Omar: Nakwaniyan pi ni lu klakgati tuku xla Dios. Max nila lhuwa tuku nalichuwinanaw.

Bruno: Paxtikatsinilh xlakata kiwanipat. Ah xakpatsankgama, kiwanikan Bruno. ¿Chu wix?

Omar: Omar.

Bruno: Lu tlan pi klakgapasman Omar.

Omar: Nachuna akit.

Bruno: Tlan xakkgalhskin: ¿minit kilhtamaku akxni na xkgalhiya mintakanajla?

Omar: Chuna, akxni aktsujku xakwanit. Pero akxni kalh kʼuniversidad chu kmakgxtakgli kinchik, na kmakgxtakgli takanajla.

Bruno: Ah wa xlakata. ¿Tuku kgalhtawakga kʼuniversidad?

Omar: Historia chu Ciencias sociales. Putum kilhtamaku klakgatinit tuku titaxtunita; wix katsiyata, lakputsananikan tuku tlawakgonit latamanin kkinkatiyatnikan.

Bruno: Chuna, lu tlan. Max katsiya pi Biblia nalichuwinan tuku lanita. ¿Likgalhtawakganitata uma libro?

Omar: Ni. Kkatsi pi lu tlan uma libro, pero ni makgtum chuna xaklakpuwanit.

Bruno: Tasiya pi putum makgamakglhtinana. Komo kgalhiya kilhtamaku, kmasiyaniputunan makgapitsi liʼakxilhtit la kgantaxtunit tuku wanit Biblia.

Omar: Tlan, pero ni kkgalhi Biblia.

Bruno: Nitu kapuwanti. Kkgalhi maktum. Pulana, kakxilhwi 1 Crónicas capítulo 29, versículos 26 chu 27. Kalikgalhtawakgaw: «Chu David xkgawasa Jesé, mapakgsinalh kʼIsrael; chu kilhtamaku lata mapakgsinalh kʼIsrael tipuxum kata. Anta kHebrón mapakgsinalh akgtujun kata, chu kJerusalén mapakgsinalh puxamakututu kata».

Omar: ¿Wa uma xapulana liʼakxilhtit?

Bruno: Chuna. Milh kilhtamaku akxni tiku xlakputsananikgo Biblia xwankgo pi tuku tsokgka xlakata David kaj akgtum cuento.

Omar: ¿Xlikana? ¿Tuku xlakata?

Bruno: Xlakata kaj wa Biblia chu ni xʼanan tuku xlimasiyalh pi xlama David. Pero kata 1993, makgapitsi arqueólogos tekgskgolh kʼakgtum chiwix akgtum tachuwin nema xwamputun «xchik David» chu «mapakgsina xalak Israel».

Omar: Mmm... Lu tlan.

Bruno: Atanu tiku na lichuwinan Biblia nema wankan pi ni latamalh wa Poncio Pilato chatum mapakgsina kxkilhtamaku Jesús. Anta talichuwinan kLucas capítulo 3, versículo 1 niku kalichuwinankan mapakgsinanin xalamakgasa.

Omar: Chuna, unu wan pi «akxni mapakgsina xliwi mPoncio Pilato kJudea, chu Herodes na mapakgsina xwanit kʼGalilea»...

 Bruno: Chuna. Lhuwa kilhtamaku titaxtulh tiku xlakputsanankgo ni xkanajlakgo pi Poncio Pilato xlatamanit. Pero titaxtunita tipuxamakaw kata lata takatsilh pi kʼOriente Medio xwi akgtum chiwix niku xtatsokgnit xtukuwani.

Omar: Xlikana uma ni xakkatsi.

Bruno: Lu tlan pi akit kmasiyaniman.

Omar: Xlikana, putum kilhtamaku kakxilhnit Biblia la maktum libro nema xlakaskinka, pero na klakpuwan pi nila kinkamakgtayayan la uku. Max lichuwinan tuku lanit makgasata, pero kaj manwa.

Bruno: Lhuwa latamanin nachuna lakpuwankgo chuna la wix, pero akit ni chuna klakpuwan. ¿Katsiya tuku xlakata? Xlakata tuku maklakaskinaw watiya tuku xmaklakaskinkan makgasa. Putum kilhtamaku maklakaskinaw liwat, lhakgat, chu chiki. Putum kilhtamaku maklakaskinitaw nalatachuwinanaw chu xatapaxuwan natawila kifamiliajkan. ¿O ni xlikana?

Omar: Xlikana.

Bruno: Biblia kinkamakgtayayan xlakata tlan nakgalhiyaw tuku maklakaskinaw. Maski makgasata tsokgkanit, pero chuntiya kinkamakgtayayan la uku.

Omar: ¿Ni chuna?

Bruno: Chuna. Atanu la kalichuwinamparaw: xtastakyaw Biblia lu xmakgtayanan akxni tsokgka chu la uku chuntiya kinkamakgtayayan.

Omar: Kakiwani akgtum liʼakxilhtit.

Bruno: Biblia lu makgtayanan akxni nalaksaka la nalimaklakaskina tumin, mifamilia chu tiku talalipina. Xtachuna la akgtum mapa nema kinkamasiyaniyan tukuya tiji tlan nakinkakitaxtuniyan. Akgtum liʼakxilhtit, la uku lu tuwa kitaxtu tiku lu tlan xatlat nawan chu tlan nalikatsini xpuskat, ¿ni chuna lakpuwana?

Omar: Xlikana. Kimpuskat chu akit akgtum kata lata ktamakgaxtokgnitaw chu lakgachunin tuwa kmakgkatsiyaw akxtum naklakapastaknanaw.

Bruno: Biblia limin lhuwa tastakyaw nema liwana kinkawaniyan chu putum kilhtamaku makgtayanan. Akgtum liʼakxilhtit, kaʼakxilhwi Efesios capítulo 5, versículo 28. ¿Tlan xlikgalhtawakga?

Omar: Tlan, wan: «Nachuna lakchixkuwin xlipaxkitkan xlakpuskatinkan chuna la paxkikgo xmaknikan. Tiku paxki xpuskat, xakstu paxkikan».

Bruno: Paxtikatsinilh. ¿Ni xlikana pi komo chatum chixku xtlawalh uma tastakyaw tlakg tlan xtawi xfamilia?

Omar: Max chuna, pero tlakg ni tuwa wankan ni xawa tlawakan.

Bruno: Xlikana tuku wana, putum akinin makglakgalhinanin. Kʼuma capítulo wi akgtum versículo nema kinkawaniyan pi liwana kalakapastaknaw. * Ktamakgaxtokgat talakaskin nalaʼakgatekgsnikan chu ni kaj wa natatlawa xtalakaskinkan. Akit chu kimpuskat, Biblia kinkamakgtayanitan liwana naklakapastaknanaw.

Omar: Xlikana tuku wa.

Bruno: Xtatayananin Jehová kkgalhiyaw akgtum sitio kʼInternet niku limin tuku nakamakgtaya tamakgaxtokgat chu familias. Kaj tsinu kilhtamaku nakmasiyaniyan tuku limin uma sitio.

Omar: Tlan, nitu tlawa komo kaj tsinu kilhtamaku.

Bruno: Wa sitio jw.org... Wa uma página nema litsuku.

Omar: Lu klakgati fotos.

Bruno: Umakgolh kincompañeros tiku lichuwinamakgolh Dios xlikalanka katiyatni. Kaʼakxilhwi... Uma sección wanikan «Matrimonios y padres». Uma sección pulaklhuwa tuku lichuwinan. ¿Tuku tlakg lakgatiya?

Omar: Kakxilhwi... Uma: «Cómo solucionar problemas  en el matrimonio». Wa uma tuku kmaklakaskin.

Bruno: Uma artículo lichuwinan pulaktati la tlan lakkaxtlawakan taʼakglhuwit. Akgtum liʼakxilhtit, kaʼakxilhwi uma párrafo. Kalikgalhtawakga Omar.

Omar: Tlan. Wan: «Chuna la kgalhni lu xlakaskinka xlakata nalatamayaw, nachuna litaxtu akxni latachuwinankan. Pero xlakata tlan chuna natatlawa, talakaskin pulaktiy lakwan tayat nema natamalakxtumiyaw la naku chu pulmones: tapaxkit chu lamaxkikan kakni». Lu tlan, klakgati la tamalakxtumikan.

Bruno: Paxtikatsinilh xlakata likgalhtawakga. Alistalh wi akgtum texto. Kapitani niku wi texto.

Omar: Ah, chuna... Ay talakkilh. Wa Efesios 5:33. Wan: «Minchatunukan kapaxkitit mimpuskatkan chuna la miʼakstukan kapaxkikanatit; nachuna, xapuskat lu xlimaxkit kakni xchixku».

Bruno: ¿Akxilhti uma tastakyaw? Tuku wamputun uma texto wa pi nalamaxkikgo tuku lakaskin.

Omar: Tlakg liwana kimasiyani.

Bruno: Tlan, ¿ni xlikana pi lakchixkuwin lakaskinkgo pi xpuskat namaxki kakni? ¿Ni xlikana pi puskat lakaskin pi xchixku napaxki?

Omar: Xlikana.

Bruno: Komo chixku lakputsa la nalimasiyani xpuskat pi paxki xla ni tuwa namakgkatsi namaxki kakni nema xla minini, ¿nichuna lakpuwana?

Omar: Xlikana, max tlan nakitaxtu.

Bruno: Uma tastakyaw max akgtiy mil kata lata tsokgka, pero chuntiya makgtayanan asta la uku. Komo natlawakan uma tastakyaw nakamakgtaya tamakgaxtokgat xlakata nalamaxkikgo tuku maklakaskinkgo chu chuna la lichuwinaw, tlan natawila «xnakujkan» chu «xpulmoneskan» kxtamakgaxtokgatkan.

Omar: Xlikana pi Biblia tlakg lhuwa tuku limin nema ni xawa la xaklakpuwan.

Bruno: Klipaxuwa pi chuna lakpuwana. ¿La akxilha komo unu nachuwinamparayaw? Kkatsiputun tuku lakpuwana xlakata uma subtítulo: «Pulaktati tuku makgtayanan xlakata nalakkaxtlawaya taʼakglhuwit». *

Omar: Tlan. Nakwani kimpuskat pi akxtum naklikgalhtawakgayaw.