TUKU WI KXMAKNI
¿Tiku xtatayananin Jehová?
«Lhuwata kata klakgapasa Mike. Xla xtatayana Jehová, chu xtakanajla tanu la xakakxilha. ¿Tiku Jehová? ¿Tuku xlakata xTatayananin Jehová ni paskuajnankgo? Xaklilakgaputsa xlakata Mike xmakgtapakgsi kʼakgtum secta.» (Becky, xalak California, Estados Unidos)
«Tiku kintalakatsu tsukukgolh katakgalhtawakgakgo xtatayananin Jehová chu akit klakapastakli: “¡Tanu takgaxmata xtukuwani uma takanajla! ¿Tuku wamputun?”» (Zenon, xalak Ontario, Canadá)
«Akit chu kimpuskat xaklakpuwanaw pi xTatayananin Jehová xminkgo kaj xlakata nitlan nakinkamamakgkatsiniyan pi ni kkanaw niku kkanajlayaw. Nachuna xaklakpuwanaw komo ni xaktekgsnitaw tuku xakputsayaw ktakanajla nema tlakg talakgapasa, ni para max tlan xaktekgswi kʼakgtum secta nema niti lakgapasa la xla xtatayananin Jehová.» (Kent, xalak Washington, Estados Unidos)
«Xlikana, nipara xakkatsi tiku xlakan o tuku xkanajlakgo.» (Cecilie, xalak Esbjerg, Dinamarca)
Max kaʼakxilhnitata akxni lichuwinankgo Dios akgatunu chiki, chu katijin, mastamakgolh likgalhtawakga chu malaknumakgolh takgalhtawakga xalak Biblia. Max revista nema chipanita wa maxkikgon. Pero max nachuna lakpuwana la latamanin tiku kalichuwinankaja chu kgalhskinkana tiku xlikana xtatayananin Jehová.
Komo kgalhiya takgalhskinin o wi tuku katsiputuna xlakata xtatayananin Jehová, ¿tuku natlawaya? ¿Niku tlan nakatsiya xlakata tuku kanajlakgo, la xokgokgo tuku tlawakgo chu niku tamakxtumikgo, chu tuku xlakata ankgo kminchik o akxni machokgokgoyan ktiji?
Cecilie, nema talichuwinalha, wan: «Lhuwa tuku klikgalhtawakgalh kʼInternet xlakata xtatayananin Jehová. Kgaxmatli pi nitlan xkalichuwinankan chu lhuwa tuku xkalimawakakan uma tlawalh pi nitlan xakkaʼakxilhli». Pero akxni xla katachuwinalh xTatayananin Jehová, katsilh tuku xaxlikana tuku ni xʼakgatekgsa.
Komo tlakg katsiputuna xlakata xtatayananin Jehová, ¿tuku xlakata ni kakgalhskina? Wa tiku tlawakgo uma revista chu xlakan xatapaxuwan namaxkikgoyan xtakgalhtin mintakgalhskinin (Proverbios 14:15). Artículo nema namin nalichuwinan tuku namakgtayayan xlakata nakatsiya tiku xlakan, tuku kanajlakgo chu tuku tlawakgo.
