Komo kmintaskujut miʼakskitit maskujuya o atanu tuku tlawaya, putum kilhtamaku kalakapastakti pi «putum tuku tlawakan wi tuku tlajakan» (Proverbios 14:23, Versión Israelita Nazarena). ¿Tuku tlajakan? Pulana, kintaskujutkan kinkamakgtayayan xlakata nakgalhiyaw tuku maklakaskinaw. Xlikana pi Biblia wan pi Dios nakamaxki tuku maklakaskinkgo tiku lakputsakgo la naskujnikgo (Mateo 6:31, 32). Pero na wan pi akinin na kilitlawatkan tuku kinkalakgchanan chu palha kiliskujatkan (2 Tesalonicenses 3:10).

Kaʼakxilhti mintaskujut xlakata wi tuku nalitlawaya: kintaskujutkan kinkamakgtayayan xlakata liwana namakgantaxtiyaw tuku lakgayaw. Joshua tiku kgalhi 25 kata, wan: «Lu tlan tamakgkatsi miʼakstu naxokgoya tuku maklakaskina. Komo tlan naxokgoya tuku maklakaskina, tlan nawanaw pi mintaskujut makgantaxtinit tuku xlakpuwanita».

Nachuna, palha skujkan tlakg tlan mamakgkatsininan. ¿Tuku xlakata chuna wanaw? Xlakata tuwa palha skujkan chu max nalakgachipiniya, pero komo ni natamakgxtakgaw chu ni namakgxtakgaw uma taskujut, nalipaxuwayaw xlakata katsiyaw pi lhuwa tuku tlawaw; tlan namakgkatsiyaw xlakata ni chuna tlawaw maski max xlakpuwanaw pi tlakg tlan xwa komo ni lu kskujwi (Proverbios 26:14). Chu uma lu tlan mamakgkatsininan. Aaron, tiku lichuwinaw kʼartículo nema titaxtulh wan: «Lu ktlakgwan akxni sputa kilhtamaku o max niti kuenta tlawalh kintaskujut; pero akit kkatsi pi wi tuku kmakgantaxtinit chu lu klakgati uma».

Biblia lichuwinan tiku liwana tlawa xtaskujut chu puskat tiku lhuwa tuku litlawa xmakan (Proverbios 22:29; 31:13). Xlikana, nila kaj lakapala nakatsiniya la tlakg tlan natlawaya mintaskujut chu niti lakgati tlawa taskujut nema ni lu katsini. Max wa xlakata lhuwa ni lakgatikgo xtaskujutkan: xlakata ni lakputsakgo la tlakg tlan natlawakgo.

Xlikana, kimputumkan tlan nalipaxuwayaw kintaskujutkan komo nakgalhiyaw tlan tapuwan, wamputun, nakatsiniyaw liwana natlawayaw. William tiku kgalhi 24 kata wan: «Palha naskuja chu naʼakxilha la kitaxtu lu tlan tamakgkatsi. Nikxni katikgalhi uma tapaxuwan komo ni lu naskujputuna».

Ni kajwatiya kalakpuwanti la xlilhuwa xokgonikana. Kakgalhskinka: «¿Tuku xlakata talakaskin kintaskujut? ¿Tuku xlalh komo niti xtlawalh o nitlan la xtlawaka? ¿La kamakgtaya amakgapitsin tuku ktlawa?»

Uma xaʼawatiya takgalhskinin tlakg xlakaskinka, xlakata xtakgalhtin nakinkamakgtayayan tlakg nalipaxuwayaw tuku tlawayaw. Jesucristo wa: «Tlakg anan tapaxuwan akxni mastakan nixawa akxni makglhtinankan» (Hechos 20:35, TNM). Nachuna tiku pulana litamakgtayakgo kintaskujutkan, la tiku kaskujniyaw o kimalanakan, na wilakgo atanu tiku litamakgtayakgo: kifamiliajkan chu asta tiku ni kgalhikgo tuku maklakaskinkgo.

Kifamiliajkan. Akxni chatum tlat o chatum tse liskujkgo xlakata nakamaxkikgo tuku maklakaskinkgo xfamiliajkan, pulaktiy la kamakgtayakgo. Pulana, kuenta tlawakgo xlakata nakgalhikgo tuku maklakaskinkgo: liwat, lhakgat chu xchikkan; chuna makgantaxtimakgo tuku Dios kalakgayawanit pi nakamaxkikgo tuku maklakaskinkgo «wanti xala kxchik» (1 Timoteo 5:8). Chu xlipulaktiy, kalimasiyanikgo xliʼakxilhtitkan pi xlakaskinka liwana naskujkgo. Shane wan: «Kintlat lu tlan skuja. Ni akgskgawinan chu lhuwa skujnit xliputum xlatamat, atsinu ni putum kilhtamaku liskujli la xwakna. Xla kimasiyanilh la xlilakaskinka uma taskujut, natlawaya tuku namaklakaskinkgo latamanin.

Tiku tlakg maklakaskinkgo. Apóstol Pablo wa pi kstalaninanin Cristo “palha xliskujatkan”. ¿Tuku xlakata? Na wampa: «Xlakata wi tuku tlan nakamaxki tiku maklakaskinkgo» (Efesios 4:28). Komo naliskujaw xlakata nakamaxkiyaw tuku maklakaskinkgo kifamiliajkan, max asta tlan nakamakgtayayaw tiku tlakg maklakaskinkgo (Proverbios 3:27). Chuna, akxni palha skujaw paxuwayaw xlakata kgalhiyaw tuku namastayaw.

Anta kxTaʼakgchuwin xalak Sipi nema lu lakgapaskan, Jesús kawanilh kstalaninanin pi komo tiku kgalhi limapakgsin xkaskinilh akgtum milla, wata akgtiy xtlawakgolh (Mateo 5:41). ¿La tlan namakgantaxtiya tuku wa Jesús? Ni kajwatiya katlawa tuku naskinikana, wata tlakg katlawa. Tlakg lhuwa tuku katlawaputu: tlakg lakapala katlawa mintaskujut chu tlakg tlan. Tlakg kuenta katlawa tuku liskujpat maski ni lu tuwa.

Komo chuna natlawaya, max tlakg nalipaxuwaya mintaskujut. ¿Tuku xlakata? Xlakata xatapaxuwan tlawapat chu ni kaj xafuerza. Wix tiku laksaka chu ni atanu (Filemón 14). Uma kinkamalakapastakayan uma proverbio: «Tiku palha skujkgo wa tiku napulalinankgo, pero tiku xalaklhkitit putum kilhtamaku nakamaskujukan» (Proverbios 12:24). Xlikana pi max nikxni esclavos katilitaxtuw chu na ni xafuerza kintikamaskujukan. Pero komo kaj ni lu naskujputunaw, max namakgkatsiyaw: pi putum kilhtamaku kaj kskujnin litaxtuyaw amakgapitsin. «Akgtiy milla katlawa» chu tlan nalimakgkatsiya.

Maski lu tlan akxni palha skujkan, kalakapastakti pi ni kajwatiya uma talakaskin kkilatamatkan. Xlikana pi Biblia kinkawaniyan pi palha kiliskujatkan (Proverbios 13:4). Pero ni wamputun pi kaj wa taskujut nalilatamayaw. Eclesiastés 4:6 wan: «Tlakg tlan jaxkan tsinu nixawa lu lhuwa naskujkan». ¿Tuku kinkamasiyaniyan? Max chatum tiku lu lhuwa skuja nikxni akxilha xtaskujut xlakata anta lilaktlawami xkilhtamaku chu xlitliwakga. Eclesiastés wan pi uma lu nitlan xtachuna la kaj stalanimaw un.

Biblia nakinkamakgtayayan naʼakxilhaw taskujut chuna la xlilat. Xlikana pi palha kiliskujatkan, pero xTachuwin Dios na kinkamalakapastakayan pi kuenta katlawaw «tuku tlakg xlakaskinka» (Filipenses 1:10). ¿Tuku uma nema tlakg xlakaskinka? Nakalimaxtuniya kilhtamaku mifamilia chu miʼamigos, chu tlakg xlakaskinka tuku xla Dios, la nalikgalhtawakgakan Biblia chu nalilakpuwankan.

Tiku liwana lakkaxwilinit xlatamat tlakg lipaxuwa xtaskujut. William kinkawaniyan: «Xapulana malana nema kkgalhilh lu tlan liʼakxilhtit xlakata la liwana lakkaxwilikan taskujut. Lhuwa skuja chu paxuwakgo tiku kataskuja xlakata lu tlan la skujma. Pero akxni sputa kilhtamaku, makgxtakga xtaskujut chu kalimaxtuni kilhtamaku xfamilia chu xtakanajla. Chu xlikana pi wa tiku tlakg paxuwa xliputum tiku kkalakgapasa».