Kaj kalakpuwanti la tlan xkakitaxtunilh latamanin. La uku, lhuwa latamanin patinankgo xlakata nitu kgalhikgo, chu kaj makgapitsi tiku lhuwa tuku kgalhikgo. Akgtum tamapakgsin xlikalanka katiyatni nema naʼakgatekgsa tuku xlikana maklakaskinkgo tiku kamapakgsi tlan nakamakgtaya. ¿Lakpuwana pi latamanin tlan nakgalhikgo uma tamapakgsin? (Kalikgalhtawakga Jeremías 10:23.)

Xliputum kata nema titaxtunit, mapakgsinanin ni tlawakgonit tuku xlakaskinkgo latamanin, tlakg chuna kakitaxtuninit tiku nitu kgalhikgo. Asta makgapitsi mapakgsinanin lixkajni likatsikgo (Eclesiastés 4:1; 8:9). Pero Dios, tiku kgalhi xliputum litliwakga wanit pi nawili akgtum tamapakgsin nema natawila xlakgxokgo putum tamapakgsin chu laksaknit chatum mapakgsina tiku nakakuentajtlawa latamanin. (Kalikgalhtawakga Isaías 11:4 chu Daniel 2:44.)

Tiku laksaknit Jehová xlakata napulalin xTamapakgsin wa xKgawasa, Jesucristo. Wa tiku tlan chuna natlawa (Lucas 1:31-33). Akxni latamalh kkatiyatni, kalilakgaputsalh latamanin. La uku xlakata Mapakgsina, nakamamakxtumi putum latamanin chu namasputu tapatin. (Kalikgalhtawakga Salmo 72:8, 12-14.)

¿Namakgamakglhtinankgo Jesús putum latamanin la xmapakgsinakan? Ni, ni putum. Pero Jehová kgalhkgalhinan (2 Pedro 3:9). Wa xlakata kamaxkima talakaskin pi kalakgpalikgolh xlatamatkan. Nialh makgas, Jesús nakamasputu tiku nitlan likatsikgo chu nalimin takaksni chu tlan nalatamakan xlikalanka katiyatni. (Kalikgalhtawakga Miqueas 4:3, 4.)