Minit kilhtamaku, tachuwin eunuco xlimaklakaskinkan akxni chatum chixku xmakglhtikanit xlichixku. Makgasa xkamakglhtikan xlichixkukan lakchixkuwin xlakata wi tuku xkalimalakgaxokgekan, o akxni kaj xkachipakan o akxni skujni xlitaxtukgo. Komo xkalipawankan eunucos xkamakuentajlikan nema xwanikan harenes reales niku xtanumakgolh xlakpuskatin mapakgsinanin. Akgtum liʼakxilhtit, Hegai chu Saasgaz xkuentajtlawakgo xlakpuskatin mapakgsina Asuero, xalak Persia, tiku lhuwa wankgo pi wa xwanit Jerjes I (Ester 2:3, 14).

Pero, ni putum tiku xkalilakgapaskan eunucos nema talichuwinan Biblia xkamakglhtikanit xlichixkukan. Makgapitsi tiku lakputsanankgo wankgo pi uma tachuwin na xlimaklakaskinkan akxni xlichuwinamaka tiku kskuja niku xwi mapakgsina. Max chuna xlilakgapaskan xʼamigo Jeremías tiku xwanikan Ébed-mélec chu chatum tiku kskuja kpumapakgsin xalak Etiopía tiku Felipe litachuwinalh Dios. Ébed-mélec max lu xlakaskinka xlitaxtu kpumapakgsin, wa xlakata xla tlan xtachuwinan mapakgsina Sedequías (Jeremías 38:7, 8). Chu etíope tiku kilalh kJerusalén xlakata namaxki kakni Dios xkuentajtlawa xtumin mapakgsina xalak Etiopía (Hechos 8:27).

Akxni Jesús xlichuwinama tuku xʼama la kilhtamaku nema aku xmima, wa: «Akxni nchu natawilay kxlaktawilh xlitlanka xpumapakgsin. [...] Na namapapitsikgoy nchatunu amakgapitsin, xtachuna lantla matanujkgoy nkalhnilu kxlakgstipan tintsun wa nti xmapuchwanina» (Mateo 25:31, 32). Uma liʼakxilhtit anta kilhtilh talismanin nema xkgalhikgo maputswayananin kxkilhtamaku, tiku xkamapapitsikgo borregos kxlakgstipankan cabras. ¿Tuku xlakata chuna xtlawakgo?

Kakuwani, akxtum xkamaputswayanikan. Katsisni, xkatamaknukan niku nitu xtlawanikgolh atanu animales, kgalhananin chu lonkgni (Génesis 30:32, 33; 31:38-40). Pero, maputswayanina lakatanu xkatamaknu borregos xlakata (chuna xtlawa komo xkgalhikgo xalakgskgata) cabras tlakg xlukujnankgo. Nachuna lakatanu xkatamaknukan borregos akxni «xkamakgalhinikan, xkamakchitkan chu akxni xkamakgsitkan», wan libro All Things in the Bible (Putum tuku limin Biblia). Akxni Jesús lichuwinalh uma liʼakxilhtit, limaklakaskilh talismanin nema xlakgapaskgo Judíos, xlakata atsinu ni putum kkapukuxtun kskujkgo.