Millones latamanin kKatiyatni, lipawankgo xTamapakgsin Dios. Wa xlakata tlawakgo tuku kalimapakgsilh Jesús kstalaninanin; xla kawanilh pi kskinkgolh «Kamilh milimapakgsin unu kkilakgstipankan. Lakimpi xlikatlanka katiyatna makgantaxtimakaj nawan milimapakgsin» (Mateo 6:10, Hua Xasasti Talaccaxlan, TXS, 1999).

Maski lhuwa katsiputunkgo xlakata xTamapakgsin Dios, pero lhuwa takanajla ni para tsinu lilakgaputsakgo. Historiador H. G. Wells lu kaks malakawanilh xlakata Jesús lu xlakaskinka akxilhli «nema xla xwani Tamapakgsin xala kʼAkgapun», pero kaks malakawanilh xlakata ni lu xtalichuwinan Tamapakgsin «akxni xtlawakgo chu akxni xmasiyakgo lhuwa takanajla tiku xwankgo pi kstalaninanin Cristo».

Xtatayananin Jehová putum kilhtamaku klichuwinanaw xTamapakgsin Dios, ni xtachuna la amakgapitsin takanajla. Akgtum liʼakxilhtit, uma revista nema likgalhtawakgapat wa nema tlakg talakgapasa, tamatitaxtinit kʼ220 tanu tanu tachuwin chu wa nema tlakg tamakgpitsi xlikalanka katiyatni, xlakata tatlawa atsinu ni 46 millones. Pero, ¿tuku tlakg lichuwinan uma likgalhtawakga? Wa lichuwinan tuku wi kxmakni: Makatsinina. Lichuwinan xtamapakgsin Jehová.  *

¿Tuku xlakata lhuwa kliskujaw naklichuwinanaw Tamapakgsin? Xlakata, wa lichuwinan libro nema tlakg xlakaskina nema anan: wa Biblia. Nachuna, liwana kkanajlayaw pi xTamapakgsin Dios wa nalakkaxtlawa taʼakglhuwit nema kgalhikgo latamanin.

Akinin ktlawamaw chuna la kinkawilinin xliʼakxilhtit Jesús. Xla lu xlakaskinka xʼakxilha xTamapakgsin Dios; chu wa tuku tlakg lichuwinalh akxni xlama kKatiyatni (Lucas 4:43). ¿Tuku xlakata lu xlakaskinka xakxilha? ¿Tuku natlawa xTamapakgsin Dios mimpalakata? Kalikgalhtawakga uma artículo, anta natekgsa xtakgalhtin nema masta Biblia.