¿Kgalhskinkanita komo wi atanu tuku xlakata lamaw chu ni kajwatiya nakgamananaw, naskujaw, natamakgaxtokgaw, nakgalhiyaw kamanan chu nakgolonaw? (Job 14:1, 2.) Biblia masiya pi asta latamanin tiku lu lakgskgalalan chuna kakgalhskinkanit. (Kalikgalhtawakga Eclesiastés 2:11.)

Xlakata nakatsiyaw tuku xlakata lamaw, kilikatsitkan la tsukulh latamat. Akxni akxilhkgonit pi lu tlan tlawakanit kiʼakskititkan chu kimaknikan, lhuwa latamanin lakpuwankgonit pi kinkatlawan chatum tiku lu skgalala. (Kalikgalhtawakga Salmo 139:14.) Komo chuna, wi tuku xlakata kinkatlawan. Tlakg napaxuwayaw kkilatamatkan komo nakatsiyaw tuku xlakata lamaw.

Akxni Dios kamalakatsukilh xapulana latamanin, kalakgayawalh lu tlan taskujut. Dios xlakaskin pi xlimalakgatsamakgolh Katiyatni xkamanankan, akgtum paraíso xtlawakgolh chu xlatamakgolh putum kilhtamaku. (Kalikgalhtawakga Génesis 1:28, 31.)

Akxni latamanin ni kgalhakgaxmatkgolh Dios, xla ni laktlawalh tuku xtlawaputun, chu ni kaj chuntiya kinkamakgxtakgni. Biblia wan pi Dios chuntiya skujma lata uma kilhtamaku xlakata nakalakgmaxtu xlakskujnin chu xlakata nakgantaxtu xtalakaskin kKatiyatni. Dios lakaskin pi wix na nalipaxuwaya latamat nema xlakaskin pi xkgalhiw. (Kalikgalhtawakga Salmo 37:29.) Anta kBiblia wan tuku natlawayaw xlakata nalatamayaw chuna la xtalakaskin Dios.