaxtlawaw xlakata naktlawayaw akgtum lanka tamakxtumit niku xwi ama club. Akxni katsilh sacerdote, xmalaktlawinamputun tuku xlakkaxlakanita, pero tiku xapresidente xwanit katatamakxtumilh amakgapitsin socios chu kawanilh: «Komo nalaktlawayatit talakkaxlan, naktaxtu». Ktlawaw xalanka kintamakxtumitkan.

Kata 1956, kaw ktren max tipuxum xtatayananin Jehová xalak kincongregaciónkan klanka tamakxtumit anta kSantos (São Paulo). Akxni ktaspitwi kBauru, ktekgsli kbuzón maktum carta niku xkiwanikan pi xakkalakgapaxialhnalh xtatayananin Jehová la superintendente viajante. Atsinu ni takgatsilh puxamakitsis kata lata kliskujli uma taskujut, klakgatsalalh putum Brasil.

Ama kilhtamaku lu tuwa xwanit napina alakatanu kkachikin, xlakata xtalakaskin namaklakaskina autobús, tren, carreta, bicicleta o xtalakaskin natlawana. Makgapitsi xapulana kachikin nema klakgapaxiʼalhnaw wa Jaú (São Paulo). Anta sacerdote kinkatalatlawan.

Kinkawanin: «¡Ni kakalitachuwinantit Dios kiʼovejas!».

Akinin kkgalhtiw: «Ni wix tapakgsinikgoyan, wa Dios tapakgsinikgo».

Klakkaxwiliw xlakata nakmasiyayaw akgtum película nema wanikan La Sociedad del Nuevo Mundo en acción, pero sacerdote chu kstalaninanin xlaktlawaputunkgo xlakata ni natamatitaxti ama película. Akxni kkatsiw, kkatasaniw policías. Akxni talatlawananin chankgolh kteatro, akxilhkgolh pi xwilakgolh policías tiku  xkalimakaʼanikgonit xlikankan. Latamanin tiku akxilhkgolh película lu lakgatikgolh.

Putum niku xakanaw lichuwinanaw Dios lu xkinkasitsinikgoyan atanu takanajla. Akgtum liʼakxilhtit, kkachikin Brusque, lakatsu niku wi Blumenau (Santa Catarina), klakgapaswi chatiy precursoras. Xlakan xlichuwinankgo Dios niku ni xkaʼakxilhputunkan xtatayananin Jehová, pero xlakata tayanikgolh kgalhikgolh tasikulunalin. La uku, titaxtunita tipuxamakaw kata, wilakgolh liwaka tutumpuxam congregaciones, chu wi akgtum stlan Salón de Asambleas lakatsu kkachikin Itajaí.

Tuku tlakg xaklakgatiyaw akxni xakkalakgapaxiʼalhnanaw congregaciones wa akxni xakkatalakkaxtlawayaw natalan laklanka tamakxtumit. Kxitat 1960, superintendente xla lanka tamakxtumit klitaxtulh kʼEstadio Morumbi. Kawanika max akgtum ciento congregaciones, xlakata xmalakgachakgolh kgalhakaw natalan akgatunu congregaciones, xlakata nakaxakakgo kʼestadio ama katsisni xlakata lichali xʼama tatlawa tamakxtumit.

Ama katsisni, makgapitsi futbolistas tiku xtaxtumakgolh kʼestadio, xwankgo: «¡Kakaʼakxilhtit ama lakpuskatin tiku liminkgo laktsu xlipalhnikan!». Maski kaj «laktsu xlipalhnikan» xlinkgo, lu skulunku tamakgxtakgli estadio itat katsisni. Tiku xliyawakanit nakuentajtlawakan estadio, wa: «¡Akinin xaklitlawakgow akgtum semana tuku wixin litlawatit akgtati hora!».

Kata 1980 nilh kintlat chu ni lhuwa kilhtamaku titaxtulh ktaspitparaw kʼEstados Unidos xlakata nakkuentajtlawayaw kintse kFremont (California). Katsisni xakskujaw klaklanka chiki, niku kaj xakkaxakayaw, xlakata chuntiya naktlawayaw precursorado chu nakkamakgtayayaw latamanin tiku xchuwinankgo portugués. Ni lhuwa kilhtamaku titaxtulh kaw lakatsu kkachikin Fremont, nema wanikan valle de San Joaquín. Nachuna, xakkaputsayaw latamanin tiku chuwinankgo portugués, pero la uku anta xlitsuku xtiyat Sacramento asta kBakersfield. La uku kCalifornia anan akgkaw congregaciones ktachuwin portugués.

Akxni nilh kintse, kata 1995, kaw kFlorida xlakata nakkuentajtlawayaw xtlat Billie asta akxni nilh. Xtse xninita kata 1975. Kata 2000 kaw kxsuroeste Colorado niku wi desierto. Anta kkalitachuwinanaw Biblia, tiku indígenas americanos xalak Navajo chu Utes. Lu nitlan klimakgkatsi xlakata Billie, nilh febrero kata 2014.

Tituxtunita liwaka tutumpuxamakitsis kata akxni chatum xtataya Jehová likgalhtilh Biblia kintakgalhskinin. ¡Lu kpaxuwa xlakata kkgaxmatnilh chu kkatsininit pi xlikana tuku xkiwanima! Xlakata chuna lalh, kmakamaxkilh Dios kilatamat... chu lu tlan kinkitaxtuninit.