Tiku xalak Roma xwanit xkamakgtaya xanikuta niku xlatamakgolh asta niku xmapakgsi Roma. Ni xtalakaskin pi xmakgantaxtikgolh tamapakgsin xalak laktsu kachikin niku xwi, kajwatiya xalak Roma. Komo wi tiku xlimawakaka tuku nitlan, tlan xtalakkaxlaka chuna la xwi limapakgsin kkachikin, pero tlan xlilh xtaʼakglhuwit kxlakatin tribunal romano. Chu komo xmakgniputunka, tlan kskinilh xtamakgtay mapakgsina.

Wa xlakata, tiku xmakgtanu kpolítica xalak Roma Cicerón, xapulana siglo akxni nina xmin Cristo wa: «Nitlan komo nachiya tiku xalak Roma; lu nitlan komo namakgsnokgkan; komo namakgnikan xtachuna la makgnikan chatum tlat».

Apóstol Pablo maklakaskilh xlatamat xlakata nalichuwinan Dios putum niku xmapakgsi Roma. Asta niku katsiyaw, makgtutu maklakaskilh xlakata xalak Roma xwanit: 1) Kawanilh mapakgsinanin xalak Filipos pi lakatsalakgolh tuku xlakgchan xlakata makgsnokgkgolh. 2) Anta kJerusalén wa pi xalak Roma xwanit xlakata ni xmakgsnokgka. 3) Akxni xʼama talakkaxlakgo, linilh xtaʼakglhuwit César, chu skilh pi mapakgsina xalak Roma xkgaxmatli xtaʼakglhuwit (Hechos 16:37-39; 22:25-28; 25:10-12).

Patriarca Jacob kakuentajtlawanilh xborregos xkuku Labán akgpuxam kata. Xapulana akgkutati kata, skujli xlakata chatiy xlaktsuman Labán chu akgchaxan kata xlakata xmaxkika borregos (Génesis 30:25-33). Revista Biblical Archaeology Review wan: «Xalakgmakgasa tsokgnanin chu tiku xlikgalhtawakgakgo texto xalak Biblia, tuku xlakkaxtlawakgonit xlakata xborregoskan Labán chu Jacob, chuna xlismanikanit».

Akgtum liʼakxilhtit, makgapitsi kachikinin xalak Irak, la Nuzi chu Larsa, tekgskanit makgapitsi tatsokgni xla talakkaxlan tablillas xla arcilla. Chuna la xtalismani, talakkaxlan xmakgapala akgtum kata; xtsuku chu xkgalhsputa akxni xkamakgsitkan borregos. Mapuchwayanina xkakuentajtlawa chuna la xlakkaxwilikanit chu xtsokgkan kata nema xkgalhikgo chu komo xatsumat o xakgawasa. Akxni xtitaxtu akgtum kata, tiku xla borrego xmakgamakglhtinan lana chuna la xlilhuwa xlakkaxwilikanit, nachuna tuku litlawakanit leche o atanu, chu xalakgskgata borrego o amakgapitsi. Tuku xʼakgataxtu wa xlakgchan mapuchwayanina.

Borregos xlhuwankgo chuna la xlilhuwa borrego xalaktsuman xmaxkikan mapuchwayanina. Akgtum liʼakxilhtit, lata 100 borregos xalaktsuman xtalakaskin xkgalhikgolh max 80 laktsu borregos xastakna. Komo xnilh tantum borrego xmatajikan mapuchawayanina. Uma xtlawa pi liwana xliskujli xlakata tlakg xkuentajtlawakgolh borregos.