Akxni aktsujku xakwanit klatamalh lakatsu kkachikin wanikan Leipzig, xamakgan República Democrática Alemana, lakatsu niku wi Polonia chu lakatsu niku wi República Checa. Akxni xakkgalhi akgchaxan kata kaw latamayaw kBrasil xlakata xtaskujut kintlat, chu alistalh kʼEcuador.

Akxni xakkgalhi akgkutati kata, kinatlatni kimaspitparakgolh kʼAlemania xlakata xakkgalhtawakgalh kʼakgtum internado. Xlakata kinatlatni ni anta xkintawilakgolh kiʼakstu xaktlawa tuku xaklakaskin. Ni xaklakaskin xtamakgtaykan amakgapitsin chu ni xaklilakgaputsa komo nitlan xʼakxilhkgo tuku xaktlawa.

Akxni xakkgalhi akgkutujun kata kinatlatni na taspitkgolh kʼAlemania. Akxtum kkatatawi tsinu kilhtamaku, pero xlakata ni xaklakgati nakiwanikan tuku naktlawa, lu tuwa kmakgkatsilh nakkakgalhakgaxmata, wa xlakata ktaxtulh akxni xakkgalhi akgkutsayan kata.

Chuna la xtitaxtutilhama kilhtamaku ni xaklakgati la xwi latamat, wa xlakata ktsukulh putsa tuku tlan xkimamakgkatsinilh. Kkalakputsananilh makgapitsi tamakxtumit xlakata takgalhtin nema xakkgalhi chu wata klakpuwa nakkan lakgapasnan kputum katiyatni xlakata xaklakpuwan pi chixku xʼama malakgsputu putum tuku stlan anan.

Ktamawalh akgtum moticicleta, ktaxtulh kʼAlemania chu kalh kʼÁfrica. Pero, ni lhuwa kilhtamaku titaxtulh ktaspitli kʼEuropa xlakata xtalakaskin nakkaxtlawa mocicleta. Akxni kkaxtlawalh kalh kxkilhtun pupunu kʼPortugal. Anta klakapastakli nakmakgxtakga motocicleta chu wata nakkan lakgapasnan xlikalanka kKatiyatni.

Akxtum kkatalalh makgapitsi kamanan tiku xʼamakgolh patakutkgo océano Atlántico. Na anta xʼan Laurie, tiku kimpuskat wa alistalh. Kaw kʼisla wanikan Caribe chu kaj tsinu ktitaxtuw kPuerto Rico, alistalh ktaspitparaw kʼEuropa. Laurie chu akit xaktamawaputunaw akgtum barco velero chu kinchikkan xaktlawaputunaw. Pero akgtutu papaʼ lata xakputsamaw, wi tuku lalh nema tlawalh pi alistalhku xakputsaw, xlakata kiwanika pi soldado xakwa kʼAlemania.

 Akgkukitsis papaʼ kskujli kMarina, chu akxni anta xakskujma ktamakgaxtokgwi. Chuntiya xaklakapastaknitaw nakanaw lakgapasnanaw xlikalanka kKatiyatni. Akxni nina xkintasanikan xaktamawanitaw akgtum barco nema wanikan lancha de salvamento akxni xakskujma la soldado, tsinu tsinu la akgtum velero ktlawaw. Xaklakpuwanaw anta kinchikkan naktlawayaw chu chuntiya naklakgapasnanaw xlikalanka Katiyatni. Akxni ktaxtulh kMarina, pero nina xakkaxtlawakgoyaw Barco, kinkatachuwinankgon xtatayananin Jehová chu kinkalimakgalhtawakgekgon Biblia.

Xapulana ni klakpuwa xlakata xtalakaskin lhuwa tuku naklakgpali kilatamat: xaktatamakgaxtokgnit kinpuskat tiku xaktatawilanita chu nialh xakxkuli (Efesios 5:5). Xaklakpuwan pi lu tlan xwa xaklimaklakaskilh kilatamat xlakata xaklakgapasli putum tuku anan kKatiyatni.

Xlikana pi xtalakaskinku naklakgpali kkilatamat, pero tlakg xtalakaskin naklakgpali kintayat. Chuntiya tlankajwa xakwanit chu ni xaklakgati pi xkiwanika tuku naktlawa, nachuna xaklitlankajwanan tuku xakkatsini tlawa. Tlakg xlakaskinka xakakxilha kilatamat.

Milh kilhtamaku klikgalhtawakgalh, Taʼakgchuwin xalak Sipi (Mateo, capítulos 5 asta 7). Xapulana lu kaks kilamalakawanilh xlakata tapaxuwan nema lichuwinalh Jesús. Akgtum liʼakxilhtit, lichuwinalh pi tapaxuwan wa xkalakgchan tiku xtsinksmakgolh chu xkgalhputimakgolh (Mateo 5:6). Pero xkinkgalhskinkan la xatapaxuwan natawila tiku tsinksma chu kgalhputima. Chuna la xakkatsinitilhama tuku xalak Biblia liwana katsilh pi talakaskin nataktujuyaw putum akinin chu nalimasiyayaw pi maklakaskinaw tuku xla Dios. La wa Jesús: «Xatapaxuwan latamakgo tiku katsikgo pi lakaskinkgo tuku xla Dios» (Mateo 5:3).

Laurie chu akit ktsukuw likgalhtawakgayaw Biblia kʼAlemania, pero kaw kFrancia alistalh kʼItalia. Kaniwa xʼanan xtatayananin Jehová. Lu kaks xkimalakawani xlakata la xlapaxkikgo chu xlakata makxtum xlakgo. Akgtum familia xlitaxtukgo xlikalanka Katiyatni (Juan 13:34, 35). Titaxtulh kilhtamaku ktamunuw.

Maski xtatayana Jehová xaklitaxtu, xtalakaskin pi chuntiya xaklakgpalilh kintayat. Laurie chu akit xaklakpuwanitaw naktitaxtuyaw kxkilhtun xpupunu África kbarco chu nakpatakutaw Atlántico asta kʼEstados Unidos. Akxni xaklatajumaw kiakstukan kpupunu chu lhuwa miles kilómetros xkinkalimakgstiliyan chuchut, kkatsilh pi nitu litaxtuyaw kxlakatin kiMalakatsukinakan. Lhuwa kilhtamaku xakkgalhi (kpupunu ni la lhuwa tuku tlawakan), wa xlakata ktsukulh klikgalhtawakga Biblia. Lu klakgatilh tuku klikgalhtawakgalh xlakata xlatamat Jesús. Maski ni xkgalhi talakgalhin chu lu lilakgatit tayat xkgalhi, nikxni lichuwinalh tuku xkatsini tlawa. Tuku tlakg xlakaskinka xakxilha kxlatamat wa xTlat.

Akxni klakpuwa xliʼakxilhtit Jesús, kkatsilh pi xtalakaskin lhuwa kilhtamaku naklichuwinan xTamapakgsin Dios chu ni wa kilhtamaku nema kaj xkiakgataxtuni, wata wa tuku tlakg xlakaskinka xlitaxtulh kilatamat (Mateo 6:33). Akxni kchaw kʼEstados Unidos, kmakgxtakgwi barco chu tlakg kskujnaniw Dios.

Akxni kaj kiʼakstu xkililakgaputsakan, ni xakkatsi komo tlan xʼama kinkitaxtuni putum tuku xaktlawa. La uku ktekgsnit liskgalala nema putum tlan kitaxtu (Isaías 48:17, 18). Nachuna, la uku ktekgsnit tuku tlan kimamakgkatsini kkilatamat: kakninanikan Dios chu kamakgtayakan latamanin xlakata nalakgapaskgo.

Kintamakgaxtokgat lu tlan wi xlakata tastakyaw xalak Biblia. Nachuna, Jehová kinkamaxkinitan chatum stlan tsumat tiku na paxki Jehová.

Kintamakgaxtokgat ni xtachuna la chuchut nema kaks wi. Pero Jehová nikxni kinkamakgxtakgnitan, chu klakkaxwilinitaw pi ni naktaxlajwaniyaw, chu putum kilhtamaku naklipawanaw (Proverbios 3:5, 6).