Domingo pascuajnanikgo akxni lakastakwanalh Jesús. Chuna la wan Encyclopædia Britannica, «wa uma tuku tlakg tlawakgo iglesia cristiana». Pero ¿tataya Biblia uma pascua?

Xlakata nawanaw komo tuku tlawakanit xaxlikana o ni, xlakaskinka liwana nalakputsananiyaw. Nachuna, xlakata nakatsiyaw komo Pascua, o Domingo de Resurrección xtlawakgo kstalaninanin Cristo talakaskin liwana naputsananiyaw.

Pulana, Jesús ni kawanilh kstalaninanin pi xlakapastakkgolh akxni lakastakwanalh, wata akxni nilh. Apóstol Pablo limapakuwilh uma «taway xla kiMalanakan» (1 Corintios 11:20, TNM; Lucas 22:19, 20).

Nachuna, la wan enciclopedia nema talichuwinalha, lhuwa talismanin xla uma pascua nema tlawakan «ni xtachuna» xtalakastakwanat Jesús. Xkilhtsukut minitancha «ktalismanin nema lhuwa tlawakgokan». Akgtum liʼakxilhtit, kmakgapitsi países maklakaskinkgo kgalhwat chu skaw kʼuma pascua. Umakgolh tuku xmaklakaskinkan The Encyclopedia of Religion (Enciclopedia xla takanajla) wan: «Kgalhwat kilhchanima xasasti latamat nema tsuku akxni niyaw, o chuna la xlipalha xmakni kgalhwat». Wampara: «Xtakatsi pi skaw talhuwa kgalhi kskgata; wa xlakata kilhchanima akxni tanu primavera».

Philippe Walter, makgalhtawakgena xla Literatura Medieval, lichuwinan la umakgolh talismanin makgtamaknuka kDomingo de Resurrección. Xla tsokgli pi akxni «ni xaxlikana takanajla xla kstalaninanin Cristo wankgolh» ni tuwa tamalakxtumika xtalakastakwanat Jesús «akxni xtitaxtukgo klinin invierno asta klatamat kprimavera». Chu na wan pi xlakata laktamaknuka, uma makgtayanalh natamaknukan kcalendario xla ni xaxlikana takanajla «talakapastakni akxni tinilh Jesús», uma tlawalh pi lhuwa xʼanalh tiku xmakgtanukgolh knixaxlikana takanajla.

Tsukuka «laktamaknukan tuku ni xaxlikana» asta akxni nikgolh apóstoles xlakata xlakan “xmalakgachokgokgo” tuku ni xaxlikana takanajla (2 Tesalonicenses 2:7). Apóstol Pablo wa pi akxni “anita” nawan, xʼamakgo latamakgo lakchixkuwin tiku xmalakgatumikgolh takgsanin xlakata «namalakgaspityawakgoy limakgalhtawakgat» (Hechos 20:29, 30). Akxni xkgalhsputma xapulana siglo, apóstol Juan tsokgli pi makgapitsi lakchixkuwin lu tlan xkakitaxtunima xlakata xkaʼakgskgawima kstalaninanin Cristo (1 Juan 2:18, 26). Wa xlakata kstalaninanin Cristo tsukukgolh tlawakgo tuku xlismanikgonit ni xaxlikana takanajla.

Max wi tiku nawankgo pi ni talakgalhin maski xtlawakgo makgapitsi talismanin xla ni xaxlikana takanajla ni lu nitlan xwanit, nema max makgtayanalh pi tiku ni kstalanina Cristo xʼakgatekgskgolh tuku kilhchanima xtalakastakwanat Cristo. Pero, apóstol Pablo nikxni lakpuwa pi uma tlan xwanit. Akxni kilatapulilh xliputum xtamapakgsin Roma akxilhli lhuwa talismanin xla ni xaxlikana takanajla, pero nikxni maklakaskilh uma xlakata nakalimakgtaya latamanin tlakg nalakgapaskgo Jesús. Wata kawanilh kstalaninanin Cristo uma tachuwin: «Ni katatalakgxtupikgotit yama nti ni kanajlakgoy, sampi ¿tu ntlan ntatiyutlaway ntu xatlan wa ntu ni xatlan? su ¿tu ntamakgxtokga xkgakganat ntapakglhtutit? “Wa cha xpalakata: kalitaxtunikgotit, na katapanunikgotit, wan nkimPuchinakan, na ni tixamayatit wa ntu lixkajnit; cha nchu nkit nakkamakgamakglhtinanan”» (2 Corintios 6:14, 17).

Uma tuku akxilhwi limasiya pi Domingo de Resurrección ni xtlawakgo kstalaninanin Cristo.