Julio: Xlikana klipaxuwa akxni lichuwinanaw xlakata Biblia, Ernesto. * ¿Lakapastaka pi kinkgalhskinti xlakata xTamapakgsin Dios? Kiwani pi xkatsiputuna tuku xlakata xtatayananin Jehová kmasiyayaw pi Jesús tsukulh mapakgsinan kata 1914.

Ernesto: Chuna klikgalhtawakgalh kmirevistaskan, pi xTamapakgsin Dios tsukulh mapakgsinan kata 1914, chu kkgalhilh takgalhskinin. Wixin wanatit pi putum tuku kanajlayatit anta takilhtinit kBiblia.

Julio: Chuna, putum tuku kkanajlayaw.

Ernesto: Pero akit putum klikgalhtawakganit Biblia, chu ni ktekgsli uma kata. Wa xlakata kkilalh niku wi Internet chu kputsalh kata 1914 kʼakgtum Biblia, pero nitu xlichuwinan.

Julio: Lu tlan tuku tlawa. Pulana xlakata putum likgalhtawakganita Biblia. Tasiya pi lu xlakaskinka akxilha.

Ernesto: Chuna, akit kakxilha pi nitu tuku xtachuna Biblia.

Julio: Nachuna klakpuwan. Chu xliʼakgtiy, xlakata maklakaskina Biblia xlakata natekgsa xtakgalhtin mintakgalhskinin. Chuna tlawa la wan Biblia pi kilitlawatkan: Pi Chuntiya kaputsaw talakapastakni. * ¡Lu tlan pi liwana lakputsanana!

Ernesto: Paxtikatsinilh Julio. Chuntiya kkatsiniputun. Asta tlakg ktsukulh lakputsanan chu wi tuku ktekgsli xlakata 1914 klibro nema likgalhtawakgamaw. Lichuwinan kgantum lanka kiwi, wan pi pulana tankamika chu alistalh stakpa... Chuna klakapastaka lichuwinan.

Julio: Chuna, wa tuku lichuwinalh palakachuwina Daniel kcapítulo 4 kxlibro. Lichuwinan xtamanaxni Nabucodonosor, mapakgsina xalak Babilonia.

Ernesto: Xlikana, wa tuku klikgalhtawakgalh. Makglhuwa klikgalhtawakgalh pero chuntiya nila kʼakgatekgsa, ¿tuku xlakata tamalakxtumikan kata 1914 xTamapakgsin Dios?

Julio: Nitu kapuwanti. Asta palakachuwina Daniel, tiku tsokgli uma tuku likgalhtawakga na ni akgatekgsli tuku xwamputun.

Ernesto: ¿Xlikana?

Julio: Xlikana. Kaʼakxilhti tuku tsokgli kDaniel 12:8: «Kkgaxmatli, pero nila kʼakgatekgsli».

Ernesto: Xaklakpuwan pi kaj akit nila xakʼakgatekgsa. La uku tlakg tlan kmakgkatsi.

Julio: ¿Katsiya tuku xlakata chuna akgspulalh Daniel? Xlakata Dios xkatsi pi nina xkilhtamaku xwanit naʼakgatekgskan ama tachuwin.  Pero uma talakgpalilha. La uku tlan akgatekgsaw tuku tsokgwililh.

Ernesto: ¿Xlikana?

Julio: Xlikana, versículo 9 lichuwinan. Kaʼakxilhti tuku wan: «Tachuwin tsekg natawila chu niti katikatsilh asta kxaʼawatiya kilhtamaku». Chuna la akxilhmaw, akxniku xtakatsilh kxaʼawatiya kilhtamaku. Tuku akxilhaw la uku litasiya pi kxaʼawatiya kilhtamaku lamaw. Tlakg nalichuwinanaw uma, klibro nema likgalhtawakgamaw. *

Ernesto: ¿Tlan xkilitachuwinanti tuku xwankanit pi xʼama la?

Julio: Naklitsakgsa.

Julio: Pulana kaʼakxilhwi tuku limanaxnalh Nabucodonosor, chu alistalh nalichuwinanaw tuku wamputun. ¿La akxilha?

Ernesto: Tlan.

Julio: Nabucodonosor limanaxnalh kgantum lanka kiwi nema xchan kʼakgapun. Kaj xalan kgaxmatli akxni Dios limapakgsilh kskujni pi xtankamilh ama kiwi. Kaj watiya tamakgxtakgli xtankgaxekg chu xʼakgxkgolh. Alistalh titaxtulh «pulaktujun kilhtamaku» chu kiwi stakpa. * Uma tuku xlichuwinankanit kgantaxtulh akxni xlama Nabucodonosor. Chatum mapakgsina tiku lhuwa litliwakga xkgalhi; xtachuna xwanit la kiwi nema xchan kʼakgapun. Pero xtachuna la tankamika chu «pulaktujun kilhtamaku» ni mapakgsinalh. ¿Lakapastaka tuku wamputun uma?

Ernesto: Mmm... Ni klakapastaka.

Julio: Biblia lichuwinan pi nialh xlakpuwan tuku xtlawa chu max akgtujun kata chuna lalh o «pulaktujun kilhtamaku». Wa xlakata nialh mapakgsina litaxtulh, pero akxni sputli ama kilhtamaku, tatlanipa chu mapakgsina litaxtupa. *

Ernesto: Ktsukuma akgatekgsa. Pero ¿la tatalakxtumi putum uma xlakata xTamapakgsin Dios chu kata 1914?

Julio: Xlakata kgantaxtunit pulaktiy tuku xtalichuwinanit. Xapulana akxni makglhtika xtamapakgsin Nabucodonosor. Chu xlipulaktiy, akxni Dios nialh mapakgsinalh kKatiyatni. Xlipulaktiy kilhchanima la kgantaxtulh xTamapakgsin Dios.

Ernesto: ¿La likatsiya pi makgtiy kgantaxtulh uma?

Julio: Wa kinkamaxkiyan xatakgalhtin tuku xtalichuwinanit pi xʼama la. Daniel 4:17 wan xlakata latamanin nakatsikgo «xala Talhman wa Mapakgsina kxtamapakgsin latamanin, chu tiku xla namaxkiputun maxki». ¿Akxilhti tachuwin «kxtamapakgsin latamanin»?

Ernesto: Kakxilhli, wan pi «xala Talhman wa Mapakgsina kxtamapakgsin latamanin».

Julio: ¿Tiku wix lakpuwana lichuwinamaka unu?

Ernesto: Wa Dios, ¿ni chuna?

Julio: Chuna. Uma tachuwin kinkamasiyaniyan pi ni kaj wa lichuwinama Nabucodonosor. Na wa kilhchanima «kxtamapakgsin latamanin», uma wamputun pi Dios tlan kamapakgsi latamanin. Komo liwana naʼakxilhaw tuku xtalichuwinanit pi xʼama la, tlakg naʼakgatekgsa tuku lichuwinamaw.

Ernesto: Kakilitachuwinanti.

Julio: Xlibro Daniel makglhuwa lichuwinan: xlakata xTamapakgsin Dios chu tiku pulalin uma Tamapakgsin, wa xkgawasa. Kaʼakxilhwi akgtum liʼakxilhtit. Katlawa litlan kalikgalhtawakga Daniel 2:44.

Ernesto: Wan: «Kxkilhtamaku ama mapakgsinanin wa Dios xalak akgapun nawili akgtum tamapakgsin nema nikxni katisputli. Chu ama tamapakgsin ni katimatitaxtinika atanu kachikin. Nakalakxpula chu nakamasputu putum  tamapakgsin chu ama tamapakgsin xliputum kilhtamaku natawila».

Julio: Lu tlan. ¿Lakpuwana pi uma versículo lichuwinama xTamapakgsin Dios?

Ernesto: Mmm... Ni liwana kkatsi.

Julio: Uma versículo wan pi uma tamapakgsin «nikxni katisputli». ¿Tiku tlan nawili akgtum tamapakgsin nema nikxni katikgalhilh xlisputni?

Ernesto: Niti.

Julio: Xlikana. Kaputsaw atanu texto nema na lichuwinan xTamapakgsin Dios. Daniel 7:13, 14 lichuwinan chatum lataman tiku mapakgsina xʼama litaxtu. Kaʼakxilhti tuku wan: «Maxkika tamapakgsin, chu lilanka chu pumapakgsin, xlakata kachikinin, pulaklhuwa kachikinin chu tanu tanu tachuwin putum naskujnikgo. Wa xtamapakgsin akgtum tamapakgsin nema nikxni katisputli ni katititaxtulh, xtamapakgsin nikxni katimalakgsputuka». Unu kversículos wi tuku lichuwinawa.

Ernesto: Lichuwinamparakan xtamapakgsin.

Julio: Chuna. Pero uma tamapakgsin ni xtachuna la amakgapitsin. Komo liwana akxilha, wan pi kamapakgsi putum «kachikinin, pulaklhuwa kachikinin chu tanu tanu tachuwin». Uma wamputun pi mapakgsinan xlikalanka kKatiyatni.

Ernesto: Ni xakakxilhnit, pero xlikana tuku wana.

Julio: Kaʼakxilhti amakgtum tuku wan unu: «Wa xtamapakgsin akgtum tamapakgsin nema nikxni katisputli ni katititaxtulh, xtamapakgsin nikxni katimalakgsputuka». ¿Ni xlikana pi uma versículo xtachuna Daniel 2:44 nema likgalhtawakgaw?

Ernesto: Xlikana.

Julio: Kaʼakxilhwi tuku lichuwinawa. Tuku talichuwinan kcapítulo 4 xla Daniel kaj kamakatsiniputun latamanin pi «xala Talhman wa Mapakgsina kxtamapakgsin latamanin». Uma limasiya tiku na makgantaxti uma tuku xlichuwinankanit, tlakg lanka ni xtachuna Nabucodonosor. Nachuna, putum kxlibro Daniel tekgsaw nema na watiya lichuwinankgo: kilhtamaku akxni xTamapakgsin Dios napulalin Jesucristo. Putum uma limasiya pi tuku lichuwinan capítulo 4 xlibro Daniel wa kilhchanima xTamapakgsin Dios, ¿ni xlikana?

Ernesto: Xlikana. Pero ni kʼakgatekgsa, tuku xlakata tamalakxtumikan kata 1914.

Julio: Kalichuwinamparaw amakgtum mapakgsina Nabucodonosor. Lichuwinaw pi uma mapakgsina wa xapulana makgantaxtilh. Xtamapakgsin makglhtika tsinu kilhtamaku akxni tankamika kiwi chu pulaktujun kilhtamaku titaxtulh. Ama kilhtamaku Nabucodonosor nialh liwana xlakapastaknan, pero akxni titaxtulh ama kilhtamaku tatlanipa chu taspitpa niku xmapakgsinama. Xlimakgtiy akxni kgantaxtulh, xTamapakgsin Dios nialh mapakgsinalh kKatiyatni, xlakata chuna lalh ni wamputun pi Dios tlawalh tuku nitlan.

Ernesto: Ni kʼakgatekgsa.

Julio: Lichuwinankan pi makgasa xwankan pi mapakgsinanin xalak Israel xtawilakgo «kxpumapakgsin Jehová». * Uma wamputun pi wa Dios xkawilinit. Akxni xtawilakgo la mapakgsinanin xlitaxtu la komo wa Dios tiku xmapakgsinama. Pero, titaxtulh kilhtamaku chu lhuwa tiku xmapakgsinankgo  nialh kgalhakgaxmatnankgolh, chu nachuna kachikin tatayakgolh akxni xtlawakgo tuku nitlan. Wa xlakata Dios mastalh talakaskin pi Babilonia xʼakgchipalh Israel kata 607 akxni nina xmin Jesús. Ama kilhtamaku nialh analh mapakgsinanin tiku wa Jehová xkawilinit kJerusalén. Tlan nawanaw pi Dios nialh mapakgsinalh. ¿Akgatekgspat?

Ernesto: Kʼakgatekgsma.

Julio: Pulaktujun kilhtamaku tsukulh kata 607 akxni nina xmin Jesús. Wa uma kata akxni Dios nialh mapakgsinalh. Akxni sputli ama kilhtamaku, Dios wililh atanu mapakgsina xlakata wa xpalakachuwinalh, pero uma mapakgsina xtawilacha kʼakgapun. Tuku lichuwinaw nema tsokgli Daniel na kgantaxtulh akxni sputli pulaktujun kilhtamaku. Pero tawila akgtum takgalhskinin: ¿Tuku kata sputli pulaktujun kilhtamaku? Komo natekgsaw ama takgalhtin, nakatsiya tuku kilhtamaku tsukulh mapakgsinan xTamapakgsin Dios.

Ernesto: ¿Kata 1914?

Julio: Chuna, Ernesto.

Ernesto: Pero, ¿la litakatsi pi kata 1914 tsukulh mapakgsinan xTamapakgsin Dios?

Julio: Akxni kichilh Jesús kKatiyatni, lichuwinalh pi pulaktujun kilhtamaku nina ksputa. * Uma wamputun pi lichuwinamaw akgtum kilhtamaku nema makgas makgapala. Pulaktujun kilhtamaku litsukulh akglhuwa siglos akxni nina xmin Jesús kKatiyatni, chu akglhuwa siglos titaxtulh akxni xʼanita kʼakgapun. Na kalakapastakti pi lichuwinaw pi ni xʼama takgatekgsa tuku tsokgli Daniel, xtaʼakgatekgsli asta akxni xmilh «xlikgalhsputat kilhtamaku». * Chu wi tuku lalh akxni ksputma siglo XIX, ni lhuwa xlikgalhtawakgananin Biblia lakpuwankgolh tlakg nalakputsanankgo xlakata uma, chu Biblia na xlichuwinanit pi wi tuku xʼama kgantaxtu. Lakatsuku akgatekgskgolh pi pulaktujun kilhtamaku xʼama kgalhsputa kata 1914. Putum tuku lanit xlikalanka kKatiyatni litasiya pi akxni ama kata tsukulh mapakgsinan xTamapakgsin Dios, chu tsukulh nema wanikan xlisputni kilhtamaku. Kkatsi pi nila putum naʼakgatekgsa uma, Ernesto.

Ernesto: Talakaskin liwana naklikgalhwakga xlakata nakʼakgatekgsa.

Julio: Kʼakgatekgsniyan. Akit tuwa kmakgkatsilh xlakata nakʼakgatekgsa. ¿Makgtayan xlakata nakatsiya pi kBiblia kkilhtiyaw akxni klichuwinanaw xTamapakgsin Dios?

Ernesto: Chuna, kimakgtayalh. Putum kilhtamaku kaks kimalakawani xlakata lu lipawanatit Biblia.

Julio: Kakxilha pi nachuna kanajlaniputuna. Lu tuwa putum naʼakgatekgsa chu max kgalhiya lhuwa takgalhskinin. Akgtum liʼakxilhtit, lichuwinaw pi pulaktujun kilhtamaku tsukulh kata 607 akxni nina xmin Jesús, chu tatalakxtumi xTamapakgsin Dios. Pero, ¿tuku xlakata wanaw pi sputli kata 1914? *

Ernesto: Wa uma tuku ni kʼakgatekgsa.

Julio: Biblia kinkamakgtayayan nakatsiyaw la makgapalalh uma pulaktujun kilhtamaku. ¿Lakaskina nalichuwinanaw uma atanu kilhtamaku? *

Ernesto: Tlan, nakkgalhkgalhiyan.