ANTICRISTO uma tamalakxtumikgo lata titaxtutilhanit kilhtamaku tiku papas xalak Roma chu películas nema makgapekwanankgo. Wa xlakata, latamanin kakgalhskinkan: ¿Tiku anticristo? ¿Kilikatsitkan xlakata uma? Uma tachuwin makgkitsis wi anta kBiblia, talakaskin pi nakatsiyaw tuku kilhchanima anta kBiblia.

Kaj chatum xtsokgna Biblia limaklakaskin uma tachuwin anticristo wa apóstol Juan. ¿Tuku wan xlakata uma? Xapulana xcarta wan: «Awatiya yuma nkilhtamaku xlikgatsputni katuxawat mpulamaw; kgaxpatnitantit wixin mpi namin wan nti xtalatlawananin Cristo. Chunata nchu lhuwa lamakgo, tsukukgonit Cristo litaxtukgoy. Pus wa yuma likatsiyaw mpi awatiya nkilhtamaku xlikgatsputni katuxawat mpulamaw. Kinkatalakapanunikgon makgapitsin, ankgolh, wampi wa xpalakata mpi ni luwa kin xkinkatapakgsinikgoyan [...]. ¿Ti wa akgsanini, wa lapi ni wa yuma nti lakgmakgan Jesús, wan mpi ni wa nCristo? Pus wa yuma nti xtalatlawana Cristo, wa cha nti lakgmakgan xaTlat, chu xaKam» (1 Juan 2:18, 19, 22).

¿Tuku katsiniyaw xlakata uma tachuwin? Juan lichuwinan «lhuwa anticristos», uma makgatekgsninan pi anticristo lhuwa latamanin litaxtukgo. Chuna la wan Juan, wantiku litaxtukgo anticristo wankgo takgsanin, pi Jesús ni wa Cristo o maʼakgtsekgwilikgo tuku xaxlikana xlakata Jesucristo chu xTlat. Latamanin tiku wankgo pi litaxtukgo Cristo o akgtum tamakxtumit nema wankgo pi palakachuwinankgo xlakata tlakg lhuwa tiku nakanajlakgo. Lu xlakaskinka tuku wan Juan xlakata putum umakgolh latamanin «kinkatalakapanunikgon [...] xpalakata mpi ni luwa kin xkinkatapakgsinikgoyan», uma kinkawaniyan pi lakgmakgankgonit xtamasiy Jesús. Xlakata uma grupo makgasa anankgo asta lata kxkilhtamaku Juan. Max, tachuwin «awatiya yuma nkilhtamaku» xwamputun xlakata chuna xʼama kitaxtu akxni xlamajku nawan xaʼawatiya xʼapóstol Jesús.

¿Tuku atanu wa Juan xlakata anticristo? Wa xlakata xʼama masiyakgo takanajla nema ni xaxlikana, xlakata wa: «Wa yuma nalilakgapasatit kSpiritu Dios, mpi wa ntu xlipaks spiritu nkgalhapalay mpi wa Jesucristo xachatum milh, pus wa xla ntapakgsiniy Dios. Chu wa xlipaks spiritu ntu ni kgalhapalay mpi wa Jesucristo xachatum milh, ni wa xla ntapakgsiniy Dios; kakatsitit mpi wa xtachuwin spiritu wa nti xtalatlawana Cristo. Wa yama xpalakata wa nti wixin nkgaxpatnitantit mpi namin, na antiya nchu wi nkatuxawat» (1 Juan 4:2, 3). Xlimaktiy carta, wampa: «Sampi luwa akgskgawiminanin lakatakinankgonit nkatuxawat, wa nti ni matlanikgoy mpi wa Jesucristo, xkgalhiy xtiyatliwa nkichilh. Wa yuma nti nchuna ntlawakgoy, akgskgawiminanin, na wa xtalatlawananin Cristo» (2 Juan 7). Xlikana tuku wa Juan pi anticristo wa tiku masiya taʼakgsanin xlakata Jesucristo chu tuku xla masiyalh.

Akxni Juan nina xtsokgka uma xla anticristo, Jesucristo xkawaninita kstalaninanin: «Kana wixin, kuintaj kakatlawakantit wa xpalakatakan nti ni luwa wa xpalakachuwinanin Dios, nti xtachuna nkgalhnilu ntasiyukgoy nkalakgminkgoyan, wampi wa kxnakukan luwa xtachuna xawananin xuwachichi» (Mateo 7:15). Apóstol Pablo nachuna kawanilh kstalaninanin Cristo xalak Tesalónica xlakata xkuentajtlawakgolh uma: «Tini mpala ti tikaʼakgskgawiyan; sampi ni katimilh yama [xkilhtamaku Jehová] mpala ni pulana nalay wa ntu ntlanka xtalakgmakgan ntakanajla, chu natasiyuy nchixku xla talakgalhin, wa nti luwa chuna lakgchan natsankgay» (2 Tesalonicenses 2:3).

Uma wamputun pi kxapulana siglo xwilakgolha nixaxlikana palakachuwinanin chu makgalhtawakgenanin tiku xkamaxlajwaniputunkgo xtakanajlakan tiku kstalaninanin Cristo. Putum umakgolh tiku xmalakgatumimakgolh taʼakgsanin xlakata Cristo chu tuku masiyalh wa uma tuku Juan limapakuwilh «anticristo». Akxni kawanilh «nchixku xla talakgalhin, wa nti luwa chuna lakgchan natsankgay», Pablo liwana lichuwinalh tuku xlakpuwan Jehová xpalakatakan.

La uku chuntiya wi anticristo. La uku wilakgolh latamanin chu tamakxtumit tiku lakatakikgo Jesús chu tuku masiyalh. Malakgatumimakgolh takgsanin chu ni xaxlikana tamasiy nema tlawa pi latamanin nila nakatsikgo tiku Jesús chu xTlat, Jehová. Kuenta kilitlawatkan xlakata ni nakinkaʼakgskgawikgoyan. Kaʼakxilhwi akgtiy takgsanin nema kaʼakgskgawinit lhuwa latamanin.

Lata titaxtunit siglos, lhuwa takanajla «tiku wankgo pi kanajlanikgo Cristo» malakgatumikgonit tamasiy xlakata Trinidad. Wankgo pi xaTlat chu xaKgawasa kaj chatum Dios. Nachuna, umakgolh takanajla na litaxtukgo la anticristos xlakata ni liwana lichuwinankgo xlakata Dios chu xlakata Jesús. Uma tlawa pi latamanin nila nalakgapaskgo Dios chu nila natlawakgo la Jesucristo, chuna la Biblia masiya (1 Corintios 11:1; Santiago 4:8).

Atanu la tuku kaliʼakgskgawikgo latamanin uma takanajla xlakata xapaxtunikgot kxBibliajkan xtukuwani Dios, Jehová, chu ni tlan lichuwinankgo Biblias nema liminkgo xtukuwani Dios. Ni para limaxanankgo tuku tlawakgo, xlakata xapulana uma tukuwani Jehová xlimin akgtujun milh anta kBiblia. ¿Tuku kitaxtunit xlakata uma takgsanin? Xlakata lhuwa latamanin, ni liwana lakgapaskgo Dios tiku xaxlikana.

Nachuna, lakgapaskan xtukuwani Dios, Jehová kamakgtayanit pi lhuwa latamanin tiku xlikana lakgapasputunkgo tlan natalakatsuwinikgo. Wa uma tuku titaxtulh Richard, putum kilhtamaku lakapastaka tuku wanikgolh akgtum tamakgaxtokgat tiku xtatayananin Jehová. Xla wan: «Kimasiyanikgolh kBiblia pi xtukuwani Dios tiku xaxlikana wa Jehová. Lu kaks kimalakawanilh pi Dios xkgalhilh xtukuwani. Nikxni chuna xaklakpuwanit». Lata uma kilhtamaku, tsukulh tlawa kxlatamat tuku katsinilh kBiblia, xlakata namakgapaxuwa Jehová. Richard wan: «Xlakata kalakgapasli xtukuwani Dios uma tlawanit pi tlan naktalalin.»

Lata titaxtunit siglos, anticristo tlawanit pi millones latamanin xtawilakgolh kxakapukswa kxtakanajla. Komo nalakputsananiyaw tuku wan Biblia, nakatsiyaw tiku xaxlikana anticristo chu nialh kintikaʼakgskgawikgon (Juan 17:17).