LICHUWINAN TUKU WI KXMAKNI REVISTA | ¿NATAWILA MAPAKGSINA TIKU XAʼAKGSTITUM?
Wa xTamapakgsin Dios: akgtum tamapakgsin nema xaʼakgstitum
«Tiku kskujaw kpumapakgsin na kkachikin kmakgtapakgsiyaw. Na kkachikin ktaxtuchaw.» Chuna wa tiku kskuja kpumapakgsin xalak Nicaragua chuna wa xlakata tuwa lakpuwan namasputukan tuku ni xaʼakgstitum.
Komo tiku skujkgo kpumapakgsin, kkachikin taxtukgocha, chu latamanin ni xaʼakgstitum tuku tlawakgo, uma wamputun pi nila katitlawakgolh tuku xaʼakgstitum mapakgsinanin, ¿ni xlikana? Xlakata akgtum tamapakgsin natlawa tuku xaʼakgstitum talakaskin pi alakatanu niku nataxtuyacha. Biblia lichuwinan akgtum tamapakgsin. Jesús kawanilh kstalaninanin pi kskinkgolh ama tamapakgsin akxni xtlawakgolh xʼoraciónkan. Wa xTamapakgsin Dios (Mateo 6:9, 10).
Wa xTamapakgsin Dios xaxlikana, anta wilacha kʼakgapun chu nialh makgas natawila kxlakgxokgo mapakgsinanin xalak kakilhtamaku (Salmo 2:8, 9; Apocalipsis [Revelación] 16:14; 19:19-21). Namasputu tuku ni xaʼakgstitum. Kaʼakxilhwi tuku xlakata nila masputukgo mapakgsinanin tuku ni xaʼakgstitum chu tuku xlakata liwana katsiyaw pi xTamapakgsin Dios namasputu.
1. LIMAPAKGSIN
TAʼAKGLHUWIT: Wilakgolh mapakgsinanin xlakata latamanin xokgokgo impuesto. Lhuwa tumin maskujukgo wa xlakata tlawa pi nakgalhamputunkgo; amakgapitsi tastakgo xlakata nakamakgtayakgo latamanin tiku ni putum xokgoputunkgo impuestos. Wa xlakata mapakgsina maliwaka impuestos xlakata natalakgxokgo tuku kitsankga, uma tlawa pi tlakg naʼanan tuku ni xaʼakgstitum. Chu latamanin tiku tlawakgo tuku xaʼakgstitum wa tiku lipatinankgo.
NALAKKAXTLAWAKAN: Limapakgsin nema nakgalhi uma Tamapakgsin wa namaxki Jehová, tiku kgalhi putum litliwakga (Apocalipsis 11:15). * Xla ni maklakaskin naxokgonanikan impuesto xlakata tlan naskuja kxtamapakgsin. Tlan nalimaklakaskin xtapaxkit chu xlitliwakga xlakata nakamaxki putum tuku nalakaskinkgo tiku nakamapakgsi (Isaías 40:26; Salmo 145:16).
2. CHATUM PULALINA
TAʼAKGLHUWIT: Xlakata tlan namasputukan tuku ni xaʼakgstitum talakaskin «talhman nalitsukukan chu nalimasputukan tutsu», chuna wan Susan Rose-Ackerman, tiku lichuwinawa kʼartículo nema titaxtulh. Akxni mapakgsina masputuputun tiku tlawakgo tuku ni xaʼakgstitum tiku wilakgolh la policías chu tiku akxilhkgo tuku tanu o taxtu kʼakgtum país, pero kamaxki talakaskin natlawakgo tuku lakaskinkgo tiku wilakgolh kpumapakgsin, uma tlawa pi nialh nakalipawankgo latamanin. Asta tiku akgstitum lama makglakgalhina, chuna lichuwinan Biblia: «Ni anan kkakilhtamaku chatum chixku tiku natlawa tuku tlan chu ni nalakgalhinan» (Eclesiastés 7:20, TNM).
Jesús ni mastalh talakaskin natamawakan
NALAKKAXTLAWAKAN: Tiku naMapakgsinan kxTamapakgsin Dios, Jesucristo, ni xtachuna la latamanin, xlakata ni katimatlawika tuku ni xaʼakgstitum. Limasiyalh akxni lakgmakgalh tuku xmalaknunikanit pi namaxkikan nema nitu xtachuna. Tiku pulalima uma kakilhtamaku, Satanás, wanilh pi xʼama maxki «xlipaks xtamapakgsin nkatiyatna» kajwatiya xtalakaskin xtakilhputanilh chu xmaxkilh kakni, Jesús tunkun lakgmakgalh (Mateo 4:8-10; Juan 14:30). Lu xaʼakgstitum xwanit, asta akxni xmapatinimaka ni lakaskilh droga nema xmaxkimaka xlakata nialh lu xpatinalh, nema xtlawalh pi nialh liwana xlakpuwa (Mateo 27:34). Jesús limasiyanit pi liwana katsini la napulalin Tamapakgsin (Filipenses 2:8-11).
3. NI KATITALAKGPALILH
TAʼAKGLHUWIT: Klhuwa países kalakgpalikan mapakgsinanin, uma kamaxki talakaskin pi latamanin nalakgpalikgo tiku ni akgstitum skuja. Pero liwana takatsi pi akxni kalaksakkan xalaksasti tiku namapakgsinankgo tlawakan lhuwa tuku ni xaʼakgstitum kaj xlakata natlajanankgo, asta kpaíses niku anan lhuwa tumin. Akgtum liʼakxilhtit, tiku kgalhikgo lhuwa tumin kamakgtayakgo tiku mapakgsinamputunkgo akxni tlawakgo xcampañaskan.
Juez John Paul Stevens, tiku makgtapakgsi kTribunal Supremo xalak Estados Unidos, tsokgli pi akxni chuna tatlawa katuwa wili «ni kaj manwa tuku xaʼakgstitum chu la mapakgsinama, nachuna la lipawankgo latamanin mapakgsina». Wa xlakata lhuwa latamanin lakpuwankgo pi políticos tlawakgo tuku ni xaʼakgstitum.
NALAKKAXTLAWAKAN: Xlakata xTamapakgsin Dios putum kilhtamaku natawila, namasputukan campañas xlakata tiku mapakgsina nawan chu tiku tlawakgo tuku ni xaʼakgstitum (Daniel 7:13, 14). Nachuna, xMapakgsina uma Tamapakgsin ni kaj nalilaksakkan votos, wa Dios tiku nawili, wa xlakata nila nalakgpalikan. Uma wamputun pi putum kilhtamaku natawila, tuku natlawa tlan nakakitaxtuni tiku natapakgsinikgo.
4. LIMAPAKGSIN
Wa xTamapakgsin Dios akgtum tamapakgsin nema wilacha kʼakgapun
TAʼAKGLHUWIT: Max nalakpuwanaw, komo tlakg naʼanan limapakgsin, nialh naʼanan tuku ni xaʼakgstitum. Pero, tiku lakputsanankgo wankgo pi lata talhuwima limapakgsin, tlakg tlawa pi ni nakgalhakgaxmatkan limapakgsin. Nachuna, lu lhuwa tumin laktlawakan xlakata namakgantaxtikan limapakgsin, chu ni lhuwa tuku tlawakgo.
NALAKKAXTLAWAKAN: Limapakgsin nema natawila kxTamapakgsin Dios ni tatalakxtumi xla latamanin. Akgtum liʼakxilhtit, xla ni mastalh laktuwa limapakgsin niku wan tuku militlawat chu tuku ni militlawat, Jesús mastalh limapakgsin nema ni tuwa, lilakgapaskan Regla de Oro: «Chuna mpi xlipaks nkatuwa wantu xlakaskintit nakatlawanikgoyan nchixkuwin, nachuna wixin natlawanikgoyatit» (Mateo 7:12). Pero tlakg xlakaskinka xlakata anan limapakgsin nema ni kajwatiya akxilha tuku tlawakgo latamanin, wata akxilha tuku makgkatsikgo. Jesús limapakgsinalh: «Milipaxkit mintalataman chuna la miʼakstu paxkikana» (Mateo 22:39, TNM). Xlakata Dios katsi tuku wi kinakujkan, tlan tlawa pi kakgantaxtulh (1 Samuel 16:7).
5. TUKU WI KNAKU
TAʼAKGLHUWIT: Tlawakan tuku ni xaʼakgstitum akxni wi tuku kgalhiputunaw chu kiakstukan kinkapaxkikanan, nema lhuwa mapakgsinanin chu amakgapitsi latamanin chuna tlawakgo. Artículo tuku titaxtulh nema lichuwinalh pi lakxlalh lanka chiki, akxilhka pi tiku tlawakgolh uma chiki kaxokgonikgolh mapakgsinanin xlakata xkatsikgo pi ni tapalaxla xʼama taxtu komo xmaklakaskinkgolh tuku ni lu xatlan chu ni xmakgatsikgolh limapakgsin nema xʼanan.
Wa xlakata, talakaskin nakamasiyanikan latamanin ni lhuwa wi tuku nakgalhiputunkgo chu ni xakstukan nakapaxkikan xlakata chuna nasputa tuku ni xaʼakgstitum. Pero mapakgsinanin nila chuna tlawakgo chu ni tlawaputunkgo.
NALAKKAXTLAWAKAN: Wa xTamapakgsin Dios tlan lakkaxtlawa putum taʼakglhuwit, xlakata kamasiyani latamanin la nalikatsikgo. * Tuku kamasiyanikan kamakgtaya xlakata “nalakgpalikgo xtapuwankan” (Efesios 4:23). Chu la likatsikgo kamakgtaya ni lhuwa tuku nakgalhiputunkgo chu ni xakstukan nakapaxkikan, nalipaxuwakgo tuku kgalhikgo chu nakamakgtayaputunkgo amakgapitsin (Filipenses 2:4; 1 Timoteo 6:6).
6. LATAMANIN
TAʼAKGLHUWIT: Maski niku wilakgolh ni chuna likatsikan chu kamasiyanikan tuku tlan, makgapitsi laksakkgo tuku ni xaʼakgstitum. Tiku lakputsanankgo wankgo pi wa xlakata nila masputukgo latamanin tuku ni xaʼakgstitum. Tuku max tlan natlawakgo mapakgsinanin wa pi ni lu nakatlawanikan tuku nitlan amakgapitsi latamanin.
NALAKKAXTLAWAKAN: La Convención de las Naciones Unidas contra la Corrupción wan xlakata namasputukan tuku ni xaʼakgstitum, mapakgsinanin namasiyakgo «ni naʼakgskgawinankgo, natlawakgo tuku xaʼakgstitum chu namakgantaxtikgo tuku kalakgchan». Maski lu tlan tuku lakpuwankgo, xTamapakgsin Dios tlakg lhuwa tuku natlawa: ni kajwatiya wan pi nakgalhikan lakwan tayat, na wan pi xlitamakgantaxtit. Biblia wan pi nila katitawilakgolh kxTamapakgsin Dios tiku lhuwa tuku kgalhiputunkgo chu tiku xaʼakgsaninanin (1 Corintios 6:9-11; Apocalipsis 21:8).
Putum tlan nakatsinikgo nakgalhakgaxmatkgo tuku wan uma Tamapakgsin, chuna la limasiyakgolh xapulana kstalaninanin Cristo. Akgtum liʼakxilhtit, akxni chatum kstalanina Cristo tiku wanikan Simón xkatamawaputun apóstoles, xlakan ni lakaskinkgolh chu wanikgolh: «Katalakgaspittayani wa yuma mintalakgalhin». Simón katsilh pi nitlan tuku xlakpuwanit chu kaskinilh pi xpalakaskinka xlakata nialh xlakpuwa tuku nitlan (Hechos 8:18-24).
LA TLAN NATAWILAYAW KXTAMAPAKGSIN DIOS
Maski tanu tanu kinkachikinkan, wix tlan natawilaya kxTamapakgsin Dios (Hechos 10:34, 35). Tuku masiya xTamapakgsin Dios nakamakgtaya xlakata tlan nakgantaxtu. Xtatayananin Jehová namasiyanikgoyan la makgalhtawakgenankgo. Komo kgalhiya tsinu kilhtamaku akgatunu semana, tlakg nakatsiya «xatlan tamakatsinin xla xtapakgsin Dios». Nachuna nakatsiya la Dios namalakgsputu tuku ni xaʼakgstitum (Lucas 4:43). Kakatachuwinanti xtatayananin Jehová niku wila o katanu ksitio, jw.org/jw-tot.
¿Lakaskina nalimakgalhtawakgekana Biblia chu ni naxokgoya?
