Niti tiku nitlan likatsiputun, akgsaninamputun o tlawaputun tuku nitlan. Wata tlawaputun tuku tlan. Pero ¿tuku xlakata lhuwa anan tiku lakatsalakgo limapakgsin, tiku ni tlawakgo tuku xaʼakgstitum chu tuku lixkajni likatsikgo? Lu nitlan chali chali akxilhaw tuku lu nitlan nema makgapekuanan. ¿Tiku kamatlawi latamanin tuku nitlan? (Kalikgalhtawakga 1 Juan 5:19.)

¿Kinkatlawan Dios xlakata natlawaputunaw tuku nitlan? Ni. Xla kinkatlawan chuna la xtayat chu la likatsi. Kinkatlawan xlakata nalimasiyayaw tapaxkit (Génesis 1:27; Job 34:10). Pero na kinkatlawan pi akinin nalaksakaw tuku natlawaputunaw. Xapulana kinatlatnikan ni tlawaputunkgolh chuna la Dios chu laksakkgolh natlawakgo tuku nitlan. Uma kilhtamaku makglakgalhina litaxtukgolh. Akxni kgalhikgolh xkamanankan, xlakan nachuna tlawaputunkgolh tuku nitlan. (Kalikgalhtawakga Deuteronomio 32:4, 5.)

Dios lakaskin pi kamakgxtakgwi tuku nitlan tlawaputunaw (Proverbios 27:11). Kinkawaniyan tuku natlawayaw xlakata tlan nawan kintayatkan. Komo natlawayaw tuku nakinkawaniyan chu nachuna natlawayaw la likatsi, tlan napaxuwayaw. Xlikana, la uku nila putum chuna tlawayaw la xla. ¿Chuna nawan putum kilhtamaku? (Kalikgalhtawakga Salmo 32:8.)

Dios mastama talakaskin pi kaʼanalh tuku nitlan xlakata naʼakxilhaw pi nitlan kitaxtu. Pero ni putum kilhtamaku namasta talakaskin (2 Pedro 3:7-9). Nialh makgas kKatiyatni nalatamakgo latamanin tiku tlan likatsikgo chu xatapaxuwan nachuna tiku likatsikgo chuna la Dios. (Kalikgalhtawakga Salmo 37:9-11.)