Makgapitsi max nalakpuwankgo pi ni xlikana xlakata talakastakwanat. Apóstol Pablo ni chuna xlakpuwan, xla wa: «Lapi wa yunu kkintalataman xman wa nkgalhkgalhiyaw xpalakata xtamakgtay nCristo, kin wa nti ntlakg xakgoxutanin wa lantla xlipaks nchixkuwin. Wa mpi wa nchu xlikana lakastakwananit nCristo klinin; na wa nti xakgasiyaj lakastakwananit, xaliukxilhtit liwanit lantla nalakastakwanankgoy xlipaks ninin» (1 Corintios 15:19, 20). Pablo xlikana xkanajla pi xʼamakgo lakastakwanankgo tiku nikgonita. ¿Tuku xlakata lu xkanajla? Xlakata Jesús xlakastakwananita wa xlakata chuna xkanajla (Hechos 17:31). * Wa xlakata Pablo limapakuwilh Jesús «xakgasiyaj lakastakwananit», wa litaxtulh tiku pulana lakastakwanalh xlakata nalatama putum kilhtamaku. Tlan nalakpuwanaw pi komo Jesús wa xapulana tiku lakastakwanalh, xʼama anan tlakg talakastakwanat.

Wi atanu tuku xlakata tlan kanajlayaw pi naʼanan talakastakwanat: Jehová, tiku xaxlikana Dios, «ni ukxni akgsaninan» (Tito 1:2). Xla nikxni akgsaninan chu nikxni chuna katitlawalh. Tlan xmalaknulh Dios pi naʼanan talakastakwanat xlakata kgalhi litliwakga chu ¿alistalh ni xmakgantaxtilh tuku wanit? Komo chuna nitlan xwa.

Xlakata lu kinkapaxkiyan, Jehová lakpuwanit pi nakamalakastakwani tiku nikgonita. Kgalhskininalh Job: «Akxni chatum chixku niy, ¿tlan nalatamaparay? [...] Wix nakixakgatliya chu akit nakkgalhtiyan. Xlakata tuku litlawanita mimakan nakgalhiputuna» (Job 14:14, 15). Job liwana xkatsi pi xTlat xalak kʼakgapun nakgalhiputumpara wa xlakata namalakastakwanipara. ¿Chuntiya makgkatsi Dios? Anta kBiblia lichuwinan: «Akit Jehová;  ni ktalakgpalinit» (Malaquías 3:6). Xlikana, Dios chuntiya kamalakastakwaniputun xlakata xatapaxuwan nalipaxuwakgo latamat. Wa uma tuku lakaskinkgo putum natlatni tiku nikgonit xkamankan. Lu tlan pi Dios ni kajwatiya lakaskin, na kgalhi litliwakga xlakata chuna natlawa (Salmo 135:6).

Jehová namaxki litliwakga xKgawasa xlakata nakamalakastakwani tiku nikgonita, uma natlawa pi lu nakamakgapaxuwa tiku makgatsankgakgonit xfamiliajkan. Nachuna, Jesús lu lipaxuwa uma tuku natlawa. ¿La likatsiyaw? Akxni nina xmalakastakwani xʼamigo Lázaro, «tsukulh tasay Jesús» akxni akxilhli pi xpatinamakgolh xnatalan laktsuman chu xʼamigos (Juan 11:35). Atanu kilhtamaku, akxni akxilhli chatum puskat tiku xninita chixku tiku na nilh xkgawasa, «luwa snun lakgalhamalh, chu chuna wanilh: “Ni katasa”». Chu tunkun malakastakwanilh uma kgawasa (Lucas 7:13). Umakgolh tuku talichuwinan katsiniyaw pi Jesús nitlan limakgkatsi tapatin nema limin linin. Wa xlakata, ¡lu napaxuwa akxni talipuwan nalitaxtu tapaxuwan akxni nalakastakwanankgo tiku nikgonita!

¿Nilh tiku lu xpaxkiya? Max nalakpuwana pi akxni nikan anta putum sputa chu nila tiku lakkaxtlawa. Pero nichuna: Dios nakamalakastakwani tiku nikgonita chu wa xKgawasa tiku lakgayawanit. Kalakapastakti pi Dios lakaskin pi wix anta natawilaya xlakata nakamakgamakglhtinana tiku kapaxkiya. Kalakpuwanti akxtum nalakkaxwiliyatit tuku natlawayatit putum kilhtamaku, chu nikxni katilamakgxtakgtit.

Lionel, tiku pulana lichuwinaw, wan: «Akxni wi tiku kilitachuwinalh xlakata takgalhkgalhin xla talakastakwanat, nila xakkanajla pi xlikana xwa chu xaklakpuwan pi kaj xkiʼakgskgawima. Pero alistalh kkatsilh pi xlikana tuku wan Biblia. ¡Lu kakxilhputumpara kintata!».

¿Tlakg katsiputuna? Xtatayananin Jehová xatapaxuwan namasiyanikgoyan anta kBiblia tuku xlakata chuna kanajlakgo pi tiku nikgonita nalakastakwanamparakgo. *