XTITAXTUMA kata 1765. Explorador escocés tiku ni xpekuan, James Bruce nila xkanajla tuku xakxilhma. Kxlakatin xya akgtum arco romano nema xtatapunit tsinu, anta kxdesierto argelino. Pero ni kajwatiya uma tuku tekgsli; maski ni xkatsi, Bruce anta xya niku romanos xtlawakgonit akgtum lanka kachikin kxnorte Africa: xamakgan Thamugadi, la uku wanikan Timgad.

Akxni xtitaxtunita liwaka akgtum siglo, kata 1881, arqueólogos xalak Francia tsukukgolh makxtukgo nema atsinu xtamakgxtakgnit kʼama kachikin, nema nitu xlaninit. Wi atanu tuku na tekgskgolh, maski kaskakni xwanit chu nitu xʼanan, latamanin tiku anta latamakgolh lhuwa tuku xkgalhikgo nema xkgalhi xtapalh. ¿Tuku xlakata romanos tlawakgolh akgtum kachikin niku lu kaskakni xwanit? ¿Chu tuku kinkamasiyaniyan ama lanka kachikin chu tiku anta latamakgolh?

Romanos mapakgsinankgolh asta kxnorte África ksiglo I akxni nina xmin Jesús, pero makgapitsi tribus nema ni kaj lakatum xtawilakgo, chuntiya ni xmastakgo talakaskin nakamapakgsikgo romanos. Xlakata romanos xtayanikgolh tlawakgolh niku tlan xtamakgxtakgkgolh soldados chu tlawakgolh niku tlan kskgalananka, anta xwilakgolh kxsipi nema la uku lilakgapaskan Argelia (wa soldados xla Tercera Legión Augusta tiku tlawakgolh). Pero, ni lhuwa kilhtamaku titaxtulh tlawakgolh kachikin wanikan Timgad, pero wi tuku xlakpuwankgonit nalimaklakaskinkgo.

Wa romanos tiku tlawakgolh uma kachikin, xlakata anta xlatamakgolh tiku nialh soldados xlitaxtukgo, pero uma kaj xlimaklakaskinputunkgo xlakata tribus xtapakgsiniputunkgolh Roma... chu chuna kitaxtulh la xlakpuwankgonit. Tuku tlan xʼanan klanka kachikin tsukukgolh lakgatilakankgo tribus, tiku anta xʼankgo stakgo tuku xmakgalakgo. Lhuwa lakgatilakankgolh uma latamat, chu skujkgolh la soldados xalak Roma puxamakitsis kata xlakata xkalilakgapaska la romanos chu xlakgkgawasankan, xlakata kaj wa tlan xlatamalh kTimgad tiku la romano xlitaxtu.

Makgapitsi africanos ni kaj soldados litaxtukgolh, na lakgatayakgolh tlakg xlakaskinka taskujut kʼuma kachikin o kʼatanu kachikinin nema xtapakgsini Roma. Lu tlan kakitaxtunilh romanos tuku xlakkaxwilikgonit, akxni kajku tipuxamakaw kata xtitaxtunit lata xtlawakanit Timgad, atsinu ni putum tiku anta xwilakgolh xalak Africa xwankgonit.

Ni lhuwa kilhtamaku titaxtulh romanos kamakgapaxuwakgolh latamanin xlakata ni xlaksakpaxkinankgo, chuna tlawakgolh la xwan chatum politico xalak Roma xwanikan Cicerón. Tiyat akxtum kamapitsinika romanos chu africanos. Nachuna, liwana laklhkaka lanka kachikin: xwilakgolh putawilh nema xkgalhi 20 metros xlitilanka chu 20 metros xlilhman, xlipapitsikgo pulaktsu tiji. Putum uma, tlawalh pi africanos lu xlakgatikgolh.

Chuna la klakalhuwa kachikin nema xtapakgsini Roma, latamanin xalak Timgad xtamakxtumikgo niku xwanikan foro, akxni lhuwa latamanin xlatamakgo kmercado, anta niku xkgamanankgo o xkgaxmatkgo xasasti tamakatsinin. Latamanin xalak kaskakni sipi niku nitu xla, max xlakpuwankgo pi tlan anta xtlawankgolh niku kaskgekgni xwanit niku xyakgolh columnas; xjaxkgolh niku xtaxtu xachichi chuchut kkatiyatni chu ni xtaxokgo, o xtawilakgolh kxkilhpan lakstlan fuentes chu anta xtachuwinankgolh xʼamigoskan. ¡La akgtum tamanaxnat xʼakxilhkgo!

Teatro na kamakgtayalh romanos xlakata xmakgapaxuwakgolh africanos. Kteatro nema ni xkgalhi xakgstin xtanukgo liwaka 3,500 latamanin xalak Timgad chu kachikinin nema lakatsu xwilakgolh. Tiku xmalakgastaninankgo xlimaklakaskinkgo talakgxtumit xalimaxana chu latlawanikan tuku nitlan xlakata xlipaxuwakgolh tiku xlakgastanamakgolh.

Atanu tuku na makgtayanalh wa takanajla. Katiyatni chu patsaps niku xpaxkan xlitatlawanit lakswan mosaicos tipalhuwa la xtamaninit chu xkgalhikgo dibujos tuku xkanajlakgo romanos. Kʼuma niku xpaxkan lu lhuwa latamanin xʼankgo, wa xlakata tsinu tsinu tsukukgolh lakgapaskgo tuku xkanajlakgo romanos chu xdioseskan. Lu tlan kakitaxtunilh, xlakata xlakaskinkgo pi africanos xlakgatikgolh tuku xkanajlakgo romanos asta xlikaxtlawanankgo trinidad xla dioses africanos chu romanos.

Akxni Trajano matsukilh kachikin kata 100 akxni xminita Jesús, romanos tsukukgolh makgalakgo liwat kxnorte África la cereales, aceite de oliva chu vino. Ni lhuwa kilhtamaku titaxtulh uma kachikinin litaxtukgolh niku xmakikan putum tuku xmakgalakgo romanos. Kachikin Timgad tsukulh kgalhi lhuwa tumin chu talhuwikgolh latamanin, talakaskilh pi xmalankika uma lanka kachikin asta kxkilhtin xpatsaps.

Tiku xlamakgolh kʼuma kachikin chu xmalanakan katiyatni lu tlan kakitaxtunilh xlakata xtatlawakgo negocios romanos, pero latamanin tiku lakatsunin xwilakgolh ni nitlan xkakitaxtunima. Ksiglo III, tuku ni xaʼakgstitum chu xlakata lhuwa xmatajinankan impuestos tlawalh pi xlakatakinangolh tiku kskujkgo kkapukuxtun. Makgapitsin tiku católicos xwankgonit talakgapalikgolh, chu donatistas litaxtukgolh, akgtum grupo tiku xwankgo pi mat cristianos xlitaxtukgo lakatakinankgolh xlakata ni xtlawakan tuku xaʼakgstitum ksikulan. (Kaʼakxilhti recuadro « Donatistas: ¿akgtum takanajla xaskulunku?».)

Xlakata akglhuwa siglos makgapalalh guerras xlakata takanajla, xlachipakgo kachikinin tiku watiya país xtapakgsikgo chu talachipakgolh xalak atanu países, Roma nialh mapakgsilh xnorte  África. Ksiglo VI, tribus tiku árabes xwankgonit masputukgolh Timgad. Uma tlawalh pi Timgad nialhti xlakapastakli, chu anta tamakgxtakgli liwaka akgtum milh kata.

Uma tatsokgni klatín makgalitsinkgolh arqueólogos nema tekgskgolh niku xwi foro xla kachikin: «Talatnankan, paxkan, kgamanankan, litsiyankan. ¡Uma xlikana latamat!». Chatum historiador xalak Francia lichuwinan uma tatsokgni «limasiya akgtum talakapastakni nema ni lhuwa tuku xkgalhiputun, pero makgapitsi wankgo pi mat wa uma litekgskan liskgalala».

Romanos makgasata chuna xkgalhikgo uma tapuwan. Apóstol pablo tiku latamalh kxapulana siglo lichuwinalh pi xwilakgolh latamanin tiku xwankgo «kawayaw, chu [kakgotnaw], xampi ni katsiyaw pala chali, usu tuxama naniyaw». Maski lu kanajlanin xwankgonit, romanos kajwatiya xlipaxuwakgo tuku xkgalhikgo ama kilhtamaku chu ni xlakapastakkgo tuku xlakata xlamakgolh. Pablo kastakyawalh kstalaninanin Cristo pi ni akxtum xtalakgolh ama latamanin. Wa: «Ni kataʼakgskgawitapatit. Katalalinkan tiku ni xlilat, tlawakgo pi namakgxtakgaw xatlan talismanin» (1 Corintios 15:32, 33, TNM).

Maski titaxtunita akgtum milh akgkitsiciento kata akxni latamakgolh latamanin xalak Timgad, pero la uku nachuna lakpuwankgo lhuwa latamnin. Latamanin xala uku lakpuwankgo pi xlikana tuku xwankgo romanos: kalipaxuwaw tuku anan uku chu ni kalilakgaputsaw la nakitaxtu. Pero Biblia kinkastakyawayan pi skgalala nawanaw. Xlakata «uma kakilhtamaku nialh makgas namasputukan», kinkawaniyan: «Wa nti mpala tu maklakaskinkgoy wa ntu xala katuxawat, xtachuna kawankgolh [la] wa nti ni lhuwa maklakaskimputunkgoy» (1 Corintios 7:31).

Tuku atsinu akgataxtunit kachikin xla Timgad limasiya pi xlakata nalipaxuwakan latamat, talakaskin ni kaj nalilakpuwanaw tuku anan uku. Talakaskin nalakapastakaw pi «kakilhtamaku titaxtuma, chu nachuna tuku lakgati, pero tiku tlawa xtalakaskin Dios putum kilhtamaku latama» (1 Juan 2:17).