Kkinkilhtamakujkan lhuwa anan lhuwa taʼakglhuwit. La uku «lu tuwa» kilhtamaku lamaw (2 Timoteo 3:1, Traducción del Nuevo Mundo). Lhuwa latamanin lilakgaputsakgo tumin, guerras, tajatat chu akxni wi tuku masputunan, maski latamanin chuna tlawakgo o tuku masputunan kkakilhtamaku. Nachuna, wilakgo tiku lilakgaputsakgo xlatamatkan. Wi tiku pekuan akxni nawani makuchina pi kgalhi cáncer. Amakgapitsi lilakgaputsakgo la nakakitaxtuni xkamanan chu xnatanatni kilhtamaku nema aku mima.

Lakgachunin tlan lilakgaputsakan. Akgtum liʼakxilhtit, max nalilakgaputsayaw akxni natlawayaw akgtum examen, akxni nachuwinanaw kxlakatin lhuwa latamanin o akxni naʼanaw putsayaw taskujut. Nachuna, akxni tsinu lilakgaputsayaw kinkamakgtayayan xlakata nitu nakinkaʼakgspulayan. Pero lu nalilakgaputsakan, lu nitlan tuku nakinkatlawaniyan. Akxni kalakputsananika liwaka 68,000 latamanin takatsilh pi akxni wi tiku tsinu lilakgaputsa natlawa pi naniy maski nina lin kata. Wa xlakata Jesucristo kgalhskininalh: «Komo wi tiku nalakgaputsa, ¿tlan tlakg namalhmani xlatamat?». Xlikana. Maski lu nalilakgaputsayaw ni la tlakg makgas katilatamaw. Wa xlakata na stakyawanampa: «Ni tiIilakgaputsayatit» (Mateo 6:25, 27). Pero ¿tlan ni lu nalakgaputsayaw?

Wi tuku kilitlawatkan xlakata tlan chuna nawan, naskiniyaw xtamakgtay Dios chu nalipawanaw tuku kinkamalaknuninitan. La uku naʼakxilhaw la makgtayalh Paul, Janet chu Alona xlakata nialh lu xlakgaputsakgolh. Maski la uku nitu titaxtumaw tuku nitlan, nila nawan pi ni chuna katikgalhiw kilhtamaku nema aku mima.