Kstakli niku ni lhuwa tuku xkgalhikan, kkachikin nema tapakgsi kMontreal. Xaʼawatiya xakwanit xlikgalhatsayan kinatalan. Akxni xakkgalhi akgchaxan papaʼ, kintlat nilh chu kintse wa tiku lakgatayalh putum familia.

Drogas, likgamanankan tumin chu latlawanikan tuku nitlan wa tuku klistakli. Niku kstakli, lhuwa xʼanan tiku nitlan xlikatsikgo. Akxni kajku 10 kata xakkgalhi, xakkataskuja prostitutas chu tiku xmasakuaninankgo tumin. Lu xaklakgati kkaʼakgskgawi chu xakkamakgkgalhanan latamanin. Xtachuna la droga.

Akxni xakkgalhi 14 kata lu xakkatsi la xakʼakgskgawinan. Akgtum liʼakxilhtit, lhuwa xaktamawa relojes, pulseras chu anillos nema kaj tsinu xkamakmawakakanit oro, xakkawilini niku xwan 14 quilates chu xakkastay ktiji chu niku kawilikan putlaw klaklanka pustan. ¡Lu lakapala xakkgalhi tumin! Akgtum kilhtamaku ktlajalh 10,000 dólares xalak Canadá.

Akxni xakkgalhi 15 kata, kintamakxtuka niku xkimakgtayamaka, wa xlakata nialh kkgalhilh niku naktamakgxtakga. Xaklhtata ktiji, kparques o kxchikkan kiʼamigos.

Lakgachunin xkinchipakgo policías xlakata xkinkgalhskinkgo tuku xakliskuja. Pero xlakata tuku xaksta ni xakkgalhanit, nipara makgtum kalh kpulachin. Talakaskilh pi lhuwa xakxokgonalh xlakata tuku nitlan xaktlawanit, xlakata xakʼakgskgawinanit chu xaksta tuku ni xaxlikana nachuna xlakata ni xakkgalhi talakaskin nakstanan. Nitu chu niti xakpekuani, asta xakkamatajinani tiku xmasakuaninankgo tumin. Xlakata uma lu tuwa xwanit, lakgachunin xaklin tuku limakgninankan. Asta kkataskujli tiku xtlawakgo tuku nitlan.

Akxni xlimakgtumku kilitachuwinanka tuku wan Biblia xakkgalhi 17 kata. Xaktawi kintaskin, chu xla tsukulh katakgalhtawakga xtatayananin Jehová. Pero xlakata ni klakgatilh tuku lichuwinan Biblia, kmakgxtakgli chu ktaʼalh atanu tiku na xaktalama.

 Pero xlichatiy tiku xaktalama na tsukulh katakgalhtawakga xtatayananin Jehová. Lu klakgatilh xlakata tsukulh lakgpali xtayat: tlakg tlan tsukulh likatsi chu ni lakapala ksitsi. Akgtum kilhtamaku kiwanika pi xakkataʼalh kxtamakxtumitkan chu kalh. Lu tanu likatsikgo latamanin tiku anta xwilakgo; xputumkan lu tlan xlikatsikgo chu lu tlan kimakgamakglhtinankgolh. Nipara makgtum chuna lu tlan xakmakgkatsinit. Akxni aktsinajku xakwanit ni lu kimpaxkika chu kifamilia ni lu xlakaskinka xkiʼakxilhkgo. Xlakata xtatayananin lu tlan kimakgamakglhtinankgolh wa uma tuku xakmaklakaskima. Kiwanikgolh pi tlan nakilimakgalhtawakgekgo Biblia chu tunkun kmakgamakglhtinalh.

Max lakgmaxtulh kilatamat tuku kkatsinilh. Xakkatalakkaxwilinit achatiy pi nakanaw kgalhananaw, xlakata xakmaklakaskin 50,000 dolares xlakata xakxokgolh tuku xaklaklin xlakata kintakgaman. ¡Lu tlan pi ni kkataʼalh! Achatiy makgantaxtikgolh tuku xaklakkaxwilinitaw chu chatum makgnika chu achatum tamaknuka kpulachin.

Akxni ktsukulh likgalhtawakga Biblia kkatsilh pi lhuwa tuku kililakgpalit xwanit kkilatamat. Akgtum liʼakxilhtit, anta 1 Corintios 6:10 Biblia wan: «Ni mpala wa nkgalhananin, chu na ni mpala wa xmakglakgatinanin tumin, chu ni mpala wa nkgotnin, chu ni mpala wa nti maxkajwalinanin, chu ni mpala wa akgskgawiminanin, ni katilakgchankgolh kxtapakgsin Dios». Akxni klikgalhtawakgalh uma versículo, ktsukulh tasa. Lu kilitalakgpalit xwanit (Romanos 12:2). Xaluku xakwanit chu kilatamat ni xaxlikana xwanit, lu nitlan xwanit.

Pero, na kkatsinilh pi Jehová tlan likatsi chu kinkatapatiyan (Isaías 1:18). Wa xlakata lhuwa ktlawanilh oración, ktasaskinilh pi xkimakgtayalh nakamakgxtakga tuku xaksmanipasanit chu xaklakgpalilh kilatamat. Xlakata kimakgtayalh, tsinu tsinu ktsukulh makgxtakga tuku xaktlawa. Tuku tlakg xlakaskinka ktlawalh wa pi kintaskin chu akit ktamakgaxtokgwi.

Ama kilhtamaku akxni xakkgalhi 24 kata xakkgalhiya kgalhtutu kamanan. Xakmaklakaskin akgtum tlan taskujut xlakata tlan xakkamaxkilh tuku maklakaskinkgo. Pero ni lu xakanit kʼescuela chu ni xakkatsini akgtum taskujut. Amakgtum kskinipa xtamakgtay Jehová chu kalh kputsa taskujut. Akxni xakchan lakatum, xakwan pi xaktalakgpaliputun chu lakatanks xakskujputun. Xmin kilhtamaku xakwan pi xaklikgalhtawakgama Biblia xlakata tlan xaklikatsilh. Pero putum ni kimakgamakglhtinankgolh. Xaʼawatiya, akxni kwampa xlakata kilatamat akxni xakputsama taskujut, chixku kiwanilh: «Ni liwana kkatsi tuku xlakata, pero wi tuku kiwani pi nakmaxkiyan taskujut». Liwana kkatsilh pi wa uma tuku kilikgalhtika kiʼoraciones. Titaxtulh tsinu kilhtamaku, kimpuskat chu akit xtatayananin Jehová klitaxtuw.

Klama xlakata ktlawanit tuku wan xtastakyaw Biblia chu xlakata ktlawama la tlawalh Cristo. Kkgalhi akgtum lu tlan familia chu tlan kmakgkatsi kkintalakapastakni, xlakata liwana kkatsi pi Jehová kintapatinit.

Akgkutatita kata lata ktsukulh putum kilhtamaku skujnani Dios: lhuwa kilhtamaku klimaxtu xlakata nakkamakgtaya amakgapitsi naʼakgatekgskgo tuku wan Biblia. Nina makgas, kimpuskat na putum kilhtamaku tsukulh skujnani Dios. Nachuna, umakgolh puxamakaw kata kkamakgtayanit 22 tiku kkataskuja xlakata xtatayananin Jehová nawankgo. Chuntiya kkan klaklanka pustan pero ni kaj kan kkamakgkgalhanan latamanin chuna la xapulana. Makglhuwa klakputsa la nakalitachuwinan latamanin tuku tlakg xlakaskinka: takgalhkgalhin xlakata akgtum kakilhtamaku tlan nalatamakgo niku nialh katiʼanalh kgalhananin (Salmo 37:10, 11).