Akxni Jairo lakachilh xkgalhi tajatat wanikan cuadriplejía espástica. * Wa xlakata nila machokgo xmakni. Xlakata xakskitit nila wani xmakni la natatsuwi, kaj akglakgwa la tatsuwi. Lakgachunin tsuku tatsuwi chu xakstu tlawanikan tuku nitlan. Asta tiku lakatsu wilakgolh komo ni kuenta xtlawakgolh nitlan tuku nakatlawani. Lu nitlan, pero kilichinitkan xmakxpan chu xlakni ksilla de ruedas xlakata nitu nalani.

Akxni Jairo kstakma tlakg patinalh. Akxni xkgalhi akgtutu papaʼ xla tsukulh kgalhi epilepsia chu xmakgatsankga xtalakapastakni. Atsinu ni putum kilhtamaku kintse lakapala xchaxlin khospital xlakata xlakpuwan pi xninita.

Xlakata tliwakga xwili xmakni xlukut Jairo nitlan wa. Akxni xkgalhi 16 kata, tlawanika operación kxʼakglhtantun, kxtankilhan xlakata kxtantin xtalakgxtunit. Klakapastaka pi Jairo xtasa katsisni xlakata lu xkatsani akxni xtatlanima.

Xlakata lu snun wi kintala, talakaskin putum kilhtamaku namakgtayakan maski ni tuwa tuku natlawa, la kaj nawayan, nalhakganan chu natama. Kintse chu kintlat wa tiku makgtayakgo. Putum kilhtamaku malakapastakakgo pi ni kajwatiya xlakan tiku makgtayakgo, na makgtayama Dios.

Kinatlatni xtatayananin Jehová chu likgalhtawakganikgonit xalak Biblia Jairo lata akxni skgataku xwanit. Putum kilhtamaku kanajlakgonit pi latamat lu tlan akxni Dios kiʼamigojkan. Chu na xkatsikgo pi Jairo xkgalhi takgalhkgalhin, maski kaj akglakgwa xtatsuwi. Pero, xkakgalhskinkan komo Jairo xʼakgatekgsa tuku masiya Biblia.

Akgtum kilhtamaku, akxni Jairo aktsujku xwanit, kintlat wanilh xlakata nialh xkatsi tuku natlawa: «¡Jairo, katlawa litlan, kakintachuwinanti! Komo kimpaxkiya, xkintachuwinanti». Uma kilhtamaku Jairo tsukulh tasa. Xwamputun tuku xmakgkatsi, pero ni xtaʼakgatekgsa tuku xwan. Kintlat lu nitlan makgkatsilh xlakata makgatasalh. Pero, uma limasiyalh pi Jairo xʼakgatekgsnima maski nila xchuwinan.

 Ni lhuwa kilhtamaku, kinatlatni katsikgolh pi lakgachunin Jairo lakapala xmatsuwi xlakgastapu. Xtasiya pi xlakgastapu «xliwamputun» tuku xlakapastaka chu tuku xmakgkatsi. Komo ni xʼakgatekgsnikan ksitsi. Akxni kintlat chu kintse xʼakgatekgsnikgo tuku xliwamputun xlakgastapu chu xmaxkikan tuku kskima, Jairo xlitsin. Chuna xlimasiya pi paxtikatsini.

Chatum tiku xkamakgtaya tiku nila chuwinankgo kinkawanin, xlakata liwana naktachuwinanaw kintala, xaktlawaniw takgalhskinin niku xwa komo tlan o ni chu xakwiliniw akgtiy kimakankan kxlakatin. Chuna Jairo tlan xakxilhli makastakat komo xwamputun pi tlan o pakgxwiki komo xwamputun pi ni.

Makgtutu akgatunu kata, xtatayananin Jehová tamakxtumikgo niku lichuwinankan xalak Biblia chu asta ankgo akglhuwa cientos o miles latamanin. Jairo putum kilhtamaku xpaxuwa akxni xmastakan taʼakgchuwin xla tamunut. Akgtum kilhtamaku, akxni xkgalhi 16 kata, kintlat kgalhskilh: «Jairo, ¿na tamunuputuna?». Tunkun akxilhli xpakgastakat kintlat. Chu kintlat kgalhskilh: «¿Tlawaninita oración Dios chu waninita pi putum kilhtamaku skujnaniputuna?». Amakgtum, akxilhpa xpakgastakat kintlat. Liwana xtasiya pi Jairo xtamakamastaninita Jehová.

Akxni makglhuwa litachuwinanka Biblia, liwana litasiyalh pi Jairo xʼakgatekgsa pi xlilakaskinka tamunukan. Wa xlakata kkata 2004 tlawanika takgalhskinin nema tlakg xlakaskinka xliputum xlatamat: «¿Tamakamastaninita Jehová xlakata natlawaya xtalakaskin?». Jairo lakaʼalh talhman xlakata nalikgalhtinan, xlakata wanika pi chuna xtlawalh xlakata xlikgalhtinalh. Akxni xkgalhi 17 kata, kintala tamunulh chu xtatayana Jehová litaxtulh.

Kata 2011, Jairo makgamakglhtinalh akgtum xasasti nema tlan nalichuwinan: akgtum computadora, nema tlan limatsuwikan lakgastapu, nema stalani lakgastapu chu tlan maskuju computadora. Akxni talakgatsikan chu lakawanankan o akxilhkan icono xtachuna la pitanikan kratón. Lakkaxwilinika lhuwa símbolos kxpantalla xlakata tlan xlichuwinalh. Computadora tlan tlawa pi katakgaxmatli mensajes akxni talakgatsi chu lakawanan.

 Jairo tlakg katsinitilalh xlakata Biblia, chu na tlakg xkamasiyaniputun amakgapitsin tuku xkatsinima. Akxni kkakninaniyaw Dios kfamilia, Jairo kinkaʼakxilhan chu na akxilha xcomputadora. Chuna kimasiyani pi kaktsokgwilinilh xtakgalhtin xlakata tlan nakgalhtinan kkintamakxtumitkan. ¿La tlawa?

Ktamakxtumit Jairo putsa kpantalla asta akxni tekgsa chu asta akxni natapita xakstu niku xla lakaskin. Alistalh kimputumkan tlan kkgaxmataw xtakgalhtin. Chu litsin xlakata katsi pi kinkamatliwakglhan. Alex, tiku xʼamigo wan: «Putum kilhtamaku kaks kimalakawani Jairo akxni kkgaxmata xtakgalhtin xlakata tuku lichuwinan Biblia».

Jairo na limaklakaskin xlakgastapu xlakata nakalitachuwinan xtakanajla latamanin. Wa xlakata pitani niku wi icono kdibujo xla akgtum jardín niku putum latamanin chu animales xatapaxuwan lamakgolh chu anan takaksni. Alistalh, computadora wan: «Takgalhkgalhin nema masta Biblia wan pi katiyatni akgtum paraíso nawan chu nialh naʼanan tajatat chu linin; Apocalipsis 21:4». Komo tiku tachuwinama tlakg katsiputun, Jairo pitanipara chu computadora wampara: «¿Lakaskina naklimakgalhtawakgeyan Biblia?». Lu kaks kinkamalakawanin xlakata kintata makgamakglhtinalh takgalhtawakga. Lu klipaxuwaw akxni xakakxilhaw pi Jairo tsinu tsinu xmasiyani kintata tuku wan Biblia chu xmakgtaya chatum xtatayana Jehová. Kintata tamunulh kkintamakxtumitkan kMadrid, kʼagosto kata 2014. ¡Kimputumkan lu klipaxuwaw!

Xtakanajla Jairo xʼakxilhkgo xmakgalhtawakgenanin xalak escuela. Rosario, tiku xmakuchi, wa: «Komo xmilh kilhtamaku xakmakgtapakgsilh kʼakgtum takanajla, xtatayana Jehová xakwa. Kakxilhnit pi xlakata xtakanajla Jairo lu latamaputun, maski lu tuwa xlatamat».

Xlakgastapu Jairo lu lakgskgokgo akxni klikgalhtawakgani uma takgalhkgalhin xalak Biblia: «Tiku nila tlawan natlawan la tlawan juki, chu ksimakgat kgokgo lipaxuw nachuwinan» (Isaías 35:6). Xlikana, min kilhtamaku xlajwanan, pero atsinu ni putum kilhtamaku paxuwa, uma chuna la xlakata skujnanima Dios chu xʼamigos na xtatayananin Jehová. Xlakata akxilha latamat chuna la xlilat chu lanka xtakanajla, limasiya pi maski katuwa taʼakglhuwit nakgalhiyaw, komo skujnaniyaw Jehová, nalatamaputunaw.