Julio: Tlen Ernesto. Lu kpaxuwa klakgapaxialhnanan akgatunu semana xlakata naklitachuwinanan Biblia. * ¿La wila?

Ernesto: Tlan.

Julio: ¡Lu tlan! Akxni klakgapaxialhnan lichuwinaw tuku xlakata xtatayananin Jehová kwanaw pi xTamapakgsin Dios tsukulh mapakgsinan kata 1914. * Akxilhwi kcapítulo 4 kxlibro Daniel niku kinkawaniyan tuku xlakata chuna kwanaw. ¿Lakapastaka?

Ernesto: Klakapastaka, tamanaxnat nema kgalhilh mapakgsina Nabucodonosor.

Julio: Chuna. Limanaxnalh kgantum lanka kiwi nema xchan kʼakgapun. Kxtamanaxnat kgaxmatli akxni xʼángel Dios limapakgsilh pi xtankamika ama kiwi. Kaj watiya tamakgxtakgli xtankgaxekg chu xʼakgxkgolh. Alistalh titaxtulh «pulaktujun kilhtamaku» chu kiwi stakpa. * Nachuna, akxilhwi pi makgtiya kgantaxtunit tuku xlichuwinankanit pi xʼama la. ¿Lakapastakaku xapulana?

Ernesto: Akxni Nabucodonosor nialh xlakpuwan tuku xtlawa chu akgtujun kata chuna lalh, ¿ni chuna?

Julio: Xlikana. Ni liwana xlakpuwan chu wa xlakata nialh mapakgsinan wa. Pero, xlimakgtiy akxni kgantaxtulh tuku xlichuwinankanit, wa akxni Dios nialh mapakgsinalh kKatiyatni pulaktujun kilhtamaku. Uma tsukulh kata 607 akxni nina xmin Jesús, akxni Jerusalén masputuka. Ama kilhtamaku litsukulh akxni nialh analh mapakgsinanin tiku Jehová xkawilinit kKatiyatni. Akxni ksputli uma kilhtamaku, Dios xʼama wili atanu mapakgsina, pero anta kʼakgapun. Uma kilhchanima, akxni ksputli pulaktujun kilhtamaku, xtsukulh mapakgsinan xTamapakgsin Dios kʼakgapun. Akxilhwa tuku kilhtamaku tsukulh pulaktujun kilhtamaku. La uku naʼakxilhaw la xlilhuwa makgapalalh xlakata nakatsiyaw tuku kata tsukulh mapakgsinan xTamapakgsin Dios. ¿Akgatekgspat?

Ernesto: Kʼakgatekgsma. Ktsukuma lakapastaka tuku lichuwinaw.

Julio: Lu tlan. Kaʼakxilhwi la xlilhuwa makgapalalh pulaktujun kilhtamaku. Xlakata tlan xaklakapastakli la titaxtulh uma, liwana klikgalhtawakgapa. Naklitachuwinanan la kgantaxtulh.

Ernesto: Tlan.

Julio: Tiku pulana makgantaxtilh tuku xlichuwinankanit, wa Nabucodonosor, uma pulaktujun  kilhtamaku makgapalalh akgtujun kata. Pero xlipulaktiy tuku kgantaxtulh, wa kilhchanima xTamapakgsin Dios, uma tlakg makgapalalh.

Ernesto: ¿La katsiya uma?

Julio: Xlakata naʼakgatekgsaw, pulaktujun kilhtamaku litsukulh akxni masputuka Jerusalén, kata 607 akxni nina xmin Jesús. Komo akgtujun kata naputlekgayaw chan kata 600 akxni nina xmin Jesús chu uma kata nitu lalh nema xtatalakxtumilh tuku xwankanit xlakata xTamapakgsin Dios. Chuna la lichuwinawa, akxni Jesús kichilh kKatiyatni, lichuwinalh pi pulaktujun kilhtamaku nina xkgalhsputa.

Ernesto: Xlikana.

Julio: Uma wamputun pi pulaktujun kilhtamaku, ni akgtujun kata kilhchanima; kilhchanima tlakg makgas kilhtamaku.

Ernesto: ¿Tlakg makgas? ¿La xlilhuwa kilhtamaku?

Julio: Anta klibro xla Revelación, o Apocalipsis, talichuwinan nema lu xtachuna tuku tatsokgnit kxlibro Daniel, chu nakinkamakgtayayan nakatsiyaw la xlilhuwa makgapalalh pulaktujun kilhtamaku. Kʼuma libro talichuwinan pi pulaktutu kilhtamaku aitat kilhchani 1,260 kilhtamaku. * Uma wamputun pi pulaktujun kilhtamaku kitaxtu 2,520 kilhtamaku. ¿Akgatekgspat?

Ernesto: Chuna, pero nina lu liwana kʼakgatekgsa tuku xlakata kanajlayatit pi xTamapakgsin Dios tsukulh kata 1914.

Julio: Tlan kalichuwinaw. Chuna la akxilhwi, makgapitsi nema talichuwinan kBiblia tuku xʼama la, akgtum kilhtamaku kilhchani akgtum kata. * Uma wamputun pi 2,520 kilhtamaku kilhchanima 2,520 kata. Kkata 607 akxni nina xmin Cristo litsukulh pulaktujun kilhtamaku, komo xputlakgaw 2,520 chan kkata 1914. * Wa xlakata kwanaw pi ama kata sputli pulaktujun kilhtamaku chu Jesús Mapakgsina tlawaka kxTamapakgsin Dios. Nachuna, kata 1914 tsukulh kgantaxtu tuku xlichuwinankanit kBiblia pi xʼama la kxaʼawatiya kilhtamaku.

Ernesto: ¿Tlan xwili akgtum liʼakxilhtit?

Julio: Anta kMateo 24:7. Jesús lichuwinalh tuku xʼama la akxni tsukulh mapakgsinan kʼakgapun: «Kachikinin natsukuy lalakatakikgoy, natlawakgoy guerra, chu laktlanka tiyat nalamakgasitsiy, chu natlawakgoy guerra. Xawa lhuwa lipekua nalay ntatsinkstat, chu lakaxtum natachikiy tiyat». Kaʼakxilhti, Jesús wa pi xʼama anan tatsinkstat chu xʼama tachiki tiyat. ¿Ni xlikana pi putum kgantaxtunit uma, ksiglo nema titaxtunit chu asta la uku?

Ernesto: Xlikana.

Julio: Jesús na lichuwinalh pi xʼama anan guerras. Chu libro xla Apocalipsis lichuwinalh pi ni kaj kʼakgtum país, wata xlitilanka katiyatni xʼama anan guerra nema xlakgpalilh kakilhtamaku. * ¿Lakapastaka tuku kilhtamaku lalh xaPulana Guerra xLikalanka Katiyatni?

Ernesto: Kata 1914. Akxni wanatit pi Jesús tsukulh mapakgsinan. Ni para makgtum chuna xaklakpuwanit.

Julio: Xlikana, akxni tamalakxtumiyaw tuku  xlichuwinankanit xlakata pulaktujun kilhtamaku chu nema talichuwinalh xlakata xaʼawatiya kilhtamaku putum talakxtumi. Xtatayananin Jehová liwana kkatsiyaw pi Jesús tsukulh mapakgsinan kata 1914 wa xlakata lamaw xaʼawatiya kilhtamaku. *

Ernesto: Aku ktsukuma akgatekgsa putum uma.

Julio: Kʼakgatekgsniyan. Akit nachuna tuwa kmakgatsilh xapulana. Klakpuwan pi tuku lichuwinaw namakgtayayan tsinu, xlakata naʼakgatekgsa pi maski ni talichuwinan kBiblia kata 1914, xtatayananin Jehová liwana klakputsananiw, wa xlakata kwanaw pi Jesús tsukulh mapakgsinan uma kata. Klakpuwan putum tuku kmasiyanin xla kintakanajlakan kBiblia takilhtinit.

Ernesto: Xlikana uma kaks kimalakawani. Biblia limaklakaskina akxni wi tuku kiwaniya. Maski katuwa tuku kkgalhskinan nikxni wana «Akit klakpuwan» o «Klakapastaka». Putum kilhtamaku limaklakaskina Biblia. Pero, ¿tuku xlakata lu tuwa akgatekgskan? ¿Tuku xlakata Dios ni tsokgwililh kxtachuwin pi Jesús mapakgsina xʼama wan kata 1914?

Julio: Lu tlan mintakgalhskinin. Lhuwa tuku lichuwinan Biblia ni putum kinkawaniyan. ¿Tuku xlakata chuna tlawalh Dios? ¿Tuku xlakata liwana naliskujaw xlakata naʼakgatekgsaw? ¿Tlan xlichuwinaw uma, semana nema aku mima?

Ernesto: Tlan nawan.