LICHUWINAN TUKU WI KXMAKNI REVISTA | TLAN XʼAMIGO DIOS NAWANA
¿Xwanti pi miʼamigo Dios?
«Xʼamigo Dios wankan nitu pekuanikan chu tlakg tlan tawilakan. Makgkatsikan pi kuentajtlawaman chu lakaskin pi tlan nakitaxtuniyan.» (CHRISTOPHER, KGAWASA XALAK GHANA)
«Dios akxilhan akxni lipuwampat o lakgaputsapat chu kuentajtlawayan chu maxkiyan lhuwa xtapaxkit.» (HANNAH, AKTSU TSUMAT TIKU KGALHI 13 KATA XALAK ESTADOS UNIDOS)
«Akxni kkatsi pi Dios kiʼakxilha la chatum xʼamiga ni tu kpekuani. Wa uma nema tlakg lhuwa xtapalh kkgalhi.» (GINA, PUSKAT XALAK JAMAICA TIKU MAX KGALHI 45 KATA)
Christopher, Hannah chu Gina ni kaj xakstukan chuna lakpuwankgo. Lhuwa latamanin xlikalanka kkatiyatni kanajlakgo pi Dios kaʼakxilha la xʼamigos. ¿Chu wix? ¿Makgkatsiya pi lakatsu wilani Dios? ¿Lakaskina tlan natalalipina Dios? Max nalakpuwana: «¿La naktalalin Dios tiku kgalhi putum litliwakga xlakata akit kaj lataman?».
TLAN XʼAMIGO DIOS NAWANAW
Biblia kinkawaniyan pi tlan natalalinaw kiMalakatsukinakan. Akgtum liʼakxilhtit, Isaías 41:8 wan pi Dios wanilh Abrahán «kiʼamigo». Na kaʼakxilhti tuku kinkawaniyan Santiago 4:8: «Wa Dios nti nkatalakatsuwinitit, na nakatalakatsuwiniyan xla». Uma wamputun pi tlan xʼamigo Dios nawanaw. Pero ¿la natalakatsuwiniyaw komo ni akxilhaw?
Xlakata nakgalhtiyaw uma takgalhskinin kalakapastakwi la tsukukan tlan talalinkan achatum. Akxni chatiy latamanin lalakgapaskgo, pulana lawanikgo xtukuwanikan. Komo chuntiya nalatachuwinankgo tsukukgo lawanikgo tuku lakapastaknankgo, la makgkatsikgo chu uma tlawa pi tlakg tlan nalatalalinkgo. Uma tlawa pi tlakg natatliwakglha akxni wi tuku tlawa xpalakata achatum. Nachuna kitaxtu xlakata la talalinkan Dios. Tlakg kalichuwinaw uma.
Max na nalakgatiya uma
MAKATSININA
¿Lakgapasa xtukuwani Dios?
Dios kinkawaniyan xtukuwani kBiblia: «Akit Jehová. Wa uma kintukuwani».
