Klakachilh kBakú (Azerbaiyán) chu akit xlichatiy. Maski kintlat musulmán xwanit chu kintse judía, ni xlikgalhikgo taʼakglhuwit xtakanajlakan. Lu xlapaxkikgo. Akxni kintlat ni xwayan akxni xchan papaʼ ramadán, kintse xmakgtaya, chu kintlat xmakgtaya kintse akxni xtlawa Pascua judía. Kkinchik xakkgalhiyaw libros la Corán, Torá chu Biblia.

Akit xaklakpuwan pi musulmana xakwanit. Xakkanajla pi xwi Dios, pero ni putum xakʼakgatekgsa. Xkinkgalhskinkan: «¿Tuku xlakata kinkatlawan? ¿Tuku xlakata wi tiku napatinan putum kxlatamat chu alistalh namapatinikan kpupatin?». Latamanin wankgo pi putum tuku la, wa xtalakaskin Dios, uma xkimalakpuwani: «¿Kaj xlikgaman Dios akinin? ¿Lipaxuwa akxni kinkaʼakxilhan pi patinamaw?».

Akxni xakkgalhi 12 kata ktsukulh ktlawa namaz, akgkitsis oraciones nema tlawakgo musulmanes chali chali. Uma kilhtamaku kintlat kinkatamaknun kʼakgtum escuela judía kintala chu akit. Anta kkatsiniw tachuwin hebreo chu xlakata takanajla. Putum kilhtamaku xaktlawayaw oración chuna la xtlawakgo judíos. Wa xlakata kkinchik xaktlawa namaz chu kʼescuela, oraciones judías.

Xakkgalhi lhuwa takgalhskinin chu lu xakkatsiputun xatakgalhtin. Putum kilhtamaku xakkakgalhskin tiku xpulalinkgo takanajla xalak escuela: «¿Tuku xlakata kinkatlawan Dios? ¿Tuku lakpuwan Dios xlakata kintlat musulmán? Kintlat lu tlan likatsi, ¿tuku xlakata wankan pi ni skulunku? Chu komo ni skulunku, ¿tuku xlakata tlawalh Dios?». Takgalhtin nema kimaxkika ni kkanajlalh; xlakata ni kgalhtilh kintakgalhskinin.

Kata 2002 wi tuku lalh xlakata nialh xakkanajlanilh Dios. Kkaw latamayaw kʼAlemania, chu kaj akgtum semana lata xakchanitaw, kintlat kgalhilh derrame cerebral (nilh xʼakskitit pero xnaku chuntiya kskujma) chu la xanin tamalh. Akglhuwa kata, xakskininit  Dios pi xkuentajtlawalh kifamilia. Xakkanajla pi kajwatiya Dios tiku kgalhi putum litliwakga tlan nalakgmaxtu, wa xlakata xaktasaskini chali chali pi xmakgtayalh kintlat. Xaklakpuwan pi komo Dios lu lanka, ni tuwa xkimaxkilh tuku xakskinilh. Xakkanajla pi xʼama kinkgaxmatni, pero alistalh, kintlat nilh.

Xakmakgkatsi pi Dios ni xkinkalilakgaputsayan, uma nitlan kimamakgkatsinilh. Lu kpatinalh. Klakpuwa: «Ni kkatsi ktlawa oración o Dios ni lama». Nialh xakkatsi tuku xaktlawa wa xlakata nialh ktlawalh oración. Nachuna ni xakkalipawan atanu takanajla, wa xlakata liwana klakpuwa pi Dios ni lama.

Titaxtulh akgchaxan papaʼ, xtatayananin Jehová chankgolh kkinchik. Ni lu tlan tuku xaklakpuwanaw xlakata tiku xwankgo pi cristianos, wa xlakata kintala chu akit klakpuwaw pi nakkamasiyaniyaw pi tuku katsikgo ni xaxlikana. Kkakgalhskiw: «¿Tuku xlakata cristianos kakninanikgo ídolos, cruz, Jesús chu María, maski Pulakkaw Limapakgsin wan pi ni chuna xlitatlawat?». Xtatayananin Jehová kinkalimasiyanikgon Biblia pi xaxlikana kstalaninanin Cristo ni xlikakninanitkan ídolos chu kajwatiya Dios xlitlawanitkan oraciones. Lu kaks kimalakawanikgolh.

Kkawaniw: «¿Chu Trinidad? Komo Jesús Dios, ¿la tlawalh xlakata xmilh kKatiyatni chu xmakgnika?». Chu kinkalimasiyaniparakgon Biblia pi Jesús ni wa Dios. Chu kinkawanikgon, pi wa xlakata ni kanajlakgo pi wi Trinidad. Lu kaks kimalakawanilh. Chu klakpuwa: «¡Lu tanu uma cristianos!».

Pero chuntiya xkinkgalhskinikan tuku xlakata nikgo latamanin chu tuku xlakata masta talakaskin pi kaʼanalh tapatin. Wa xlakata kimasiyanikgolh libro nema wanikan El conocimiento que lleva a vida eterna; * anta xwi capítulos nema xkgalhti umakgolh takgalhskinin. Tunkun ktsukulh katakgalhtawakga Biblia.

Makgatunu akxni xakkgalhtawakga takgalhtin nema xaktekgsa, xaxlikana xwanit xlakata xtakilhti kBiblia. Kkatsinilh pi xtukuwani Dios wa Jehová chu xtayat nema lu xlakaskinka wa tapaxkit (Salmo 83:18; 1 Juan 4:8). Kkatsilh pi kinkatlawan xlakata na xlipaxuwaw latamat. Kʼakgatekgsli pi maski masta talakaskin kaʼanalh tuku ni xaʼakgstitum, ni akxilhputun chu nialh makgas namasputu. Nachuna kkatsinilh pi talakgalhin nema Adán chu Eva tlawakgolh nitlan tuku kalimininit putum latamanin (Romanos 5:12). Pulaktum, wa akxni nikgo tiku kapaxkiyaw, la kintlat. Pero kxasasti katiyatni nema wanit Dios pi nalimin, nasputa putum tuku kinkamakgapatinanan chu tiku nikgonit nalakastakwanamparakgo (Hechos 24:15).

Biblia kgalhtilh putum kintakgalhskinin. Ktsukupa kanajlani Dios. Tsinu tsinu ktsukulh kalakgapastilha xtatayananin Jehová chu kakxilhli pi lu tlan xlatalalinkgo chu nitu kamapitsi. Lu klakgatilh xlakata makxtum xwilakgolh chu xlapaxkikgo (Juan 13:34, 35). Putum tuku xakkatsinitilha tlawalh pi xakskujnanilh chu klakpuwa xtatayana Jehová nakwan. Ktamunulh 8 xla enero kata 2005.

Xlakata tuku kimasiyanika xalak Biblia, la uku tanu kakxilha kilatamat chu tlan kmakgkatsi. Xlakata kkatsi pi Dios namaxkipara latamat kintlat, lu tlan kimamakgkatsini chu kimakgapaxuwa (Juan 5:28, 29).

Akgchaxan kata lata ktatamakgaxtokgnit Jonathan, tiku ni makgxtakga Dios. Kinchatiykan kkatsininitaw pi tuku masiya Biblia ni tuwa akgatekgskan chu lu lhuwa xtapalh. Wa xlakata lu klakgatiyaw kalitachuwinanaw latamanin xlakata kintakgalhkgalhinkan. La uku kkatsi pi xtatayananin Jehová ni lu tanu, xaxlikana kstalaninanin Cristo.