LICHUWINAN TUKU WI KXMAKNI REVISTA | TLAN XʼAMIGO DIOS NAWANA
¿Lakgapasa xtukuwani Dios?
Nila nawana pi kgalhiya chatum amigo komo ni katsiya xtukuwani. Chuna la wa chatum puskat xalak Bulgaria wanikan Irina: «nila xʼamigo Dios wankan komo ni katsiyaw xtukuwani». Pero chuna la akxilhwi artículo nema likgalhtawakgawa, Dios lakaskin pi kalakgtalakatsuwiw. Wa xlakata kinkawaniyan xtukuwani kBiblia. Wan: «Akit Jehová. Wa uma kintukuwani» (Isaías 42:8).
Dios kinkawaniyan xtukuwani kBiblia: «Akit Jehová. Wa uma kintukuwani» (Isaías 42:8)
Pero ¿xlakaskinka akxilha kiMalakatsukinakan komo nalakgapasaw xtukuwani chu namaklakaskinaw? Kaj kalakpuwanti uma: xtukuwani Dios nema litatsokga akgtati letras ktachuwin Hebreo nema wanikan Tetragrámaton, atsinu ni takgatsi 7,000 xlilhuwa kxapulana tatsokgni xahebreo, nema lilakgapaskan Antiguo Testamento. Uma, tlakg makglhuwa tsokgwilikanit ni xtachuna la atanu tukuwani. Uma kinkalimasiyaniyan pi Dios lakaskin nalakgapasaw xtukuwani. *
Akxni chatiy latamanin lalakgapaskgo, pulana lawanikgo xtukuwanikan. ¿Lakgapasa xtukuwani Dios?
Xlakata Dios xasanto chu kgalhi putum litliwakga, makgapitsi lakpuwankgo pi komo namaklakaskinaw xtukuwani Dios limasiyayaw pi ni maxkiyaw kakni. Komo ni liwana nalimaklakaskinaw xtukuwani nalimasiyayaw pi ni maxkiyaw kakni, chuna la nitlan limaklakaskinkan xtukuwani chatum amigo. Pero komo tlan nalimaklakaskinaw, tlan nawan, Jehová lakaskin pi kskujnin kamaxkikgolh kakni xtukuwani chu namasiyanikgo amakgapitsin (Salmo 69:30, 31; 96:2, 8). Kalakapastakti pi Jesús kamasiyanilh kstalaninanin la natlawakgo oración: «KinTlatikan nti wilapi nkaʼkgapun, katamasantujilh mintukuwini». Masantujliyaw xtukuwani akxni kamasiyaniyaw amakgapitsin, chu uma tlawa pi tlakg natalakatsuwiniyaw Dios (Mateo 6:9).
Biblia lichuwinan pi Dios liwana kakgaxmatni «tiku xlilakpuwankgo xtukuwani» (Malaquías 3:16). Putum tiku paxkikgo uma tukuwani, Jehová wani: «Akit naklekgawa ama ti kilipawan. Xla nakinkilhmini y akit nakkgalhtij. Akit naktakgskgalhi [nakmakgtaya] nak ixtakgxtakgajni» (Salmo 91:14, 15). Uma wamputun, komo lakaskinaw xʼamigo Dios nawanaw, talakaskin nalakgapasaw chu namaklakaskinaw xtukuwani.
^ párr. 4 Lu nitlan, pero lhuwa tiku matitaxtikgo Biblia kʼatanu tachuwin ni maklakaskinkgo xtukuwani Dios, kaj watiya tsokgwilikgo kinTlatikan o Dios. Komo tlakg katsiputuna xlakata uma, kaʼakxilhti páginas 195 asta 197 xla libro ¿Tuku xlikana masiyay Biblia?, tlawakgonit xtatayananin Jehová.