LICHUWINAN TUKU WI KXMAKNI REVISTA | ¿TUKU LA AKXNI NIKAN?
¿Putum masputu linin?
¿Tiku nikgonita tlan nalatamaparakgo?
TAKGALHTIN NEMA MASTA BIBLIA: «Namin kilhtamaku akxni putum tiku wilakgo kputaknun nakgaxmatkgo xtachuwin [Jesús] chu nataxtukgo» (Juan 5:28, 29).
Jesucristo wa pi kilhtamaku nema aku mima, akxni namapakgsinan, putum tiku aknukgo nalakastakwanamparakgo. Fernando, tiku talichuwinan kxapulana artículo lakapastaka: «Lu kaks kimalakawanilh akxni klikgalhtawakgakgolh Juan 5:28, 29. Uma akgtum takgalhkgalhin chu xatapaxuwan ktsukulh kakxilha kilhtamaku nema aku mima.»
Job tiku ni makgxtakgli Dios xkanajla pi xʼama min kilhtamaku akxni Dios xʼama maxkipara latamat. Job kgalhskininalh: «Akxni chatum chixku niy, ¿tlan nalatamaparay?». Chu xla wampa: «Putum kilhtamaku nema kiliskujat [kilhtamaku nema kwi nawan kputaknun] nakkgalhi asta nachin kilakgxokgo. Wix nakixakgatliya chu akit nakkgalhtiyan» (Job 14:14, 15).
Xtalakastakwanat Lázaro kinkamaxkiyan takgalhkgalhin kilhtamaku nema aku mima
Marta xkatsiya xlakata talakastakwanat, xtala Lázaro. Akxni xninita Lázaro, Jesús wanilh: «Nalakastakwanan mintala». Cha nchu Marta, wanilh: «Kkatsiy mpi nalakastakwanan ktalakastakwan, akxni awatiya kilhtamaku». Wanilh Jesús: «Kit wa ntalakastakwan, chu latamat; wa nti nkit nkinkanajlaniy, maski xnilh, nalatamay» (Juan 11:23-25). Alistalh, Jesús malakastakwanilh Lázaro. Uma tuku lichuwinan Biblia tlawa pi nakatsiyaw tuku nala kilhtamaku nema aku mima. ¡Lu nalipaxuwayaw akxni nakaʼakxilhaw millones latamanin nakamalakastakwaniparakgokan xlikalanka katiyatni!
¿Wi tiku nalakastakwanan kʼakgapun?
TAKGALHTIN NEMA MASTA BIBLIA: Anta kxTachuwin Dios masiya pi xtalakastakwanat Jesucristo ni tatalakxtumi akgtsayan talakastakwanat nema lichuwinan Biblia. ¿Tuku xlakata? Umakgolh kgalhtsayan latamanin lakastakwanankgolh kKatiyatni. Pero Biblia wan pi xtalakastakwanat Jesucristo: «Nti kxpakgstakat Dios wi, anitta nkakgapun» (1 Pedro 3:21, 22). ¿Kajwatiya xakstu Jesucristo tiku lakastakwanalh xlakata nalatama kʼakgapun? Nina makgas xkamalaknuninit kstalaninanin: «Chi lapi nakan kakaxwiliniyan mimputawilhkan, pus nakmimpala amakgtum, na kit nakkaliyanan kkimpaxtun, lakimpi anta ntani nkit kwij nawan, na anta wixin natawilayatit» (Juan 14:3).
Jesucristo alh kʼakgapun chu lakkaxwililh xlakata nakamakgamakglhtinan makgapitsi kstalaninanin. Chuna la wan Biblia, xlilhuwa tiku naʼankgo kʼakgapun 144,000 latamanin (Apocalipsis [Revelación] 14:1, 3). Pero ¿tuku natlawakgo kstalaninanin Cristo anta?
Lhuwa tuku natlawakgo. Anta kBiblia wan: «Chapaxuwana lama [chu xasanto] chu na xatalaksakni wa nti nalakastakwanan akxni xakgasiya ktalakastakwan; wa xlimakgtuy linin, ni kgalhiy litliwakga kxpalakatakan; wampi [kxsacerdotes] Dios nawankgoy, chu xla Cristo, na natamapakgsinankgoy akgtum milh kata» (Apocalipsis 20:6). Xputumkan mapakgsinanin chu sacerdotes nawankgo, chu natamapakgsinankgo Jesús kKatiyatni.
¿Nalakastakwanankgo kKatiyatni latamanin?
TAKGALHTIN NEMA MASTA BIBLIA: Anta kBiblia lichuwinan tuku wa apóstol Pablo: «Na kkgalhkgalhima tuku wan Dios, chuna la xlakan kgalhkgalhimakgolh, pi nakamalakastakwanikan tiku tlan likatsikgo chu tiku nitlan likatsikgo» (Hechos 24:15, TNM).
Anta kBiblia liwana kinkawaniyan pi millones latamanin nalakastakwanankgo
¿Tiku ama «tlan likatsikgo»? Kalilakapastakwi chatum chixku tiku tlan xlikatsi: Daniel. Xla litaxtulh chatum xpalakachuwina Dios tiku ni makgxtakgli wa xlakata kxaʼawatiya kxlatamat wanilh «Najaxa, pero natakiparaya xlakata namakgamakglhtinana tuku lakgchanan kxaʼawatiya kilhtamaku» (Daniel 12:13). ¿Niku nalakastakwanan Daniel? Biblia liwana wan: «Tiku xa’akgstitum xlakan nawan katiyatni, chu putum kilhtamaku nalatamakgo anta» (Salmo 37:29, TNM). Nachuna, Jesús lichuwinalh: «Chapaxuwana lamakgo wa nti xalaksmalhwan, xampi wa namakgamakglhtinankgoy nkatiyatna» (Mateo 5:5). Chuna la Daniel chu amakgapitsi xlakskujnin Dios tiku ni makgxtakgkgolh nalakastakwanankgo xlakata nalatamaparakgo kKatiyatni, chu tlan nalipaxuwakgo latamat putum kilhtamaku.
¿Chu tiku ama «nitlan likatsikgo»? Lhuwa millones latamanin tiku nikgolh chu nila lakgapaskgolh chu ni lilatamakgolh tuku masiya Biblia. Akxni nalakastakwanankgo, nakatsikgo tiku Jehová * chu Jesucristo, chu tlan nakapaxkikgo (Juan 17:3). Tiku nalaksakkgo naskujnanikgo Dios nalatamakgo putum kilhtamaku chuna la Jehová.
Tiku nalaksakkgo nalakskujnanikgo Dios tlan xatapaxuwan nalatamakgo putum kilhtamaku
¿La nawan latamat kKatiyatni?
TAKGALHTIN NEMA MASTA BIBLIA: Dios «na paks naxakanikgo Dios xlakgpixtajatkan na nialh katiʼanalh linin chu na nialh katiʼanalh talipuwan, ni mpala wa ntatasa chu na ni mpala wa ntakatsanajwat» (Apocalipsis 21:4). «Natlawakgo chiki chu anta natawilakgo; chu nachankgo uvas chu nawakgo xtawakat» (Isaías 65:21).
¡Kalakpuwanti pi lipaxuwapatit uma latamat wix chu tiku kapaxkiya! Pero wijku akgtum takgalhskinin nema nakgalhtiyaw: ¿tuku kinkamakanajliyan pi naʼanan talakastakwanat?
^ párr. 15 Biblia wan pi Jehová wa xtukuwani Dios.
