Chuna la likgalhtawakga kʼartículos nema titaxtulha, xtatayananin Jehová lu xlakaskinka akxilhkgo xTamapakgsin Dios. Max lakgatiya makgapitsi tuku lichuwinan pi natlawa xTamapakgsin, pero max lakpuwana pi xtachuna la akgtum tamanixni.

Talakaskin ni putum nakanajlayaw tuku kgaxmataw (Proverbios 14:15). Chuna tlawakgolh xapulana kstalaninanin Cristo xalak kachikin Berea. * Akxni kgaxmatkgolh xapulana xalakwan tamakatsinin xla Tamapakgsin ni tunkun kanajlakgolh. Pulana akxilhkgolh kBiblia komo «lapi talulokgtat wantu xtawanikgoy» (Hechos 17:11). Uma wamputun pi lakputsanankgolh kxTachuwin Dios tuku xkgaxmatkgonit chu akxilhkgolh pi xlikana xwanit.

Xtatayananin Jehová kkawaniyan pi nachuna katlawa la tlawakgolh xapulana kstalaninanin Cristo kxapulana siglo. Takgalhtawakga nema kmastayaw xtatayananin Jehová kxchikkan latamanin ni taxokgo, uma namaxkiyan talakaskin natamalakxtupiya tuku klichuwinanaw xlakata Tamapakgsin, nema masiya xTachuwin Dios.

Ni kajwatiya nakatsiniya xlakata Tamapakgsin. Na natekgsa xtakgalhtin la umakgolh takgalhskinin.

•   ¿Niku minitanchaw?

• ¿Tuku xlakata lamaw?

• ¿Tuku xlakata Dios masta talakaskin kaʼanalh tapatin?

• ¿Tuku kinkaʼakgspulayan akxni niyaw?

• ¿Namasputukan Katiyatni?

• ¿Tuku talakaskin xlakata xatapaxuwan natawila familia?

Pero likgalhtawakgakan Biblia tlakg xlakaskinka, xlakata uma tlawa pi nalakgtalakatsuwiyaw Dios (Santiago 4:8). Komo tlakg tlan natalalipina Dios, tlakg nakanajlaya tuku natlawa xTamapakgsin mimpalakata la uku chu kilhtamaku nema aku mima. Jesús wanilh xTlat: «Wa uma wamputun latamat nema ni kgalhi xlisputni, pi nalakgapaskgoyan wix, xachastum Dios xaxlikana chu wantiku malakgacha, Jesucristo» (Juan 17:3).