Kata kata millones latamanin paskuajnankgo kNavidad. Makgapitsi lakpuwankgo akxtum nakatatawilakgo xfamiliajkan chu xʼamigoskan; chu makgapitsi lakpuwankgo pi uma kilhtamaku nalakapastakkgo Dios o nakamakgtayakgo tiku nitu kgalhi. Maski uma, lu tlan tapuwan, wi tuku ni katsikgokan xlakata Navidad.

Lhuwa latamanin lakpuwankgo pi Navidad tlawakan xlakata akxni lakachilh Jesús. Pero, lhuwa historiadores wankgo pi niti katsi tuku fecha lakachilh Jesús. Libro The Christian Book of Why (Tuku xlakata xtlawakgo uma cristianos) wan pi «xapulana kstalaninanin Cristo ni wilikgolh fecha akxni lakachilh Jesús» xlakata ni xtlawaputunkgo «talismanin xalak kakilhtamku». Nachuna, Biblia nikxni lichuwinan pi Jesús tlawalh paskua akxin wi tiku xlakachin, na niparawa xla. Kajwatiya kawanilh kststalaninanin pi xlakapastakkgolh akxni nilh (Lucas 22:19).

Nachuna, lhuwa tiku lakputsanankgo wankgo pi talismanin nema tatlawa, chu tiku kalichuwinankan kNavidad ni wa makilhtsukikgolh kstalaninanin Cristo, la Santa Claus, kiwi xla Navidad, lamaxkikan tamaskiwin, wilikan velas, villancicos, kaxtlawanakan, chu makgapitsi liwat nema tatlawa kʼuma kilhtamaku. Maktum libro xla takanajla católica wan: «¿Tiku katsi pi lamaxkikan tamaskiwin xla Navidad o wilikan likaxtlawan kmalakcha chu niku yakgolh pusikulan akgtum talismanin nema ni kBiblia takilhti?» (The Externals of the Catholic Church).

Pero max wix lakpuwana: «Uma talismanin ni katlawani tuku nitlan amakgapitsin». Chuna max. Pero ¿tuku lakpuwan Dios xlakata uma? Biblia masiya pi xkajni komo natamalakgxtumikan xaxlikana takanajla chu xtalismaninkan ni xaxlikana takanajla. Anta kʼAmós 5:21, 23 akxilhaw tachuwin nema Jehová kawanilh israelitas tiku ni xtlawamakgolh xtalakaskin: «¡Akit kxkajni mimpascuajkan xla takanajla!» Chu wa: ¡Lakatanu kapitit kilhtliyatit!» (Traducción en lenguaje actual).

¿Tuku xlakata chuna kawanilh? Kaʼakxilhwi tuku xlanit. Kkachikin Israel xwi mapakgsina tiku xwanikan Jeroboán chu xmatlawinanit laktsu toros xla oro kxkachikin Dan chu Betel. Alistalh kawanilh latamanin pi wa xlimaklakaskikgolh xlakata xkakninaninanikgolh Jehová; chu nialh xtalakaskilh xʼankgolh kJerusalén. Nachuna, xlakkaxtlawakanin xasasti pascuas chu xkawilinit sacerdotes xlakata xtatlawakgolh uma pascua (1 Reyes 12:26-33).

Max tlan tapuwan xkgalhikgo israelitas. Xlakata watiya xkakninanimakgolh Jehová. Pero xla maklakaskilh palakachuwina Amós chu atanu palakachuwinin xlakata xkawanilh tuku xlakpuwan xlakata uma. Chu akxni xtitaxtunita akglhuwa siglos kamalakapastakapa: «Akit Jehová; ni ktalakgpalinit» (Malaquías 3:6). La uku Jehová chuntiya lakpuwan. Wa xlakata, ¿la lakpuwana pi makgkatsi akxni tlawakan talismanin xla Navidad?

Xlakata lichuwinaw uma, millones latamanin nialh tlawakgo pascua xla Navidad. Wata xatapaxuwan tatawilakgo xfamiliajkan chu xʼamigoskan, chu kamakgtayakgo amakgapitsin... putum kilhtamaku.