Akxni kgaxpata tachuwin «lakatsu wi lisputni», ¿tuku lakpuwana? ¿Lakpuwana chatum tiku lu makgapekuanan la lichuwinan Dios, nema matsuwima Biblia chu pixlanka chuwinama niku akgchuwinan? ¿O lakpuwana pi akgtum lanka asteroide natalakgaxi Tiyat, nalakla putum tuku anan kkakilhtamaku o nalimasputunankan bombas? Akxni lichuwinankan uma, makgapitsi pekuankgo, atanu nitu wankgo chu amakgapitsin asta lilitsinkgo.

Anta kxTachuwin Dios liwana wan: «Namin lisputni» (Mateo 24:14). Uma lisputni anta kBiblia na lilakgapaskan «Armagedón» chu «ntlanka [x]kilhtamaku [...] Dios» (Apocalipsis [Revelación] 16:14, 16). Takanajla tanu tanu tuku masiyakgo xlakata lisputni chu malakgatumikgo nitlan talakapastakni chu tuku lu lipekua. Pero ¿tuku wamputun lisputni nema lichuwinan Biblia? Biblia liwana kinkawaniyan. Chu ni kajwatiya uma, kinkamakgtayayan xlakata naʼakxilhaw pi lisputni lakatsu wi chu kinkamasiyaniyan la tlan nalakgtaxtuyaw. Kalikgalhtawakgaw xlakata liwana nakatsiyaw tu wamputun lisputni. Alistalh naʼakxilhaw tuku lu xlikana namasputukan.

1. KATIYATNI NI KATILIMALAKGSPUTUKA LHKUYAT

   Biblia wan: «[Dios] tlawalh katiyatni, tliwekglh matutilh xlakata nikxni natalakgsija» (Salmo 104:5). Kʼuma versículo chu kʼatanu versículos, Biblia liwana kinkawaniyan pi Dios nikxni katimalakgsputulh Katiyatni chu ni katimastalh talakaskin pi wi tiku o wi tuku namalakgsputu (Eclesiastés 1:4; Isaías 45:18).

2. LISPUTNI KGALHI FECHA CHU HORA

   Maski makgapitsi lakpuwankgo pi lisputni ni kgalhi fecha, Biblia liwana wan pi Dios lakkaxwilinit akgtum kilhtamaku akxni nalimin. Anta kinkawaniyan: «Wampi akxni yama nkilhtamaku nchuna nalay, chu xatu hora nawan, tini katsiy, asta ni mpala wa ángeles nti wilakgocha nkakgapun, chu na ni mpala wa xaKam, wampi xman wa xaTlat. Skgalalh katawilatit, xampi ni katsiyatit akxni nachan kilhtamaku» (Marcos 13:32, 33). Liwana masiya pi Dios, tiku «xaTlat», lakkaxwilinita tuku «kilhtamaku» nalimin lisputni.

3. KATIYATNI NI NAMALAKGSPUTU CHIXKU CHU NI PARA AKGTUM METEORITO

   ¿Tuku o tiku namatsuki lisputni? Libro xla Apocalipsis wan: «Na ktiukxilhli akgapun xatalakin; na anta xwi snapapa kawayuj, chi nchu wa nti xkgawi, Makgantaxtina xlitapakuwinit, xa wa nTalulokgtat [...]. Na ktiukxilhli yuma animal chu reyes xala katiyatna, chu nkgamputum xtropa, chu nti xtamakgstokgkgonit natalatlawakgo wa nti xkgawi nkawayuj, chu nkgamputum xtropa» (Apocalipsis 19:11-21). Xlikana, tuku talichuwinan kʼuma versículos kaj wi tuku limasiya pero kinkamaʼakgatekgsniyan uma: Dios nakamalakgacha xʼángeles xlakata nakamalakgsputu xtalamakgasitsin.

1. XLISPUTNI MAPAKGSINANIN

   Biblia wan: «Kxkilhtamaku ama mapakgsinanin wa Dios xalak akgapun nawili akgtum tamapakgsin nema nikxni katisputli. Chu ama tamapakgsin ni katimatitaxtinika atanu kachikin. Nakalakxpula chu nakamasputu putum tamapakgsin chu ama tamapakgsin xliputum kilhtamaku natawila» (Daniel 2:44). Chuna la akxilhwi xlipulaktutu, «reyes  xala katiyatna» natamakxtumikgo xlakata «natalatlawakgo wa nti xkgawi nkawayuj, chu nkgamputum xtropa» (Apocalipsis 19:19). Pero xTamapakgsin Dios nakamalakgsputu.

2. XLISPUTNI GUERRA, LATLAWANIKAN TUKU NITLAN CHU TUKU NI XAʼAKGSTITUM

   Dios «[na]masputu guerra» xlikalanka katiyatni (Salmo 46:9). Na kaʼakxilhwi tuku wan uma texto: «Tiku tlawakgo tuku xaʼakgstitum nalatamakgo kkatiyatni, chu tiku ni tlawakgo tuku nitlan anta nalatamakgo. Pero tiku tlawakgo tuku ni xaʼakgstitum nakapulhuʼakxtukan kkatiyatni» (Proverbios 2:21, 22, Martín Nieto [MN], 1992). Chu Apocalipsis wan pi Dios «paks [na]masastiy xlipaks nkatuwaj» (Apocalipsis 21:4, 5).

3. XLISPUTNI TAKANAJLA NEMA MAKGALIPUWANKGONIT DIOS CHU LATAMANIN

   Akxni kalichuwinankan xaʼakgsaninanin xpulalinanin takanajla, libro xla Jeremías wan: «Palakachuwinanin lichuwinankgo tuku ni xaxlikana, sacerdotes nixatlan xliʼakxilhtitkan limasiyakgo. [...] Pero ¿tuku natlawakgo akxni namin lisputni?» (Jeremías 5:31, MN). ¿Tuku nakaʼakgspula tiku pulalinkgo takanajla? Jesús wa: «Nakiwanikgoy akxni yama nkilhtamaku: “Tlati, Tlati, ¿tu ktiʼakgchuwinaw kmintukuwini, chu na kmintukuwini ktilimaxtuw akgskgawini, chu na kmintukuwini ktilitlawaw lhuwa likakni?”. Cha nchu nkit nakkgalhtikgoy: Niukxni kkalakgapasni. Kakintapanunitit xtlawananin wantu nitlan» (Mateo 7:22, 23).

4. XLISPUTNI LATAMANIN TIKU PAXKIKGO TUKU NITLAN CHU TATAYAKGO TUKU NI XAʼAKGSTITUM

   Jesucristo wa: «Na wa yuma ntamaklhtumit: sampi wa xkgakganat, milh nkatuxawat, cha nchu nchixkuwin, wata wa ntlakg lakgpaxkikgolh ntapakglhtutit, ni xawa xkgakganat, xpalakata mpi wa xtatlawkan, nitlan xwanit» (Juan 3:19). Makgasa, kxkilhtamaku chatum chixku tiku lu xkanajlani Dios, wanikan Noé, Dios kamasputulh putum latamanin tiku lixkajni xlikatsikgo tiku xlamakgolh kKatiyatni. Anta 2 Pedro 3:5-7, Biblia wan: «Na watiya litum nchuchut, limasputupa yama xlikatlanka lantla xwanit nkatuxawat. Wampi wa ntu nchu akgapun, chu ntiyat, na watiya litum xtachuwin limakgapalama, litamakinit lhkuyat akxni xlikgatsputni katuxawat akxni nataputsananikgoy wa nti lakgachixkuwimakgankgolh Dios chu lantla natsankgakgoy».

Xlisputni «nkatuxawat» xalak kxkilhtamaku Noé tamalakxtumikan akxni «nataputsananikgoy wa nti lakgachixkuwimakgankgolh Dios chu lantla natsankgakgoy» nema nialh makgas namin. Pero kalakapastakwi pi makgasa, Dios ni masputulh katiyatni, wata «wa nti lakgachixkuwimakgankgolh», wamputun, xtalatlawananin. Nachuna, «akxni nataputsananikgoy», Dios nakamasputu tiku napaxkikgo tuku nitlan chu tiku xtalatlawananin nalitaxtukgo. Pero, xʼamigos nakakuentajtlawa, chuna la kakuentajtlawalh Noé chu xfamilia (Mateo 24:37-42).

¡Lu tlan nalatamayaw akxni Dios namasputu putum tuku nitlan anan kkakilhtamaku! Xlikana: lu tlan tamakatsin xpalakata latamanin lisputni nema lichuwinan Biblia. Pero, max wix kgalhskimpaka komo lhuwaku tsankga xlakata namin lisputni chu tuku tlan natlawaya xlakata nalakgtaxtuya. Kaʼakxilhwi tuku wan Biblia.